19 октябрьста Саранскяйса, Культурань республиканскяй Дворецса, ушедовсь Мордовиянь эряйхненди фкя инь кельгови илась—«Шумбрат, Мордовия!» Народнай творчествань республиканскяй фестивальсь-конкурссь. Тя кизоня сон ётафтови комсь кафксувоцеда. Тяддень фестивальть лозунгоц—«Шумбрат, Мордовия многонациональная!». Лемтьф конкурссь Россияса Семьянь кизоти и Мордовияса Трудовой династиянь кизоти.
Фестивальть-конкурсть панжезь Большеигнатовскяй и Ичалковскяй райононь самодеятельнай артисттне и мастерхне.
Кода фалу, концертнай программать ушедомда инголе Культурань республиканскяй Дворецть фойеса келептьфоль декоративно-прикладной творчествань выставка. Большеигнатовскяй и Ичалковскяй райононь машты кядь ломаттне сембе ширде няфтезь эсь творческяй асушиснон. Ичалкань учительсь Пётр Першин аф васенце кизось ни сашенды выставкас эсь учениконц Вадим Пиксайкинонь мархта. Синь няфтсть шуфтста керсемать коряс мастер-класс. Шуфтонь вяшкомаснон-мезьснон ваныхне рамсезь, кода корхнихть, пси кши лаца. Тяка райононь машты кядь аватне Надежда Бочкарёва и Марина Хохлова дивандафтсть котфста, ватаста тиф някаснон, а землячкасна Светлана Ямбиковась и сонь рьвяняц Людмила Федина—этническяй стильса тиф мазоптомбяльснон мархта.
Большеигнатовскяй районцта Михаил Сонаев выставкас пачфнезе гончарнай кругонц и аф эряскодозь няфтезе пуромфненди кода машты кядензон ала сёвонь пакшсь арси мазыдонга мазы кукшеннякс. А нинге велень мастерхне тиендихть эрь-кодама паршихть, конат тяниень пингть пяк эрявихть СВО-нь зонаста цёратненди-алятненди. Выставкаса башка васта занцесть мялень кеподи арьсема мархта окопнай штатолхне, ваймонь лямбоняса эжтьф понань носокне и стак тов.
Отчётнай выступлениятнень ушедомста участникнень и сембе пуромфнень приветствовандазень МР-нь культурань, национальнай политикань и архивнай тевонь министрсь Светлана Баулина. Сон лятфтазе, што «Шумбрат, Мордовия!» фестивальсь-конкурссь кунара ни арась республиканьконди афкуксонь брендокс, коса пуроптфт регионцонк эряй нароттнень инь цебярь койсна-обуцясна, национальнай фольклорсна. Аф стак фестивальсь аф весть сатнезе Культурнай инициативань Президентскяй фондть грантонц.
Большеигнатовскяй и Ичалковскяй райоттнень концертнай программасна козятольхть рузонь и эрзянь мороса, сиде мороняса, хореографическяй постановкаса. Сценать лангс эрь лисись васьфневсь кядень кайги цяпамаса.