27 сентябрьста Саратовскяй областень Петровскяй райононь Оркина велеса ётась мокшэрзянь культурань фестиваль «Шумбрат, ялгат!» лем ала. Тя мероприятиять анокламаса и ётафтомаса аф кржа вий путсть «Шумбрат» мокшэрзянь национальнай культурань центрась, Саратовскяй областень внутренняй политикань и общественнай отношениянь министерствась, Петровскяй муниципальнай райононь администрациясь.
«Шумбрат, ялгат!» фестивалень участникокс арасть Саратовскяй областень вокальнай и хореографическяй коллектифне, а тяфта жа Мордовия Республикань, Пензенскяй, Ульяновскяй областень артисттне. Мероприятиянь инжикс арасть областень национально-культурнай организациянь руководительхне.
Инжихнень и фестивалень участникнень лемс приветствиянь валхт азсть областень внутренняй политикань и общественнай отношениянь министрть обязанностензон пяшкодиец Денис Попонов, Петровскяй райононь оцюнясь Максим Калядин, РФ-нь Федеральнай Собраниянь Федерациянь Советонь членць Петр Тултаев, Мордовия Республикань культурань, национальнай политикань и архивнай тевонь министрть полафтыец Александр Кочеваткин, мокшэрзянь народть межрегиональнай общественнай организациять ответственнай секретарец, МР-нь культурань Заслуженнай работниксь Татьяна Ширманкина, Саратовскяй областень «Шумбрат» мокшэрзянь национально-культурнай обществать вятиец Валентина Кривошеева, лиятне. Денис Попонов лувозе Саратовскяй областень губернаторть Роман Бусаргинонь приветственнай адресонц. Эсонза корхтави, што тя илась кемокснесыне ялгаксшинь сотксснень областьса эряй разнай национальностень ломаттнень ёткса, няфтьсыне козя койхнень-обуцятнень, конат макссевихть поколенияста поколенияс. Кизоста кизос тя илась максси возможность марямс мокшэрзянь народть сембе мазышинц, самобытностенц, маладомс сонь историянцты, духовнай питнишинцты. Саратовскяй областень губернаторть Благодарностень сёрмаса отмечафтольхть тя илань аноклайхне, ётафтыхне.
Фестивалень участникнень кшиса-салса, национальнай танцти ярхцамбяльса васьфтезь мокшекс и эрзякс щаф стирьхне. Культурань центрать территорияса няфтьфтольхть презентацият, декоративно-прикладной творчествань выставкат. Фестивалень участникне путсть панчфт «Воинам-землякам» памятникти, ульсть тястонь историянь музейса, коса лама азондови СВО-ть колга.
Фестивалень участникненди няфтьфтольхть мастер-класст сувениронь тиемста, ульсть спортонь и налхкомань площадкат. Кинь ульсь мялец, варжазь тяса эряй мокшэрзятнень пидефснон-паньфснон, макссть афкуксонь питне. А аделавсь «Шумбрат, ялгат!» фестивальсь оцю концертса, конань эса примась участия 22 творческяй коллектив, 300 лама ломань.
Мордовияста морась Г.И.Сураев-Королёвонь лемса «Келу» фольклорнай ансамбльсь, «Мерема» фольклорнай коллективсь, конань вятьсы Е.О.Модина.
—«Шумбрат, ялгат!» фестивальсь Саратовскяй областьса ётась пяк интереснайста,—корхтай Мордовия Республикань культурань Заслуженнай работниксь Татьяна Ширманкина.—Лац тя тевса трудендасть аф аньцек Саратовскяй областень мокшэрзятне, администрациятне. Миньге молеме илас аф шавонь кятть. Няфтеськ козя культураньконь, коеньконь-обуцяньконь. Тянкса шнама валхт азомат аф аньцек артистоньконди, но и культурань, национальнай политикань и архивнай тевонь министерствати ширеньконь кирдеманкса. Ня илатне пяк лездыхть ялгаксшиньконь кемокстамаса, коеньконь-обуцяньконь, историяньконь ванфтомаса.
Илья Вешкин.