Велеряйхненди кунара учентф событиясь ульсь 1 ноябрьста. Культурань кудть панжемонза сашендсь Мордовиянь Оцюнясь Артём Здунов. Темниковскяй райононь Сире Ошса тя зданиять строяманкса и сонь сембе эрявиксса козякофтоманксонза «Культура» нацпроектть вельде нолдаф 29 миллион цалковай.
Культурань од кудса ули 120 вастонди концертнай зал, библиотека, лувомань зал, изостудия, декоративно-прикладной искусствань студия, этнобытонь студия.
Темниковскяй районць содаф культурнай, национальнай коензон-обуцянзон мархта. Тяса лац работайхть творческяй коллектифне, лама народнай промыслань мастерда.
Зрительнай залса тя шиня марьти ашель коза прамс—эряйхне састь Мордовиянь Оцюнять мархта васедема. Артём Здунов поздравляндазень сембе пуромфнень велети тя важнай событиять мархта.
«Сире ошса эрявихть ванфтомс кунардонь цебярь койхне-обуцятне, а сембе лиясь савор-савор одкстопнема. Пара мялезон, што тяса кармайхть работама и творческяй коллектифне, и народно-художественнай промыслань мастерхне. Арьсян, штоба тяса фалу азорондаль творчествань ваймопожфсь, штоба тяза сашендольхть од ломаттне. Сюкпря Президентоньконди Владимир Владимирович Путинонди нацпроектть инкса—мзяра куд петеме, строяме и мзяра нинге тихтяма марса!»
Темниковскяй райононь оцюнясь Олег Родайкин азсь спасибамань валхт республикань руководительти аймакть лангс мялень шарфнеманкса и заботендаманкса: «Мекольдень 15 кизоть районца ашезь панчсев фкявок социальнай объект. Минь спасибатама и Президентти, и республикань Оцюняти тя казнеть инкса. Кеман, што клубсь кармай кеняртьфнемост велеряйхнень».
Культурань кудть панжемаса стане жа примасть участия вице-премьерсь Инсаф Хайруллин и культурань, национальнай политикань и архивнай тевонь министрсь Светлана Баулина.