Сире Сендруса ётафтовсть И.В.Чигодайкинскяй
I-це лувоматне

Краснослободскяй райононь Сире Сендру мокшень велеста лиссь лама содаф ломань. Нят и учёнайхть, и поэтт, и общественнай деятельхть. Велеряйхне мяляфтыхть колгаст и лемнихть содаф ломаньцнонды эрь кодама илат и мероприятият. Вов и ня шитнень лятфтазь поэтть Иван Васильевич Чигодайкинонь, кона содаф аф аньцек Мордовияса, но и марнек Россияса васендакиге «Кши и сал» поэманц мархта. 15 сентябрьста ётафтовсть Чигодайкинскяй I-це лувоматне. Тиемаснон колга мяльсь эвондась кунара ни. Васенце лувоматнень тяряфнесть лемдемс поэтть шачема шистонза 100 кизонь топодемати, кона ульсь 2020 кизоня. Аньцек пандемиять инкса тянь тиемс ашезь удала, но пара мяльсь апак каттоль и вов ётафтовсь эряфс тяни, кафта кизонь ётазь.

Илась аноклафоль и ётафтфоль «Ладяма куд» музейса, кона аф кунара велень аватнень вийса панчфоль Сире Сендруса. Ваймопожфсь тяса кодама-бди эсь лацоннель, бта инжикс сать сонцень поэтть пяли. Улема, тяфтама жа пянакуд ащесь и Чигодайкиттнень кудса. Тяфтама жа сяканяста-шаваняста сон ярхцсесь, тяфтама жа карьхть-валенцят щакшнесь пильгозонза ульцяв лисемста… Лувоматнень пингста кайгсь Иван Васильевичень вайгялецка, кона сёрматфоль 80-це кизотнень и ванфтовсь ошень раднянзон архивса. Поэтсь азондсь эсь творчестванц колга и лувозень стихотворениянзон, бта сонць васьфтезень эсь инжиензон.
И.В.Чигодайкинонь сёрматфонц лувозь инжихневок: Мордовиянь Заслуженнай поэтсь Рая Орлова, поэтсь Николай Циликин, Краснослободскяйста рузонь поэтсь Надежда Трушкина, а тяфта жа велень школань тонафнихне. Кайгсть авторхнень синцень стихотворениясна. Мордовскяй (мокшень и эрзянь) народонь Межрегиональнай общественнай организациянь исполкомонь членць, А.С.Пушкинонь лемса библиотекаса покодись В.И.Пронина сяда крхкаста азондсь биографиянц колга, няфтсь пуромфненди сёрмадыть эряфонь кинц и творчестванц квалма видео-презентация. Вера Ивановнань вельде Сире Сендрусь пшкядсь и Мокшэрзянь общественнай организацияти, и «Юрхтава» мокшавань ассоциацияти лездомс тиемс И.В. Чигодайкинонь цебярь портретонц, сяс мес велеса тячи поэтть шамаликоц ули аньцек шуваня каготкя лангса, сявок керф идень журналста. Cинь пяк надияйхть II-це лувоматнень панжемс ни цебярьста тиф афкуксонь портрет мархта.
—Мон васетькшнень Иван Васильевичень мархта аньцек весть, но тя сембе пингс лядсь мялямозон. Эста мон тонафнень Саранскяйса и тердемазь од сёрмадыень семинарс, коза кандыне эсь тяштьфозень. Мяляфтса, озась ваксозон Чигодайкин, сон эста ни сиреняль, шамасонза оцю кенярдемаль. Кода ина—васьфтезе земляконц. Эряви азомс, эстонга Краснослободскяй районцта аф пяк ламоль мокшекс сёрмадыда, а тяса вов мон петине сире поэтть мяленц. Сон тяряфнесь корхтамс мархтон, кизефнесь кати-мезе, а мон сяшкава абондонь, афи содайне кода корхтамс мархтонза, мезе отвечсемс. Визделгодонь и мезевок ашень аза,—лятфни поэтть мархта васедеманц колга Россиянь Писателень союзонь членць Николай Петрович Циликин.
Инжихнень ёткса ульсть «Литова» эрзянь авань ассоциациять председателец Р.Б.Щанкина, Ковылкинань музейть директороц А.И.Алямкин и лиятне.
Поэзиянь илась ётафтовсь мялень салайста. Седиста моли тяфтама лямбе аф васьфтят оцю ошса. Тяфтама лямбось эряй аньцек стама велетнень эса, коса мяляфтсазь сире пингонь койхнень и кородозь ванфтсазь синь. Сире Сендрусь тяфтама. Тяса лама киза ни ули авань фольклорнай народнай коллектив. Лемоц—«Мокшаваня», вятиец В.Г.Романова. Сон пара азорава лаца васьфнезень «Ладяма кудса» инжихнень. И.В.Чигодайкинонди лемтьф илать пингста аватне морасть и сире пингонь, и од морот, конатнень арьсезь-латцезь синць, и тяни пара мяльса морсесазь.
—Ня лувоматнень ули кода лемдемс республиканскяйкс, сяс мес эсост примасть участия аф аньцек Сире Сендрунь и Краснослободскяй райононь эряйхне, но и Саранскяйста и Ковылкинаста инжихне. Путтама вийхть, штоба Чигодайкинонди лемтьф илатне кармальхть ётафневома эрь кизоня и эсост участия примсель коль сяда и сяда лама ломань,—азозе В.И.Пронина.


М. СТЕШИНА.

Последние новости

«Ялгаксшинь каштазсь» пуропнезень мокшетнень и эрзятнень

13 июльста Оренбургскяй областень Абдулино ошса ульсь «Масторава» ила,...

КАТК СЕМБЕ АРЬСЕФСЬ ЁТАФТОВИ ЭРЯФС!

Вов ни мзяроце кизось мельцек пара койс коре Поволжьянь...

Лидерствань национальнай школась пуропнезень од ломаттнень

Ётай недялять, 4-5 июльста, Саранскяйса ётафтовсь «Лидерствань национальнай школа»...

В Мордовии развивается система патриотического воспитания

В рамках регионального проекта «Патриотическое воспитание граждан» национального проекта...

Бизнес-десант посетил Ромодановский и Лямбирский районы

Третий год в Мордовии в рамках национального проекта «Малое...

ПЕТРОФНЕНЬ СЕМЬЯСНА—ИНЬ ОЦЮСЬ АРГАСА

Атюрьевскяй райононь Арга велесь кирди Петрофнень вельде. Тячи тяса...

«Ялгаксшинь каштазсь» пуропнезень мокшетнень и эрзятнень

13 июльста Оренбургскяй областень Абдулино ошса ульсь «Масторава» ила, конань аноклазе и ётафтозе «Мокшэрзянь культурнай центрась». Праздниксь пуропнесь сядот мокша и эрзя, тяконь лувксса...

КАТК СЕМБЕ АРЬСЕФСЬ ЁТАФТОВИ ЭРЯФС!

Вов ни мзяроце кизось мельцек пара койс коре Поволжьянь ошнень эзга ётафневи «Волга—река мира. Диалог культур волжских народов» Международнай этнокультурнай экспедициясь-фестивальсь. Тядде сон пуропневсь...

Лидерствань национальнай школась пуропнезень од ломаттнень

Ётай недялять, 4-5 июльста, Саранскяйса ётафтовсь «Лидерствань национальнай школа» лем ала форум. Сонь аноклазе и ётафтозе «Российскяй Федерациянь финно-угорскяй нароттнень Ассоциациясна» общероссийскяй общественнай организациясь...