Сире Шайгавонь районти топодсь 97 киза. 16 августста районнай центраса ётафтовсь оцю ила, кона лемтьфоль районть шачема шинцты. Эсонза примасть участия Мордовия Республикань Оцюнясь Артём Здунов, Мордовия Республикань Государственнай Собраниять Председателец Владимир Чибиркин.
Илань ётафтома вастокс арась культурань и ваймамань центральнай парксь, коса нинге шобдава ушедсть работама творческяй коллектифне, эрь-кодама выставкатне. Тясотольхть специальнай военнай операциянь участникнень портретсна. Ламоль экспонатта Сире Шайгавонь школань музейста.
Мордовия Республикань Оцюнясь Артём Здунов башка мяль шарфтсь дрононь модельхненди, конатнень тиендьсазь иттне эсь учительснон мархта. Шабатне няфтезь, кода синь работайхть.
Сире Шайгавонь райононь эряйхнень, инжихнень 97-це шачема ши мархта лямбоста поздравляндазень республикань Оцюнясь Артём Здунов:
—Сире Шайгавонь районць эрь мордвинть седиса, ваймоса, сяс мес тяса ульсь минь Президентоньке Владимир Владимирович Путин. Тейнек пяк эрявихть национальнай койхне. И тинь няфнетяда тя тевса цебярь пример, кода синь эрявихть ванфтомс. Цебярь мастерхне ванфтсазь и макссесазь од поколенияти эсь ремесласнон. Тя оцю школа сембонди тейнек. И тянкса теенть оцю спасиба.
Республикань Оцюнясь сяда тов отмечазе, кодама оцю и эрявикс полафткст тиевсть районца мекольдень пингть. Тя китне, культурань и образованиянь учреждениятне. Пяк лац тиф райцентрань центральнай площадсь. Тясот государственностень символхне, храмсь, памятникне сятненди, кинь инкса марятама оцю гордость. Сире Шайгавонь районть Артём Здунов путозе примеркс лия райоттненди.
—Колма кизода меле Сире Шайгавонь районти топоди 100 киза,—отмечазе Артём Алексеевич.—Тя датати лама нинге эряви тиемс. Мон фалу мяльса кирдьса бизнесть, кона тинь районцонт работай, панчси покодема од вастт, панды налокт, лезды тиемс эрямань цебярь условият. Тинь лама титяда иттненди, од семьятненди. Кирдесть и сяда товга тя направлениять. Минь эздонк Мордовияса, Россияса катк ули сяда лама. Тя минь моданьке. Тейнек эсонза и эряви эрямс, козякофнемс. Тянкса эрявихть тиемс условият. И Сире Шайгавонь районца синь тиендевихть.
Башка мяль Артём Здунов шарфтсь «Ярхцама васта» Республиканскяй гастрономическяй фестивальть лангс, конанди сай кизоть топоди кемонь кизот. Койхне эрявихть ванфтомс.
А кодама ила казнефтома. Артём Здунов макссь казнет СВО-нь участникненди Н.Кашкинонди, Е.Лошкарёвонди и лиятненди.
Мордовия Республикань Государственнай Собраниять и депутатонь корпусть эзда Сире Шайгавонь райононь эряйхнень поздравляндазень МР-нь Госсобраниять Председателец Владимир Чибиркин. Сон башка мяль шарфтсь АПК-нь и лия кизефкснень лангс.
Сире Шайгавонь райононь оцюнясь Геннадий Мухин азсь благодарностень валхт МР-нь Оцюняти Артём Здуновонди, сяс мес сон фалу мяльса кирдьсыне районть прябаланзон, оцю мяль шарфни велень эряфть лангс.
Районть иласа примасть участия Краснослободскяй, Атюрьевскяй, Зубово-Полянскяй, Темниковскяй и лия райононь, Пенза аймаконь культурань работникне. Кштисть-морасть Мордовиянь госфилармониянь артисттне Нина Спиркина, Артём Мамаев, Светлана Лапицкая, «Девчата» ансамбльсь, «Арьсема» кштимань коллективсь. Илась Сире Шайгавса удалась. Сон ётась весяласта.
Илья Вешкин.