Сире Шайгавса культурань кизефксне васенце вастсот

Кода содаф, ломанти эряви ваймонь козяши. Кепотьксонди, ялга мархта корхнемась, кинос, театрав якамась. И тяса ламось ащи сянь эзда, кода эсь тевснонды малаткшнихть культураса и искусстваса покодихне. Кодама программат, выставкат синь аноклайхть, кодама илат, конкурст, лия мялень кеподи мероприятият ётафнихть. Коса-коса, а Старошайговскяй районца ня кизефксненди шарфневи оцю мяль. Тяса най «шаченды» кати-мезень одня и сяка пингть аф юксневихть минцень, мокшень коеньке-обуцяньке, ся илатне, конат молихть атянь-атяньконь, бабань-бабаньконь эзда.

Нинге сядонга вихонзафтовсть ня тефне Сире Шайгавонь Культурань центрать панжемдонза меле. Шиньберьф тя центраса лама ломаньда, конат мушендыхть эстеест ваймос коре занятият. Тяса улихть секцият, коса педагокне, мастерхне, хореографне, лия специалисттне вятихть работа иттнень мархта. Кепотьксонди, Людмила Ильинична Коркинась тонафтсыне шабатнень керамикань тевти. Синь сёвоньцта тиендихть кукшеннят, тарелкат, шаванят, штатолонь кирдемкат, эрь кодама щамбяльхть. Сембе ня работатне няфневихть выставкатнень эса, кой-конат эздост мишендевихть. Машты кядь авась лама киза покодсь Летки велеса учительницакс, тяни тонафты итть художественнай промыслань тевти. Людмила Коркинать колга содайхть аф аньцек районца, но и марнек республикаса. Нинге кодама работа мольфтеви Культурань центраса? Тянь колга азондсь Старошайговскяй райононь МБУК-ть директороц Т.Н.Горшкова.
—Мялезе азондомс «Дружба» народнай духовой оркестраньконь колга, конанди топодсь кодгемонь киза,—мярьгсь Татьяна Николаевна.—Сонь пуроптозе Сире Шайгав велень музыкальнай школань тонафтысь В.Б.Каблуков. 2003 кизоста сявомок тячиень шити молемс коллективть вятьсы Е.Ф.Атеняев. «Дружба» оркестрть кельгсазь марнек районца, сонь концертозонза сашендыхть однек-сиренек. И сембонь мяльсна васетькшнемс коллективть мархта нинге аф весть. Оркестрань колма участникненди максф «Мордовия Республикань культурань Заслуженнай работник» почётнай лем.
Аш месть корхтамс, Старошайговскяй районць культурань тефнень эса ичкози аськолдась. Шнакшневихть тястонь кштийхне-морайхне, эсь моронь латцихне. Аф аньцек эсь мокшэрзянь масторсонк, но и лия вастова, нльне омба масторса. лац содаф Сире Теризморга велень хорсь, конань репертуарса мокшень, сире пингонь моротне тячемс кеняртьфнихть ломанень седихть. Пяк ни кельговсть моротне Мордовиянь Народнай поэтти И.М.Девинонди. Илья Максимович кеподезе Сире Теризморга велеть славанц сёрматф произведениянзон мархта, хорсь—мазы мокшень моронзон мархта.
—Минценнеть вельмофтеманкса, ванфтоманкса районцонк вятеви эрь шинь работа,—сяда тов азонды Татьяна Горшкова.—Кда ни корхтамась мокшень фольклорть, моротнень колга, аш кода аф лятфтамс Лемдяй велень народнай коллективть, кона пуроптфоль колмогемоньшка кизода инголе. Кой-кона участникне кунара ни пенсиясот, но стаки морсихть, примсихть участия эрь кодама мероприятияса. Синь лац васьфтезь «Шумбрат, Мордовия» Народнай творчествань республиканскяй фестивальса. Тяни мокшаватне аноклайхть шумордамань концертти.
Лама мероприятия культурань покодихне ётафнихть стама темас, конат занцихть няевикс васта календарнай шитнень эса. Аф кунара районнай библиотекаса ётафтовсь «Ты одна такая—любимая-родная» лем ала урок, кона лемтьфоль тядятненди. Старошайговскяй СОШ-нь тонафнихне лувсть тядяти лемтьф стихотвореният, морасть морот, латцесть сценканят. Ряцок кочкафоль «Загляни в мамины глаза» книгань выставкась. Аф юксневихть районца и сире ломаттне, конат эсь пингстост сиземань аф содазь покодсть паксяса, ферматнень эса, лия вастова. Тяфтама эряфкшу ломаньда аф кржа эряй Шувары, Од Федоровка и Сире Федоровка велетнень эса. Самай теест аф кунара няфтсть концерт, морасть «Лада» народнай ансамблень участникне. Коллективть вятьсы МР-нь культурань Заслуженнай работниксь Василий Капров. Сон асу баянист, нильгемонь киза лемдсь культурати.
Татьяна Николаевна Горшковать лемс эрявихть азомс шнамань валхт. Комсь киза ни сон покоди тя системаса и тяфтапнень колга корхнихть, ломанць эсь вастсонза. Татьяна Николаевна сембоса сафтсы и сембе вастова кенерькшни. шиц ётни стане, коса эрь минутась, частсь лемневи кельгома тевонцты, ломаттнень мархта работати. Кудса сонь учсазь колма шабанза и кельгома мирдец.
—Павазу ломанян, мес сембе эряфозень лемдине культураса покодемати,—азозе меколи Татьяна Николаевна.—мон морсян мокшень морот, сиде моронят, ётафнян репетицият, арнян велева, улендян клупнень, библиотекатнень эса. Оцю спасиба теенть, мес аф юкснесамасть, сёрматтада колганк, макссетяда вийхть работамс нинге сяда лац!
Н.ЛОБАНОВ.

Последние новости

«Ялгаксшинь каштазсь» пуропнезень мокшетнень и эрзятнень

13 июльста Оренбургскяй областень Абдулино ошса ульсь «Масторава» ила,...

КАТК СЕМБЕ АРЬСЕФСЬ ЁТАФТОВИ ЭРЯФС!

Вов ни мзяроце кизось мельцек пара койс коре Поволжьянь...

Лидерствань национальнай школась пуропнезень од ломаттнень

Ётай недялять, 4-5 июльста, Саранскяйса ётафтовсь «Лидерствань национальнай школа»...

В Мордовии внедрен безбумажный электронный документооборот

В рамках регионального проекта «Цифровое государственное управление» национального проекта...

Предпринимателей Мордовии научат создавать короткие видео-«REELS»

Министерство экономики, торговли и предпринимательства РМ совместно с Центром...

В Мордовии развивается система патриотического воспитания

В рамках регионального проекта «Патриотическое воспитание граждан» национального проекта...

Бизнес-десант посетил Ромодановский и Лямбирский районы

Третий год в Мордовии в рамках национального проекта «Малое...

«Ялгаксшинь каштазсь» пуропнезень мокшетнень и эрзятнень

13 июльста Оренбургскяй областень Абдулино ошса ульсь «Масторава» ила, конань аноклазе и ётафтозе «Мокшэрзянь культурнай центрась». Праздниксь пуропнесь сядот мокша и эрзя, тяконь лувксса...

КАТК СЕМБЕ АРЬСЕФСЬ ЁТАФТОВИ ЭРЯФС!

Вов ни мзяроце кизось мельцек пара койс коре Поволжьянь ошнень эзга ётафневи «Волга—река мира. Диалог культур волжских народов» Международнай этнокультурнай экспедициясь-фестивальсь. Тядде сон пуропневсь...

Лидерствань национальнай школась пуропнезень од ломаттнень

Ётай недялять, 4-5 июльста, Саранскяйса ётафтовсь «Лидерствань национальнай школа» лем ала форум. Сонь аноклазе и ётафтозе «Российскяй Федерациянь финно-угорскяй нароттнень Ассоциациясна» общероссийскяй общественнай организациясь...