Сире Теризморгань Народнай хорсь—мокшень моронь лихтибря

Старошайговскяй райононь Сире Теризморга велень Народнай хорсь кунара ни лувондови визитнай карточкакс аф аньцек тя районти, но и марнек Мордовияти. Нльне сят, кит аф шарьхкодьсазь мокшень кяльть—рузонь ломаттне, кулемок Сире Теризморгать лемонц, сидеста мярьгондихть: «Тя самай ся велесь, коса мазы вайгяль аватне и стирьхне эряйхть? Кулендеськ мороснон, нльне валонь апак шарьхкотть синь пачкотькшнихть ваймоти».
И тя афкукс тяфта. Сире Теризморгань Народнай хорсь кеняртьфнесамазь творчестваснон мархта 1957 кизоста сявомок—самай эста тифтольхть васенце аськолксне сонь пуроптоманц коряс. Аш, ашеде эльбяде, кельгома лувихть: тядде хорть 65 кизонь юбилеец.
Хоронь васенце участникокс арасть велень стирьхне и аватне, конат кельгозь мокшэрзянь кунардонь моронь морсемаснон.
Васенце оцю славась сась Сире Теризморгань хорти 1967 кизоня, мзярда самодеятельнай артисттне няфтезь эсь пряснон Москуса съездонь Кремлёвскяй Дворецть сценанц лангса художественнай самодеятельностень Всероссийскяй смотрать заключительнай показсонза. Тяда меле и ушедсь пуромома и тиевома творческяй тя коллективть козя и мялень салай историяц.
Мокшень велеста артисттнень колга пара славась ушедсь срадома Мордовиять келес.
Аш кода аф лятфтамс лама почётнай оцю лемонь каннить, патриотть Н.М.Кадеровать. Улемок хорти вятикс, Нина Михайловна тиендезе семботь, штоба коллективсь араль сядовок содафокс. И тя теенза удалась. Сире Теризморгань хорсь аф весть сяськондсь республиканскяй, всероссийскяй, международнай фестивальхнень эса.
2015 кизоня коллективти максфоль Народнай лем. Тяда башка, тя хорсь—Мордовия Республикань Государственнай премиянь лауреат (1997 кизось), Мордовия Республикань Оцюнять премиянц лауреатоц (2009 кизось), «Родники России» Всероссийскяй фестивальть лауреатоц (Чебоксары ошсь, 2013 кизось), любительскяй коллектифнень Всероссийскяй смотраснон-конкурсснон лауреатсна (Саратов ошсь, 2019 кизось).
Коллективсь работай фольклорть мархта, лама тиенди мокшень культурать, койхнень и кяльть содафокс тиемаснон и ванфтомаснон инкса.
Тяниень пингть Сире Теризморгань Народнай хорть «арзясонза» 130 лама (!) 17-19 веконь мокшень мора, конатнень эса кемоста сюлмавсть пингть мархта лочаф народнай сюжеттне, мялень салай художественнай обрасне, лама вайгяльса козя морамась, мокшень кяльсь.
Морамада башка, хоронь участникне оцю мяльса примсихть участия мокшень кунардонь обряттнень няфтемаса, народнай праздникнень анокламаса и ётафтомаса.
Вов ни лама киза Сире Теризморгань Народнай хорть художественнай руководителец Мордовия Республикань культурань Заслуженнай работниксь, «Душа народа» премиянь лауреатсь В.П.Ямашкина.
Мокшавась Валентина Петровна Ямашкина—Сире Теризморгаса моронь искусствать ванфтыензон и эреклафтыензон эзда фкясь. Марнек эряфоц сотф ёмла родинать—родной велеть мархта. В.П.Ямашкина тиендьсы семботь, штоба Сире Теризморгань эряйхне—однек-эряфкшунек шарфнельхть башка мяль мокшень мороти, тонафнелезь фольклорть.
Тяниень пингть хорса фалу морси 15 ломань. Ламотне эздост—Национальнай культурань центрань (Сире Теризморгань центрань) сотрудникне: В.П.Ямашкина, В.В.Родькина, Н.С.Кадерова, Н.В.Виляйкина, В.И.Пивкин, Н.П.Родькин, С.А.Видясова, А.В.Чевтайкина. Теест оцю мяльса поладсь Н.И.Сокорова, кона сась работама Национальнай культурань центрав.
Оцю мяльса лятфтасаськ и сятнень лемснон, кит хорса морсихть ламос: Е.П.Ямашкина (Екатерина Петровна ашезь тушенда творческяй тя коллективста и лувондови эсонза инь ламос морсикс), Л.Ф.Ямашкина, А.И.Пьянзина, М.В.Волгапова, З.В.Милкина.
Коллективть тняра кизоста учсеф питни инжикс васьфнезь Москуса, Ульяновскяйса, Пензаса, Чувашияса, омба масторса…
Сире Теризморгань Народнай хорть моронь «лихтибряц» вов ни 65 киза шавозь шави аф аньцек мокшэрзянь масторса, но и кели и пефтома Россиять лия региононзон эса. И тяфта улеза фалу!
Т.владимирова.