«Мзярда пяк сизсян, или мезсь-бди монь аф лисенди—кадондсайне сембе тевнень и тушендан Сире Теризморгав. Тяса эрь кудса морсихть. Кулхцонкшнемок ня моротнень, мон лама кизонди пуропнян вийхть-эрьгат». Тяфта корхнесь мокшень содаф композиторсь, Россиянь и Мордовиянь искусствань Заслуженнай деятельсь Г.И.Сураев-Королёв. Георгий Иванович шачсь и кассь Старошайговскяй райононь Кулдым велеса и пяк кельгозе эсь ёмла родинанц и марнек Сире Шайгавонь аймакть. Тяса эряйхне мяляфтсазь землякснон, маряйхть инксонза оцю гордость. Лемозонза ётафнихть илат, концертт, мероприятият. Синь лувкссост народнай моронь «Велень вайгяльхть» («Сельские голоса») республиканскяй фестивальсь, кона тядде ётафтовсь колмоцеда ни.
22 майста Сире Теризморгась тага васьфнезень инжиензон народнай мороса, мокшень и эрзянь мазы щамса, гармониянь вайгяльса. Национальнай культурань центрать инголе келептьфоль полевой кухня, коса илас сафне каванявсть мокшень танцти ямса, тишень чайса. А Центрать фойесонза пуроптфоль декоративно-прикладной творчествань выставка, коса Сире Шайгав аймаконь машты кядь ломаттне няфтезь эсь тифснон.
Кода фалу, «Велень вайгяльхть» фестивальс пуромкшнесть самодеятельнай народнай хорхт, фольклорнай коллектифт, солистт-вокалистт, народнай моронь ансамбльхть. Эряви азомс, тядде тя илать географияц ламода келемсь. Эсь маштомошиснон няфтезь 16 коллектив, конат сашендсть республикань 12 районцта и Саранск ошста. Синь морасть сире пингонь мокшень и эрзянь морот, тяконь лувксса сятнень, конатненди обработка тиендсь Г.И.Сураев-Королёв. Панжезь концертнай программать Сире Теризморгань артисттне. Кядень кайги цяпамаса васьфтьфтольхть Атюрьевскяй районцта «Ялгат» коллективсь, Инсарскяй районцта «Поюня», Ковылкинаста «Ляйня», Темникавста «Лаймоня», Рузаевкаста «Марлюня», Кадошкинскяй районцта «Чивгокскя», Большеберезниковскяй районцта «Парынза» и лия фольклорнай ансамбльхне. Кода фалу, концертсь лиссь пяк лямбокс, ваймонь эждикс. Вдь тяса кайгсть мокшень и эрзянь афкуксонь вайгяльхне—фонограммафтома и «плюсовкафтома», кода морсихть кудса, семьянь, радня ломанень келеса.
Фестивальс сашендсь и «Келу» фольклорнай ансамбльсь, конань пуроптозе Г.И.Сураев-Королёв. Коллективсь кунара ни каннесы асу композиторть лемонц и ащи республиканьконди визитнай карточкакс. Ансамбльсь ульсь Георгий Ивановиченди идь лаца. Аф стак сон корхнесь: «Монь колма шабане: цёразе Геннадий, стирезе Светлана и «Келу» ансамбльсь». Эсь выступлениянц «Келусь» ушедозе «Петрунь Мишанясь» мороса, конань Г.И.Сураев-Королёв лемдезе земляконцты, Советскяй Союзонь Геройти Михаил Девятаевонди.
Фестивалень участникненди и инжихненди приветствиянь валхт азсть Старошайговскяй райононь оцюнять заместителец Наталья Жевлакова, МР-нь Культурань, национальнай политикань и архивнай тевонь министерствань отделонь начальниксь Елена Налейкина. Корхтайхне фкя мяльса азозь, што тяфтама илатне эрявихть. Синь лезнихть национальнай культурать ванфтомаса, а сяс ётафнемат сяда сиденяста. Вятезе фестивальть Национальнай культурань центрать директороц Светлана Видясова.
Народнай творчествань тя илань сембе участникне казьфтольхть дипломса и мяляфтови казнеса.
Ольга ЕВДОКИМОВА.
Фототне Николай КАРАНОВОНЬ.