6 июньцта А.С.Пушкинонь лемса Национальнай библиотекаса ётафтфоль пурокс, конань пингста казьфтольхть «2020-2021 кизонь инь цебярь книгась» республиканскяй конкурсса сяськихне. Конкурсть ётафтыец А.С.Пушкинонь лемса библиотекась МР-нь Культурань, национальнай политикань и архивнай тевонь министерствать ширень кирдеманц пингста.
Конкурсса участия примасть авторхне и издательскяй коллектифне. Ванондовсть книгатне, конат нолдафтольхть Мордовияса 2020-2021 кизотнень и конатнень обязательнай экземплярсна пачфтьфоль МР-нь Книжнай палатав тяддень 31 мартта аф сяда поздна. Книгатненди оценка макссть эксперттне и республикань эряйхне—соцсетьтнень эса онлайн-голосованияса. Сембе произведениятне сотнефт шачема-касома краеньконь—сонь историянц, культуранц, природанц, земляконьконь подвигснон мархта. Изданиятне салайхть мяль аф аньцек содержанияс, но и оформленияс коре.
Сембоц конкурсса ванфоль 130 книга. Сяськихне кочкафтольхть 13 номинацияс коре. Кепотьксонди, «Национальнай (мокшень) кяльса инь цебярь книгась» номинацияса сяськсь мокшень содаф поэтессать, МР-нь Заслуженнай поэтть Полина Алёшинать «Шачема крайнязти сюконян» стихонь сборникоц. Кой-кона книгатне лувфтольхть инь цебярькс фкя пингста несколька номинацияса. Мероприятияса примась участия МР-нь культурань, национальнай политикань и архивнай тевонь министрть васенце заместителец А.Е.Губанищев.
Сембе сяськихненди казьфтольхть диплопт и казнет.
О.ЕВДОКИМОВА.