1 декабрьста Саранск ошень округонь Культурань дворецса ётафтовсь «Сурскяй рубеж» военно-патриотическяй творчествань IV Республиканскяй фестивальть гала-концертоц.
Концертть ушедомда инголе зрительхне ванозь историческяй документонь и фотоснимкань выставкатнень, коса азондовсь «Сурскяй оборонительнай рубежть» строяманц и сонь тииензон колга.
Кода содаф, «Сурскяй оборонительнай рубежсь» ушедсь строявома 1941 кизонь 1 декабрьста. Рубежть, конань кувалмоц ульсь 80 вайгяльбе, строязь Мордовиянь 67 тёжяньда лама эряй. Нят: атят и бабат, ават, 16 кизоса цёрат и стирьхть. Синь шувсть каймоса, киркаса и ломса 40 градусонь якшапнень пингста. Но Советскяй Союзонь Верховнай командованиять приказонц синь пяшкодезь педа-пес и эсь пингстонза: 1942 кизонь 21 январьста «Сурскяй оборонительнай рубежть» строямац шумордафоль.
«Сурскяй рубеж» военно-патриотическяй творчествань Республиканскяй фестивальсь арась строительхненди эрек памятникокс. Сонь марстонь вийса арьсезь-тиезь Мордовиянь Культурань, национальнай политикань и архивнай тевонь министерствась и ветеранонь общественнай организациясь. И тянкса теест залу пуромфне азондсть оцюдонга оцю сюкпря.
Концертсь ушедсь кинофильмаста, коса историческяй реконструкциять вельде ваныхне няезь, кода строявсь «Сурскяй оборонительнай рубежсь». Саранск ошень школаса тонафнихне няфтсть театрализованнай представления.
Сяльде Мордовия Республикань Государственнай Собраниять Председателенц Владимир Чибиркинонь и депутаттнень лемста пуромфнень поздравляндазень сонь заместителец Евгений Тюрин.
—Тя фестивальсь тейнек сембонди тячи лятфнесы—историясь одукс тиендьсы сяка шарксть, кона ульсь тяда инголе. 1941 кизонь декабрьста республикань эряйхне шувсть оборонительнай рубежть эса. Тякоть тячи тисазь минь соотечественниконьке Донбасса фашисттнень-неонацисттнень эзда эсь моданьконь араламанкса. Тянь няине эсь сельмосон аф кунара, мзярда республикань Государственнай Собраниянь лия депутаттнень мархта улеме Донбасса.
Азан оцю сюкпря «Сурскяй рубеж» военно-патриотическяй творчествань фестивальть аноклаензонды-ётафтыензонды народоньконь марс пуроптоманкса. Аньцек марстонь вийса тейнек сатови Сяськомась неонацизмать лангса!—мярьгсь Евгений Павлович.
Пуромфнень патриотическяй илать мархта поздравляндазь Мордовиянь ветеранонь общественнай организациять председателец Иван Цыганок и республикань культурань, национальнай политикань и архивнай тевонь министерствань отделонь начальниксь Александр Кочеваткин.
Сяда тов илас сафненди няфтьфоль концерт. Пуромфне кулхцондсть патриотическяй морот, конатнень теест казезь республикань ветеранонь, музыкальнай училищань, средняй школань хорхне и башка морсихне, конат лиссть фестивалень финалс. Концертса тяфта жа кайгсть Великай Отечественнай войнань и тяниень пингонь патриотическяй стихт, конатнень лувозь ветераттне и школаса тонафнихне.
Владимир Владимиров.