Стай тяниень пингонь мокшень щапт

Июль ковть песта Саранскяйса С.Д.Эрьзянь лемса изобразительнай искусствань Мордовскяй республиканскяй музейть выставочнай залсонза панжевсь «ART FRESH. Национальный формат» выставкась. Кода фалу, экспозициясь козяль. Картинада башка келиста няфтьфоль декоративно-прикладной искусствась. Ламоц инжихне шарфтсть мяль тяниень пингонь мокшень и эрзянь щапнень лангс.
«Конашкава лац тифт, щалень тяфтама панар работама или ялга мархта васедемас»,—кулевсть экспозициять ваксса корхнемат. Коллекциясь афкукс салсесь мяль. Сон аноклафоль «Модный лук и стрелы» проектть видеса, конань ётафтсазь эряфс С.Д.Эрьзянь лемса музейть сотрудниконза Владимир Потанинонь благотворительнай фондонц лезксонц вельде. Корреспондентоньке васетькшнесь проектть руководителенц, декоративно-прикладной отделонь научнай сотрудникть, котфнень коряс художникть-реставраторть Анастасия Карповать мархта.

Анастасия Михайловна шачсь-кассь Саранскяйса, шумордазе художественнай школать, Ф.В.Сычковонь лемса Саранскяень художественнай училищать, «Дизайн одежды» направленияс коре Н.П.Огарёвонь лемса МГУ-нь Национальнай культурань институтть. Идькс пингстокиге кельгозе рисовандаманц, но сядонга пяк салсезе мяленц щамонь сташендомась. Студентокс улемстонза аноклакшнесь эсь коллекциянзон эса, тянемс мяляфтсы марляста тиф этническяй коллекциянц. Институтса эста тиендеви коллекциятне кондястсть аньцек подиумть ланга якамас, а од модельерть мялецоль тиемс стама щапт, конатнень улель кода каннемс стак шиня.

С.Д.Эрьзянь лемса музейса Анастасия работай 2014 кизоста сявомок.
Анастасиянь мархта корхнемста содаськ, што «Модный лук и стрелы»—тя аф фкя тяка проектсь, конань лангса тяниень пингть сон работай. Мокшавать, Наталья Челмакинать мархта вятихть нинге фкя проект, лемоц «Звуки и краски мордовского костюма».
—Анастасия Михайловна, азонтт ня кафта проекттнень колга. Мезе мяленте тиемс «Звуки и краски мордовского костюма» проектть видеса?

—Тя проектть инь оцю вешфксоц—С.Д.Эрьзянь лемса музейса декоративно-прикладной искусствань залть интерактивнай элементса пяшкодемац. Арьсеса пространствать дизайнанц. Интерактивнай оборудованиять вельде азондсаськ, кепотьксонди, кода костюмсь тиевсь, мзяра пинге тянди эрявсь, кодама пяльксова явфоль работась. Арьсян, мялень салайкс лиси аудиоспектакльсь, конань пингста экспонаттнень колга кармайхть азондома аф экскурсовоттне, а синць экспонаттне, конат бта эреклайхть. Проектть видеса тиеви тактильнай оцю книга. Инжихнень, конат сашендыхть экскурсияс, оцю мяльсна токсемс щапнень кядьса, варжамс узорть веляньбокста. Сяс арьсеме тяфтама книга, конань панжемста ули кода токамс котфть, сюреса сёрматф узорть, ваномс, кода молихть стафксне. Тяниень пингть специалисттне сюреса сёрмадыхть тя книгати образецнень эса.
Кафцьке проекттнень колга информациясь макссеви «Лаборатория традиционного искусства» сообществаса ВКонтакте социальнай сетьса.
—Мезень колга «Модный лук и стрелы» проектсь?
—«Модный лук и стрелы» проектть вельде мяленьке няфтемс, што мокшень и эрзянь щапне улендихть аф аньцек тяфтапт, конатнень тонадоме няендемс музейса. Синь ули кода тиемс тяниень пингоннекс, моднайкс и деликатнайкс. Сяс проектть васенце вешфксоц—тиемс тяниень пингонь национальнай щамонь коллекция. Проектсь ушедсь 2022 кизонь ноябрь ковста и шумордави 2024 кизонь апрельста. Ащи несколька пяльксста.
Васендакиге рамаме эрявикс оборудования и котфт-месть. Январть песта ушедсть творческяй лабораторияньке. Синь вятевсть колма направлениява. Васенцесь—сюреса сёрмадомась и ожнаняста кодамась. Тя направлениять вятезе Ольга Малаева. Омбоце направлениясь—кодамась. Сонь вятезе Людмила Лёвина. Колмоцесь—цифровой печатсь. Теенза вятикс ульсь Юлия Горюнова. Эрь направлениять коряс ётафневсь 3-4 занятия. Ульсь кода питнефтома самс сембонди, кинь мялецоль. Занятиятне ётафневсть ёткшиста, сяс ломаньда улендсь сатомшка. Сашендсть итть, од и эряфкшу ломатть. Ётафнень тяниень пингонь моделированиять коряс занятият. Мзярошка модель участникне тиендсть занятиятнень пингста. Синь работасна няфтевихть проектть итоговай выставкасонза—январьста.
Тяниень пингть Екатерина Будкинать мархта арьсетяма-статама коллекциять эса, аделсесаськ эскиснень тиемаснон. Мон тиендян мокшень щамонь тяниень пингонь коллекция, а сон—эрзянь. Сембоц мекольце выставкаса кармай тяниень пингонь эрь шинь каннеманди мокшень и эрзянь 10 щапт.
Тя проектть видеса васенцеда работатама печатнай сюреса сёрмадомать мархта. Фкя ширде тя сяда тёждя, сяс мес весть узорть рисовандасак, а сяльде ни «печатламс» сонь ули кода несколька щам лангс. Но лия ширде—сонь тиемац пяк стака—эрь стафксть эряви рисовандамс тяфта, кода кунардонь пингонь панарть лангса. Тейнек удалась, мес Саранскяйса аф кунара эвондась производитель, кона печатлай котфть лангса рисункат. Синь работайхть спортивнай щапнень мархта. Васенда теест стака ульсь печатламс котф лангса этническяй орнамент мархта рисунка. Эрявсь шарфтомс мяль семботь лангс: качествать, тюснень няфтемаснон, ваномс, кода сембось ванфтови муськомда меле.
Омбоце этапть видеса, кона ушеды сентябрьста, тиевихть колма ёмла фильмат, конатнень эса азондови кодамать, ёмла ожнаса сёрмадомать и цифровой печатть колга. Ёратама тиемс ня видеотнень тяниень пингоннекс, штоба синь салалезь, васендакиге, од ломаттнень мяльснон. Отчётнай и мекольце пяльксокс кармай выставкась, кона ётафтови январьста. Пингстонза няфтеви сембе тифоньке—тяниень пингонь мокшень и эрзянь щамонь коллекциясь. Няфтевихть ся мазоптомбяльхне, конатнень тиезь лабораториятнень пингста. Коллекциясь ляды С.Д.Эрьзянь лемса музеи.
Тя проектоньке—эсь лацонь эксперимент. Койсон, мокшень и эрзянь щамоньке козят, коряваст ули кода тиемс пяк лама коллекция. Тя ащи дизайнерть, художникть мяльснон эзда, кода синь няйсазь. Ули кода мокшень орнамент мархта рьвакс тумань платьявок стамс. Екатерина Беляева, кепотьксонди, проектоньконь видеса тиенди мокшэрзянь орнамент мархта руцят. Юрозост сявф Зубово-Полянскяй райононь сюреса сёрмадомась, но няфтьф тяниень пингоннекс.
—Аш мяленте сай пингть сташендомс тяфтама щамда сяда лама, штоба эрь ломанти улель кода рамамс?
—Тяньге колга арьсеме. Пяк стака тя тевть тиемац. Штоба стамс тя или тона модельти размернай башка ряд, эряви сиводемс стайхть, конструкторхт, технолокт.
—«ART FRESH» выставкать пингста ульсть и лия щапт, конат аф фкя лацоннет «Модный лук и стрелы» проектть коллекциянц мархта. Тя лия коллекцияце?
—Да, сай пингть арьсян тиемс нинге фкя коллекция, мзярошка платья анок ни. Проектонь коллекциять видеса оцю мяль шарфтоме койть лангс: кона вастса ащи сюреса сёрмадомась, кодама щапнень формасна. А од коллекциязе ули нинге сяда тяниень пингоннекс. Кизонь комплектса кармай улема туника, панар, платья, понкст—сембось тиеви минимализмань стильса. Ёран няфтемс сюреса сёрмадомать аф тяшкава сельмос повиста, штоба сон улель щамть лангса аньцек кода мазоптомбялень элемент.
Нинге ули мялезе тиемс коллекция иляназста. Тоса ёфси лия технологиясь. Арьсян и тялонь коллекциять колга, сонь сембода стака тиемац. Ули кода тиемс аф аньцек авань, но и идень, алянь коллекцият.
Щамонь стамась ащи несколька пяльксста. Васендакиге коллекциять лангса работай конструкторсь. Эряви арьсемс, кодама котф нолдамс тевс, кочкамс сюрет, мумс стайхть, тиемс тестовай модельхть, максомс каннемс ломаненди, штоба ваномс лац-аф канневихть, и аньцек тяда меле тиеви размернай башка ряд. Тя заняй аф фкя ков. И эряви кирдемс прясот сянь, штоба щамце мишендеволь, улель моднай ся пингть, мзярда стасак. Мялезон работамс этническяй щапнень мархта! Ёран, штоба вельдест лама ломань содафтоль культураньконь мархта.
—Арьсетяма сатфкст и учтама од коллекциятнень эса!
—Спасиба!
Оксана Белкина.

Последние новости

«Ялгаксшинь каштазсь» пуропнезень мокшетнень и эрзятнень

13 июльста Оренбургскяй областень Абдулино ошса ульсь «Масторава» ила,...

КАТК СЕМБЕ АРЬСЕФСЬ ЁТАФТОВИ ЭРЯФС!

Вов ни мзяроце кизось мельцек пара койс коре Поволжьянь...

Лидерствань национальнай школась пуропнезень од ломаттнень

Ётай недялять, 4-5 июльста, Саранскяйса ётафтовсь «Лидерствань национальнай школа»...

В Мордовии развивается система патриотического воспитания

В рамках регионального проекта «Патриотическое воспитание граждан» национального проекта...

Бизнес-десант посетил Ромодановский и Лямбирский районы

Третий год в Мордовии в рамках национального проекта «Малое...

ПЕТРОФНЕНЬ СЕМЬЯСНА—ИНЬ ОЦЮСЬ АРГАСА

Атюрьевскяй райононь Арга велесь кирди Петрофнень вельде. Тячи тяса...

«Ялгаксшинь каштазсь» пуропнезень мокшетнень и эрзятнень

13 июльста Оренбургскяй областень Абдулино ошса ульсь «Масторава» ила, конань аноклазе и ётафтозе «Мокшэрзянь культурнай центрась». Праздниксь пуропнесь сядот мокша и эрзя, тяконь лувксса...

КАТК СЕМБЕ АРЬСЕФСЬ ЁТАФТОВИ ЭРЯФС!

Вов ни мзяроце кизось мельцек пара койс коре Поволжьянь ошнень эзга ётафневи «Волга—река мира. Диалог культур волжских народов» Международнай этнокультурнай экспедициясь-фестивальсь. Тядде сон пуропневсь...

Лидерствань национальнай школась пуропнезень од ломаттнень

Ётай недялять, 4-5 июльста, Саранскяйса ётафтовсь «Лидерствань национальнай школа» лем ала форум. Сонь аноклазе и ётафтозе «Российскяй Федерациянь финно-угорскяй нароттнень Ассоциациясна» общероссийскяй общественнай организациясь...