«Странань финно-угорскяй нароттненди эряви содамс фкя-фкянь опытснон!»

—Владимир Павлович, кода тядде Чувашия Республикаса касфневихть-виияфневихть мокшэрзянь национальнай культурась, кяльхне и народоньконь национальнай самосознанияц?
—Васенцекс, койсон, тейнек эряви пачфтемс лувихненди: Чувашия Республикаса населениянь Всероссийскяй 2010 кизонь переписть итогонзон коряс, эрясь 13014 мокшэрзя. Ётай кизонь Всероссийскяй переписень итокне кармайхть содафт тяддень декабрьста. И мон надиян: ня итокнень коряс странаса мокшэрзянь народть марстонь лувксоц, кода и Чувашия Республикаса эряй мокшэрзятнень лувкссна, аф кири.
И тя надиямати ули оцю туфтал. Сяс мес мокшэрзянь общественнай организациятне и переписть анокламста, и сонь ётафтомстонза вятсть-тисть оцюдонга оцю работа мокшэрзянь народть национальнай самосознаниянц эрявикс уровеньц кеподеманкса.
Кда корхтамс Чувашия Республикань мокшэрзянь культурань центрать тя кизонь работанц колга, эста эряви азомс: работась мольфтеви районнай, региональнай и межрегиональнай уровеньца очнай и онлайн форматса. Кепотьксонди, аф кунара минь ваноськ «Эрзянь вайгяль» Республиканскяй Х и Межрегиональнай II творческяй конкурснень итогснон. «Художественнай вал», «Моронь кайгома», «Картинань сёрмады мастер», «Тейть, тядянь-алянь кяль» и фестивалень лия номинацияса пялькстсть эсь ётковаст Чувашия, Мордовия Республикань, Оренбургскяй, Пензенскяй, Самарскяй, Ульяновскяй, Саратовскяй областень мокшэрзянь иттне и од ломаттне. Марнек ульсь 300-та лама участник. И сембе синь, кода и сяськихне эрь номинацияса, работаснон инкса казьфтольхть Почётнай грамотаса и питни казнеса.
Койсон, «Эрзянь вайгяль» фестивальть лаца районнай, региональнай и межрегиональнай серьса мероприятиятне лездыхть ванфтомс и виияфтомс мокшэрзянь национальнай культурать, кяльхнень и национальнай самосознаниять.
«Эрзянь вайгяль» фестивальда башка, тяддень 21 майста Чувашия Республикань Порецкяй райононь Напольное велеса мазыста и келиста ётафтоськ «Чипайне» («Шиня») мокшэрзянь идень творчествань районнай фестивальть. Пингстонза иттне лувсть стихт и морасть морот мокшень и эрзянь кяльса, няфтсть пуромфненди мокшэрзянь кунардонь пингонь койхть-кштимат. Фестивалень сембе участникне, конатнень эзда ульсь 100 лама, тяфта жа казьфтольхть Центраньконь ширде Почётнай грамотаса и питни казнеса.
Тяфта жа аделсевихть анокламатне «Арта» («Вельмома») мокшэрзянь Народнай творчествань Межрегиональнай фестивальти. Пингстонза Чувашия, Мордовия Республикань, Нижегородскяй, Ульяновскяй, Пензенскяй и лия областень мокшэрзянь коллектифне няфтьсазь национальнай культураньконь сембе ширдень мазышинзон. Фестивальть рамкаса тяфта жа ётафтовихть национальнай промыслань и ремеслань выставкат, мастер-класст и национальнай ярхцамбялень дегустацият.
Сембось тя кармай тяддень август ковть омбоце декадастонза.
А 7 сентябрьста Чувашия Республикань мокшэрзянь национальнай культурань центрась васьфтьсы эсь 30 кизонь юбилеенц. И, конешна, тя юбилейть лемс кармай аноклаф башка мероприятия, коза тердевихть странань мокшэрзянь общественнай организациянь лидерхне и государственнай властень представительхне Россиянь ся субъекттнень эзда, коса компактнайста эряйхть мокшэрзят.
—Кодама кизефкст ёрат кеподемс тяддень «Волгась—ялгаксшинь ляй» Международнай этнокультурнай экспедицияса-фестивальса?
—Мон карман корхтама мокшэрзянь национальнай культурать, кяльхнень, койхнень-обуцятнень велеса ванфтомаснон-виияфтомаснон колга. Койсон, кда сембе мокшэрзяннесь солай-юмай велеса, ошса сон тейнек аф ванфтови.
Тянь колга мон корхтан пичедезь.
Кда сявомс кепотьксокс Чувашия Республикать, эряви азомс: велетне, коса эряйхть мокшэрзятне лия народонь представительхнень мархта, ётай веконь 90-це кизотнень сявомок няевиста шамсть. И велеса тячи пяк кржа идьта, конат тонафнесазь школаса мокшэрзянь кяльхнень, национальнай культурать и койхнень-обуцятнень.
Сяс «Волгась—ялгаксшинь ляй» Международнай этнокультурнай экспедицияса-фестивальса мон ёран кизефтемс мокшэрзянь общественнай организациянь лидерхнень, кода тянь коряс ащихть тефне синь регионцост и мезе тейнек эряви тиемс велетнень эса сембе мокшэрзяннеть ванфтоманкса и виияфтоманкса!
—Койсон, Владимир Павлович, сась пинге сядонга кемокстамс межрегиональнай соткснень мокшэрзянь общественнай организациятнень ёткса. Сембе минь лац шарьхкодьсаськ: аньцек марстонь вийса тейнек машфтовихть прябалатне. И тянь коряс тефнень инксонк кивок аф тисыне.
—Мон арьсян тяфта: ся прябалатне, конатнень колга минь корхтатама, ащихть аф аньцек мокшэрзянь, но и странань финно-угорскяй лия нароттненьге инголе. Сяс прябалань машфтомань коряс синь опытсна тяфта жа кондястель тейнековок.
И тя марстонь опытть келептеманкса, койсон, аф эряви ётафнемс кодамовок башка форупт. Сатомшка кармай, мярьктяма, «Культура» федеральнай телеканалса панжемс-нолдамс тематическяй программа. Кепотьксонди, «Россиянь финно-угорскяй нароттнень эряфсна» лем ала. И хуш ковти весть азондомс тоса странань финно-угорскяй тя или тона народть тячиень эряфонц, национальнай культуранц, кяленц, коензон-обуцянзон ванфтомаснон и виияфтомаснон колга.
Эста странань финно-угорскяй лия нароттнендивок ули кода сувафтомс эрь шинь тевозост кульф-няйф цебярь опытть!
—Владимир Павлович, удалаза арьсефонте.
—Оцю сюкпря!

В.НЕСТЕРОВ.

Последние новости

В МОРДОВИИ ЭКСПЕРТНЫЙ СОВЕТ ПРИ АТК ОЦЕНИЛ КОНТЕНТ ДЛЯ МОЛОДЕЖИ

6 февраля в Доме Республики под председательством заместителя Руководителя...

Пенсионеркась ётафтсь аф пелькс счётс 5,5 миллиотт цалковай

Кода пачфни «Стопмошенник13» телеграм-каналсь, Россиянь УМВД-нь Саранск ошень округть...

«Варяг» крейсерть подвигоц

9 февральсь—Россиять военнай историясонза мяляфтови дата. Тя шиня 1904...

Мазыхть мокшень стиреньке

Кельгома морафтыеньке! 2025 кизоня «Мокшень правда» газетась сяда тов...

Рославльскяй Краснознамённай 326-це стрелковай дивизиясь пуроптфоль Саранскяйса

Тядде васьфтьсаськ оцюдонга оцю илать—Великай Сяськомать 80 кизонь топодеманц....

Эрявикс кизефксненди—башка мяль

Ётай недялять Саранскяйса, Республикань Кудса, ётафтовсь Мордовия Республикань сисемце...

В МОРДОВИИ ЭКСПЕРТНЫЙ СОВЕТ ПРИ АТК ОЦЕНИЛ КОНТЕНТ ДЛЯ МОЛОДЕЖИ

6 февраля в Доме Республики под председательством заместителя Руководителя Администрации Главы Республики Мордовия и Правительства Республики Мордовия – руководителя Пресс-службы Главы Республики Мордовия Елены...

Пенсионеркась ётафтсь аф пелькс счётс 5,5 миллиотт цалковай

Кода пачфни «Стопмошенник13» телеграм-каналсь, Россиянь УМВД-нь Саранск ошень округть эзга 4№ полициянь отделу пшкядсь ошень 65 кизоса авась, кона пачфтсь вете тёжяньда лама цалковаенц...