СУВАСЬ СОДАФ ХУДОЖНИКНЕНЬ ЛУВКСС

Майть песта Саранскяйса, С.Д.Эрьзянь лемса изобразительнай искусствань музейть выставочнай залса, панжевсь Россиянь Заслуженнай художникть Анатолий Иванович Кияйкинонь персональнай выставкац.
«Анатолий Кияйкин. Живопись. Графика» выставкать панжезе С.Д.Эрьзянь лемса музейть директороц Людмила Нарбекова. Сонь валонзон коряс, художникть картинанза фалу кармайхть эряма странать искусстваса, сяс мес синь лемтьфт Россиять историянцты, тядянь-алянь крайти и мокшэрзянь народти, а тяфта жа Шкайти кемамати, тядяти кельгомати.
Анатолий Кияйкинонь творчестванцты оцю оценка макссть Российскяй Федерациянь сенаторсь Пётр Тултаев, Мордовиянь культурань, национальнай политикань и архивнай тевонь министрсь Светлана Баулина, Мордовиянь Оцюнять Администрациянц общественнай проекттнень коряс отделть заведующаец Ирина Городецкая, Мокшэрзянь народть Межрегиональнай общественнай организациянц председателец Юрий Мишанин и лиятне.
Сембе пуромфненди оцюдонга оцю сюкпря азсь художникть тядяц Мария Петровна Кияйкина.
Выставкась кармай работама 27 июльти молемс.
Владимир НЕСТЕРОВ.