СВЕТЛАНА БОЯРКИНА: «БИБЛИОТЕКАСЬ АФ ЛЯДОНДЫ ПИНГТЬ ЭЗДА»

Рузаевка аймаконь Трускляй мокшень велеса эряй лама пара вайме ломань, конат седикс-ваймокс тиендьсазь эсь тевснон. Синь ётксост велень библиотекать заведующаец, мокшавась Светлана Бояркина. Аф кунара мархтонза васетькшнесь минь корреспондентоньке и макссь теенза кой-кодама кизефкст.
—Светлана Павловна, мзяра киза покодят Трускляень библиотекаса?
—2008 кизоста сявомок. Тяда инголе работань рузонь кялень и литературань, мокшень кялень и мокшэрзянь литературань учителькс тяка аймаконь Левжа велеса. Кемготува киза ни «азораван» Трускляень библиотекаса. Видеста азомс, ашень арьсекшне, што тняра пингс сотневан лувомань тя кудть мархта. Но библиотекарень тевсь пяк курокста педсь седиезон и арась кельгома тевкс. Кельгса работазень, сяс мес фкя пингста мон и тонафтыян, и воспитателян, и пара ялган библиотекав сашендыхненди. 2021 кизоста сявомок покодян и Инсар-Акшина шабра велень библиотекаса.
—Мзяра книга лувондови тиньцонт?
—Трускляень библиотекаса кемгафтувошка тёжянь. Ламошкасна—литературнай произведеният и идень книгат. Тяда башка, миньцонк улихть историянь, религиянь, экономикань книгат, а стане жа периодическяй изданият—республикасонк лисенди газетат и журналхт. Инсар-Акшина велень библиотекать фондсонза лувондови кафтошка тёжянь книга.
—Кит сяда сидеста сашендыхть библиотекав?
—Лувиеньконь ламошкасна тя, конешна, школань тонафнихть. Но сашендыхть и од ломатть, и эряфкшуфт. Мекольцетне сяда сидеста сувсихть ширезонк косовок лия вастса аф ванфтови книганкса-мезенкса. Миньцонк синь васендакиге вешихть Трускляйть эвондаманц, эрь-кодама пингонь эряфонц, содаф ломанензон колга информация. Кепотьксонди, аньцек миньцонк ули кода содамс сержантть Евгений Иванович Коваленконь колга. Мокшень цёрась шачсь-кассь Красноярскяйса, меле семьясна ётась эряма Мордовияв. Одкс пингонц ётафтозе Трускляйса. Евгений Иванович военнаель. Ужяленди, пяк рана сязевсь эряфоц—комсь котува кизоса. Сон шавовсь 1995 кизоня Таджикистан и Афганистан аймакнень границаса боевой заданиянь пяшкодемста. Россиянь Президентть Указонц мархта мокшень цёрась казьф Мужествань орденца (куломда меле). И тяфтама афкуксонь геройда Трускляень модать лангса кассь пяк лама и минь старандатама ванфтомс колгаст мялямть.
Библиотекасонк ули кода мумс информация сянь колга, кода эрясь-ащесь велесь Великай Октябрьскяй революцияда инголе, Великай Отечественнай войнань кизотнень, перестройкать пингста. Ламоть тянь эзда сотцине-кочксине Трускляень сире ломаттнень мархта васьфнемста-корхнемста.
—Кода библиотекаса нолявихть тевс тяниень пингонь технологиятне?
—Библиотекась аф лядонды пингть эзда. Тячи библиотекарть работанц, кепотьксонди, аш кода арьсемс компьютерфтома. Миньцонк ётафневи илатне, пуромксне няфневихть социальнай сетьтнень эса «Трускляй велень библиотека» группасонк.
—Кодама мероприятият ётафневихть шабатнень, од ломаттнень мархта?
—Кизоньберьф эздост уленди аф кржа. Ёмлатненди ётафневихть мастер-класст, марса рисовандакшнетяма, тиенттяма поделкат-месть, налхксетяма, лувонттама ёфкст и стак тов. Аф кунара ётафтоме «Книгати омбоце эряф» воспитательнай аф оцю акция, конань вельде шабатне тонафтовсть книгань ванфтомати. Марса петфнеськ ташта, сязентьф-шовсеф книгатнень. Тяни синь нинге куватьс кармайхть служама лувихненди.
Сяда оцюфненди аноклакшнян литературнай илятть, васедемат. Пингстост лятфнесаськ поэттнень и писательхнень творчестваснон, лувондсаськ произведенияснон. Тяда башка, тонафнихнень мархта кода машттама старандатама кирдемс боецоньконь— СВО-нь участникнень ширеснон. Кепотьксонди, тяшнетяма теест сёрмат. Шабатне старандайхть кочкамс-сёрмадомс стама валхт, конат кеподьсазь цёратнень мяльснон, максыхть вийхть и надияма. Сёрматнень вельде минь няфнесаськ, што минь воиноньконь, марнек Россиять мархтотама. Арьсетяма боецоньконди шумбраши и куроконе мрдамс сяськома мархта.
—Сюкпря, Светлана Павловна, корхнеманкса!
Вера МАСКАЕВА.