Од кизоть самс лядонды ёфси кржа пингта. Анокламатне теенза молихть сембе вийса. Кудга наряжафт ни паргана кузнятне, ошень ульцятнень эса, аньцек шобдалгоды, крьвязькшнихть аф фкя тюсса палы гирляндатне. Илать учсазь сембе—и оцюфне, и ёмлатне. Эрь семьять нльне улихть эсь коенза-обуцянза Од кизоть учемста. Тяка пингть эрсь ня шитнень тиенди эсь лацонь итокт ётаф кизоти, кодамоль сон. Од кизонь карша минь васетькшнеме «Юрхтава» мокшаватнень ассоциацияснон председателенц Светлана Дорогайкинать мархта. Корхтамста Светлана Ивановна азондозе, кодамоль 2023 кизось общественнай тя организацияти, мезе удалась сатомс-тиемс и стак тов.
—Светлана Ивановна, мезьса мяляфтовсь 2023 кизось мокшаватнень ассоциацияснонды?
—«Юрхтавати», мярьголень, тяддесь арась эрекламань кизокс. Мекольдень кизотнень Ассоциациять лемоц аф пяк кулендевсь, а тяни сон тага кайгозевсь. Пяк пара мялезонк, што тядде организацияти сувасть од ломатть—кеветиешка мокшава аф аньцек Мордовияста, но и Московскяй областьста. Эвондась минцень ансамбленьке, конань стане жа лемдеськ «Юрхтавакс». Эсонза морсихть кемонь ломатть. Мялезе азомс спасибамань валхт ансамбльть руководителенцты, Мордовия Республикань Заслуженнай артисткати Любовь Князьковати, кона пяк лама вийда и пингта путни коллективти, фалу пуропнесыне мокшаватнень репетицияс, кочкси выступлениянди морот и стак тов.
Шарфтоме мяль грантовай работати. Тяштеме проект, лемоц «Юрхтавань сёкт», и кучеськ Президентскяй грантонь фондти. Проектть коряс арьсекшневи ётафтомс эрь-кодама мероприятият, конат сотфт мокшень щамть мархта. Кда сатсаськ грантть, карматама улендема райоттнень эса, коса ётафтовихть национальнай костюмть стаманц, сёрмадоманц, национальнай някань тиемать коряс мастер-класст. Синь васендакиге няфтевихть шабатненди. Кармайхть марстонь мероприятият школатнень мархта.
Тяни работатама нинге фкя проект лангса—«Иненармонь» Межрегиональнай конкурсть коряс. Тядде конкурссь ётафтфоль васенцеда и пяк тусь сембонь мяльс. Кда удалай сатомс грантть, сай кизоня ётафтсаськ мазышинь и асушинь тя илать сяда келиста.
—Кодама работа вятевсь тядде ассоциациять районнай отделениянзон мархта?
—Тянь ширде пяк шнафтомс пря аш мезьса. Ужяленди, ашезь удала улемс райоттнень эса эряй мокшаватнень ширеса. Но «Юрхтавать» тяни улихть группанза Телеграмса и ВКонтакте социальнай сетьса, фкя-фкянь мархта «корхнеманьке» мольфтеви тяса.
—Светлана Ивановна, сидеста пшкятькшнихть тейть, кода «Юрхтава» ассоциациять председателенцты, кизефкс мархта?
—Пшкядемат улендихть. Сяда сидеста синь сотфт тя или тона казнень получамаса лезксонь максомать, сёрмань анокламать мархта.
—Кодамот «Юрхтавать» планонза сай кизонди?
—Васендакиге—кемокстамс соткснень районнай отделениятнень, лия региоттнень мархта, штоба Ассоциацияньке коль касондоль. Улихть планоньке сянь коряс, штоба ётафтомс ила Тядянь шити, а стане жа отмечамс «Юрхтавать» 25 кизонь топодеманц. Юбилейсь ётась ни, но тя пингс ашезь удала лац-ряц праздновандамс сонь.
—Светлана Ивановна, эстейть кодамоль тушенды 2023 кизось?
—Аш кода мярьгомс, што кальдяволь. Лама тиф, лама сатф. Ушетфт од тефт. Главнайсь, шумбрат-тазат мала ломанне, сяс Куд нумолонь кизоть сялдомс аш кода.
—Кода Дорогайкиттнень семьяса примаф васьфнемс Од кизоть?
—Семьянь келеса. Сяда сидеста васьфнесаськ Саранскяйса, а меле ваймама шитнень ётафнесаськ велеса—Сире Сендруса. Тя тейне виень-эрьгянь пуроптома васта. Вели пуромкшнихть сембе радняньке. Курькснетяма соксса, нурдоняса, парьсетяма баняса. Од кизонь васенце шиня обязательна пицян шонгарям, цюгунняса шапама капста мархта, и блинцят, стамот, кодамот пицевсть идькс пингстон.
—Од кизонь карша примаф казендемс казнет. Тейть, Светлана Ивановна, мезсь мяльс коре—казендемс или получсемс казнет?
—Кельгса казендемазень. Лад арси седисон, мзярда няйса, што казнезе кеподезе ломанть мяленц. Казненди мзярдовок аф ужялясайне ярмаконень.
—Мезе арьселеть лувиеньконди Од кизонь карша?
—Катк себе улихть шумбрат и павазуфт! Пяшкодевост мяльсна-арьсемасна. И, конешна, штоба масторлангса улель мир!
—Спасиба.
Ольга Евдокимова.