28 мартста Саранскяйса, 26№ лицейса, ётафтовсь «Родной кялень и родной литературань инь цебярь учительсь» Всероссийскяй профессиональнай конкурсть республиканскяй (очнай) этапоц. Эсонза примасть участия заочнай этапса сяськихне—педагокне, конат тонафтсазь родной (мокшень, эрзянь) кяльть и мокшэрзянь народть культуранц, а нинге—дошкольнай образовательнай организациянь воспитательхне.
Очнай турть пингста конкурсонь участникне тисть конкурснай тяфтама заданият: няфтсть мастер-класс и ётафтсть просветительскяй мероприятия.
«Родной кялень и родной литературань инь цебярь учительсь» Всероссийскяй профессиональнай конкурсть республиканскяй этапонц очнай турсонза ульсть сяськихть и призёрхт. Сяськсть «Тавла» образованиянь центра—17№ СОШ» Саранск ошень округонь МОУ-нь эрзянь кялень учительсь Ольга Дорофеева и Старошайговскяй муниципальнай райононь «Комбинированнай видонь 2№ Старошайговскяй идень сад» МДОУ-нь воспитательсь Марина Венчакова. Мокшавась казьф вяре азф конкурсть «Лучшие практики развития родной речи детей дошкольного возраста» номинацияса сяськиень дипломса.
Поздравляндасаськ синь седи ваксста и арьсетяма сядовок оцю сатфкст! А тячи пачфттяма идень садонь воспитательть, мокшавать Марина Венчаковать колга.
Шачсь-кассь Марина Ивановна Старошайговскяй райононь Сире Шайгав велеса Якомаскиттнень семьяса, коса фалу башка мяль шарфневсь национальнайти, авань кядьтефненди. Мокшавать тядянц, мастерицать Ольга Якомаскинать лемоц содаф кода республикасонк, стане и лия региоттнень эса. И целайнек синь родсост-плямасост ламотне заняфт стамаса, сюреса, ёмла ожнаса сёрмадомаса, мокшень ташта щапненди «омбоце эряфонь» максомаса. Семботи тянди Марина Ивановна тонадсь нинге шабакс.
Школать шумордамдонза меле поступась М.Е.Евсевьевонь лемса Мордовскяй государственнай педагогическяй институту, конань шумордамдонза меле получась «Начальнай классонь учитель» специальность. И вов ни 22 киза сон—воспитатель комбинированнай видонь 2№ Старошайговскяй идень садса.
Образованиянь Мордовскяй республиканскяй институтса мокшавась ётась «Дошкольнай образованиянь педагогикась и методикась» специальностьс коре профессиональнай одукс тонафнема. Квалификациянь касфтомань курст ётни фалу. 2022 кизоня ульсь аттестация, мезьда меле теенза максфоль высшай квалификационнай категория.
Комозьда лама киза Сире Шайгавонь мокшавась работай идень садса. Иттнень мархта покодема ушедсь нинге педагогическяй институтса тонафнемста.
Мелянь сентябрьста сявомок покоди васенце младшай группать мархта, коса 15 идня.
«Идень саду сембода ёмла якайхнень мархта работама маштозь, ляпоняста. Тиема семботь иднятнень седис кинять-яннять вешеманкса и муманкса»,—мярьгсь Марина Венчакова.
Васенце младшай группати (нинге сонь лемнесазь ясельнайкс) якай кой-кона стирнятне и цёранятне лац-ряц аф маштыхть корхтама или тиендьсазь тянь пяле валняса, но мялезост тушенды, кода мархтост работай тевонь содай воспитательсь. Сельмосна палыхть, кургсна пеедихть, кядьсна анокт цяпамс… Меле, касомок, примсихть участия сембе ётафневить эса, арсихть муниципальнай, всероссийскяй и международнай конкурснень эса участникокс и сяськикс. Воспитательсь кирди кеме соткст идень саду якайхнень тядяснон-аляснон мархта, ётафни марстонь мероприятият, максси консультацият и рекомендацият, а нинге—мастер-класст и аноклакшни панжада занятият райононь педагокненди. Эсь опытонц колга пачфни муниципальнай, республиканскяй и Всероссийскяй мероприятиятнень эса.
Тняра кизоста Марина Ивановна няфтезе прянц ламоц конкурснень эса. 2017 кизоня примась участия «Воспитатель года Республики Мордовия-2017» профессиональнай педагогическяй мастерствань республиканскяй конкурсса, коса казьфоль супер-финалистонь дипломса. «Воспитатель России-2017» Всероссийскяй дистанционнай конкурсса участиянь примаманкса мокшавати максфоль грамота и медаль. сон сатозе колмоце вастть.
Тячиень героиняньке кафксть казьф педагогическяй мастерстванкса и образованияса оцю сатфксонкса—2018 и 2024 кизотнень теенза максфоль Мордовия Республикань Оцюнять Грантоц.
И вов тядде сон сяськсь нинге фкя оцю конкурсса. Кода и мезе аноклась теенза? Тянь квалма Марина Ивановна азондсь корреспондентоньконди.
Валонзон коряс, национальнай культураньке, сембе мокшэрзяннесь теенза, мокшавати, пяк мала эряфоньберьф. Няканятне-мокшаванятне, конатнень нолясыне тевс шабатнень мархта работамста, тушендыхть стирнятнень и цёранятнень мяльс. Синь оцю мяльса наряжайхть эсост, а тияк кизефнихть, кода щамть тя или тона пяльксонц лемоц. Воспитательсь азондсы эрь лемть кафксть—рузкс и мокшекс. Идень садса ули «Лихтибряня» мокшэрзянь национальнай культурань музей. Сон тиф куд потма лаца, коса ащи мокшень пянакуд, латцефт паршихть, конатнень тевс нолязь атяньке и бабаньке, щятяньке и щаваньке. Музейсь пуроптф марстонь вийса—воспитательхне, тядятне-алятне каннезь кудста, велева кочксезь сембе инь эрявиксть, а ушедозе тя тевть Марина Ивановнань ингольдень класснай руководителец Антонина Козакова, кона меле работась идень садса воспитателькс. Тяни мокшавась пенсияса, а «идец»—«Лихтибряня» музейсь эряй и содафнесыне сашендыхнень сянь мархта, кода эрясть инголи мокшетне. Музеи иднятнень сидеста вятнесыне и Марина Венчакова. Сидестонь инжихть «Лихтибряняса» лия воспитательхне и шабатне.
Оцю кенярдемакс воспитательти арси ся, мзярда мокшень семьятнень эзда шабатне содасазь мокшень кяльть, корхтайхть идень садса мокшекс.
Тянь и ламоть лиять сон нолдазе тевс «Родной кялень и родной литературань инь цебярь учительсь» профессиональнай конкурсти анокламста. Саранскяи мархтонза усксесь кудъётконь лама парши, мокшень щапт-каряпт, а ширенц кирдема и занятиясонза участиянь примама сашендсть идень садонь педагокне—воспитательхне Екатерина Бояркина, Ольга Котькина, Алина Котькина, Елена Пьянзина. А мастер-классть Марина Венчаковась ётафтозе жюрить мархта.
Марина Ивановна азонды оцю спасиба работас коре ялганзонды, сембонди, кит лездсть теенза и кирдезь инксонза мокшендаснон.
«22 киза работан цебярь коллективса, тевозень кельгса, сон мялезон. Спасиба и идень садонь заведующайти Вера Кибаковати. Сяськомазе—марстонь, марнек коллективоньконь»,—азозе сон.
Тяни мокшавась аноклай конкурсть финалонцты, кона ули тяддень сентябрьста.
Марина Венчакова, кода ни азфоль, аф аньцек оцю опыт мархта воспитатель, но и цебярь мастерица. Стай, сюреса, ёмла ожнаса сёрмады нулат, фартукт, коняфкст… Работанзон лангс ванондолеть и ванондолеть! И сембе тя мазышись няфневи фестивальхнень, илатнень эса. Кепотьксонди, «Шумбрат, Мордовия!» Народнай творчествань республиканскяй фестивальть, «Кургоня» инжиень примамань мокшэрзянь фестивальть выставкаснон эса. Меля мастерицась ульсь «МЫ ВМЕСТЕ!» национальнай культурань од ломанень Всероссийскяй фестивальса. И фалу уленди щаф мокшавань щамса.
Кудса Марина Ивановна—кельгома тядя и рьвя. Стирец, Дарья Александровна, работай медицинскяй сестракс Москувонь фкя больницяса, сонга машты сюреса сёрмадома. Мирдец, Александр Григорьевич, покоди Москуса. Цёрац, Николай, тонафни 8-це класса, сон—васенце лездысь тядянцты кудъётконь тевса.
Татьяна Альшина.