Коминь эряйхне минь радня ломаненьке, сувсихть финно-угорскяй группати. Кирдихть кеме соткст Мордовиять мархта. Сашендыхть мокшэрзянь краи экскурсияс, оцю и ёмла илатненди. Примсихть участия эрь-кодама пуромкснень, форупнень эса. И.А.Бобраков Коми Республикаса содаф писатель, журналист, краевед, ётафни ошть эзга экскурсият. Сон лац содасы Сыктывкарть историянц, мазы и мяляфтови вастонзон. Тянь колга сон сёрмады книгат, азонкшни республиканскяй изданиятнень эса, радиоса и телевиденияса.
Лац содасы Коминь крайть и «Республика» республиканскяй газетать обозревателец, Коми Республикань Заслуженнай работниксь Г.В.Соболева (Бобракова). Ня ломаттне отпускснон пингста якайхть странань ошнень эзга. Улендихть экскурсияса. А тядде арьсесть самс мокшэрзянь краи. И тя аф стак. Саранскяйть, Мордовиять колга синь шнамань лама валда кулендсть телевидениять, радиоть эзда. Лама сёрматфта, видеода мушендсть интернетста. И видекс мекольдень кизотнень республикась касы, мазоми. Строяви од оцю лама объектта, петевихть китне. А мзяра миньцонк ётафневи Россиянь чемпионатта, форумда. Сембонь лемсна афи лятфтавихть. Сяс, мзярда Бобракофне састь Саракнскяи, ашесть васькафтов, сембе тя мазышить няезь эсь сельмоса.
—Минь улеме лама республикань столицаса,—корхтайхть Игорь Алексеевич и Галина Владиславовна.—Ошне афкукс полафнесазь эсь шамаликснон. Но Саранскяйса няйфсь минь пяк дивандафтомазь. Миньге ошеньке аф кальдяв. Но Саранскяйсь, можна мярьгомс, строяф одукс. Тняра оцю и мазы здания косовок аш. Пяк дивандафтомазь Н.П.Огарёвонь лемса МГУ-сь. Сембось лац-ряц арьсеф, сембось эсь вастсонза. Сельмос пови ошть арушиц и мазышиц.
Кода приметазь Комиста саф инжиеньке, Мордовия Республикаса башка мяль шарфневи национальнай ширети. Сувсесть сувениронкса «Масторава» лавкав. Мишендемань уженясь тяфта жа дивандафтозень инжихнень. Тяса кодама аньцек книгат аш мокшень, эрзянь кяльса.
—Минь республикасонк эсь кяльсонк тняра книга костовок аф муят,—азозе Галина Владиславовна.—Мордовиясь тянь ширде ащи тейнек кепотьксокс.
Но мезсь сембода пяк монь дивандафтомань, Сыктывкаронь инжихне кунара ни ваныхть социальнай сетьтнень вельде «Мокшень правдать» мельге. Сяс, мзярда сявозь кядезост 14 августонь номероньконь, синь пяк кенярдсть. Газетась афкукс тусь мялезост, кеподи мяль.
—Мзярда минь ётаме экскурсия мархта Печатень кудть вакска,—корхтай Игорь Алексеевич,—экскурсиянь вятись башка мяль шарфтсь «Мокшень правдать» лангс. И минь пяк мяленьколь няемс газетать, кирдемс кядьсонк, сявомс мархтонк Сыктывкару.
А нинге синь пяк мяльсноль повомс Старошайговскяй райононь Сире Теризморга велень Национальнай культурань центрав. И тя мяльсновок пяшкодевсь.
Сире Теризморга велеса Коми Республикань инжихнень васьфтезень Национальнай культурань центрать оцюняц С.А.Видясова. Светлана Александровна ся ломаттнень эзда, кона кельгсы эсь шачема-касома уженянц, лац содасыне велеть историянц, коензон-обуцянзон, трудонь кельги ломанензон. Сонць пяк кельгсы эсь тядянь-алянь кяленц, тякоть вешсы эсь идензон, велеряензон, мархтонза покоди ялганзон эзда. А тяфтома тяни аш кода. Сяс и Комиста саф инжихнень мархта корхтамац лиссь тёждяста, шарьхкодевиста. Эстокиге мусь фкя кяль. И тя шарьхкотьф. Светлана Александровна азонкшни аф сурста потяф историят, а сянь колга, кодама событият ульсть Сире Теризморга велеса. Кода васьфтезь ня событиятнень велень ломаттне. А нинге тяса кородозь ванфтсазь мокшень койхнень-обуцятнень, сире пингонь щапнень-каряпнень. Лама тиихть эсь кядьса. Кона комнатати тят сува, кеподи мяль. Сембось эсь вастсонза, сембось тиф эсь кядьса. Коминь инжихне ульсть оцю и ёмла лама музейса. Но тяфтама национальнай центраса ашельхть нинге мзярдовок. Сяс аноктольхть лоткамс эрь экспонатть ваксс, лац-ряц ваномс, тиемс фотографият, максомс кизефкст. С.А.Видясова эрь кизефксть лангс макссь крхка ответт.
—Монць Комиса ётафнян экскурсият,—виденцясь И.А.Бобраков.—Но тяфтама ару вайме, панжада седи ломань, шачема краень афкуксонь патриот няян васенцеда.
Ушедсаськ Теризморгань народнай хорть эзда. Сон коса аньцек ашель, коза аньцек ашезь яка морама. Теенза содафт странань и Мордовиянь сембе площадкатне. Ламоксть ульсь омба масторса. А мзяра казнедост. Сембе синь афи лятфтавихть. А кит хорса морайхне? Велень трудонь кельги мокшават. Пцтай сембе синь заняфт кельгома и пяк эрявикс тевса Национальнай культурань центраса.
Шнамань валхт азомат досканя лангса карьксонь кодайть А.И.Цыгановать колга. Мокшень ламоц велетнень эса тя тевсь кунара ни юкстаф. Юкставоль сон и Сире Теризморгаса, кда аф Анна Ивановна. Тя смузю мокшавась сембе эсь маштомошинц макссесы оттненди. Ширде сай инжихненди няфни мастер-класст.
Карень кодамань тевса центраса заняф В.В.Шилкин. Тевсь тя од. Владимир Васильевич кярьмодсь эзонза аф кунара. И ушедсь сонь лац лисендема. Тяни кодай и оцюфненди, и ёмланятненди карьхть. Тии и эрь-кодама сувенирхт, няфни мастер-класст. Коминь инжихненди няфтезень С.А.Видясова В.Шилкинонь работанзон. Синь няендсть лама карьда лия региононь музейхнень эса, но Сире Теризморгаса синь эсь лацоннет.
Сюреса сёрмадомань тевть центраса вятьсазь Н.С.Кадерова, А.И.Цыганова, В.П.Ямашкина. Бисерть мархта покоди В.В.Родькина. Пиди-пани танцти ярхцамбяль и каванясыне инжихнень Н.И.Сокорова. Экспонаттнень мельге ваныхть М.Н.Чевтайкина и М.Ф.Атеняева. Вяре лятфтаф работать мельге ваныхть кафта методисттне А.В.Чевтайкина, Е.А.Чалдаева.
Шнамань валхт азомат В.И.Пивкинонь лемс. Сире Теризморгань Национальнай культурань центраса сон покоди кунара. Вятьсы «Лаймоня» идень ансамбльть. Шабатне сявихть кепотькс оцюфнень эзда. Наряжакшнихть мокшень щамса-карямса, якайхть морама республиканскяй концерттненди, фестивальхненди. И вестевок казнефтома аф сашендыхть.
Коми Республикань инжихнень мяльс тусь Сире Теризморга велесь. Национальнай культурань центрать ваксса ащи Мордовиянь Народнай поэтть И.М.Девинонь бюстоц. Синь лятфтазь, што писательть-фронтовикть творчестванц содасазь. Повондсть рузонь кяльс ётафтф стихонза, «Трава-мурава» («Нардише») романоц.
Сире Теризморгаса афкукс ванфтовсть мокшень койхне-обуцятне. Сире и од мокшаватне якайхть мокшень щамса, кона козя, пети мяль. А конашкава велеса кельгсазь мокшень кяльть, моротнень. Велеса аш стама куд, коса афольхть машта морама. А кда ни эрьгоди вели кодамовок лия национальностень ломань, эстокиге тонафтсазь мокшекс корхтама. Лятфтасть тяфтама история. Велень од стирсь лиссь рьвакс таджиконди. Эряма вастонди кочказь Сире Теризморгать. Ашезь кенере ётамс колмошка ков, алясь ушедсь мокшекс корхтама. А мес? Да сяс, мес фермаса рузкс кивок мархтонза корхтама ашезь карма. А кда аф содасак мокшень кяльть, ули пяк стака тиендемс эсь тевцень.
Коми Республикань журналисттне тусть Сире Теризморгаста, Мордовияста кепотьф мяльса. Кочкасть мялень салай лама материалда. Надияфтсть няйфть, кульфть колга азондомс газетаса, социальнай сетьтнень эса.
Илья Вешкин.