Апрельста Рузаевкаса, А.В.Ухтомскяень лемса Культурань центраса, ётафтовсь Мокшень и эрзянь кяльхнень Всероссийскяй шиснонды лемтьф оцю пуромкс, конань аноклазь Рузаевскяй муниципальнай райононь Образованиянь Управлениясь и «Тяштеня» идень эстетическяй воспитаниянь (национальнай культурань) центрась.
Культурань центрав сувамста сайхнень цебярь азоравакс васьфнезень «Тяштенять» директороц, лама тевса сафты мокшавась Анна Тишкина.
Центрать омбоце этажсонза, коса и ётафтовсь пуромкссь, сембонь учезень «Тяштенянь» педагогть, мокшавать, газетаньконь цебярь ялганц и кунардонь морафниенц Лариса Мироновать сюреса сёрматф работанзон выставкасна. Вакссост ульсь и сонць Лариса Ильинична. Ламотне малаткшнесть теенза, кизефнесть эряфонц, работанц колга. И асу мокшавась оцю мяльса азондсь. Газетаньконь тячиень номерсонза пачфттяма Лариса Мироновать колга миньге.
Шачемас коре сон Рузаевскяй райононь Сузгярьге мокшень велеста, коса и шумордазе школать. Семьясост ульсть колмонест: сон, сестрац Надежда и брадоц Владимир.
Лариса Ильинична шумордазе М.Е.Евсевьевонь лемса Мордовскяй государственнай педагогическяй институтонь химико-биологическяй факультетть. Заочна тонафнесь и, тяка пингть, работась лаборантокс Сузгярьгонь школаса.
«Мзярда сань работама идень саду, эсон эвондась мяль содафтомс шабатнень кодамовок одня мархта. А мес арьсефозень аф пяшкодемс мокшэрзянь культурать вельде? Максонь эстейне тяфтама кизефкс, а меле азондонь тянь колга иднятнень тядяснонды-аляснонды, пачфтень республикань Образованиянь министерствав, Мордовскяй республиканскяй Образованиянь институту. И сембе кирдезь ширезень»,—лятфни Лариса Ильинична.
Несколька кемотть кизода инголе арьсесь авторскяй программа, аралазе сонь и пяк ламос работась шабатнень мархта корязонза.
Рузаевкань 10№ комбинированнай видонь идень садса воспитателель колмогемоньда лама киза. Тевс нолязень минцень коеньконь, фольклороньконь, содафнезень стирнятнень и цёранятнень мокшэрзянь крайть историянц, культуранц, писателензон, художниконзон мархта. Шабатне оцю мяльса тонафнезь мокшень кяльста валхнень, башка валрисьмотнень. 10№ идень садса ульсь дошкольнай учрежденияса региональнай компонентть ётафтоманц коряс «Валдоня» кружок.
Идень садса тифоль «Мордовская изба» национальнай бытонь мини-музей. Тя тевса примасть участия идень саду якайхнень тядясна-алясна и дошкольнай тя учреждениянь сотрудникне: вешендезь, мушендозь сембе ся паршихнень, конат пачфнесть исяконь шить колга, макссезь теест «омбоце эряфть», кой-мезть мазопнезь сюреса сёрмадомать вельде.
Мокшень кяльти и сембе минценнети кельгомать Лариса Ильинична няфнесы эряфоньберьф, тяконь лувксса и стихотворениятнень вельде. Фкять эздост лемоц «Мокшень кяльняй».
Мокшень кяльняй,
Лямбе валняй,
Ков аф молян
Мархтон тон!
Мокшекс корхнян сембонь
мархта!
Лаказь морсян
Морот мон.
Тяни Лариса Мироновась сяда тов мольфтьсы педагогонь тевонц, аньцек тиендьсы тянь Рузаевкань «Тяштеня» центраса. Стаки работай шабатнень мархта, тонафтсыне сюреса сёрмадома, лия кядьтефненди.
Коста сявовсь эсонза тя маштомошись? Мокшавать тядяц—Зинаида Князькова—эряфоньберьф сёрмадсь сюреса. Скатертенза, тодлангаксонза, занавесканза—лангозост аньцек ванондолеть. Шачсь Зинаида Григорьевна Сузгярьгса. Сон—мокшень содаф поэтть Григорий Ельмеевонь стирец.
Стирнятне эздонза тонафнесть мокшэрзянь сюреса сёрмадомати, мазопнемок тянь мархта мокшень панархнень. Гладьса сюреса сёрмадомати Зинаида Григорьевна шарфтсь мяль меле.
Тядяснон эзда тя асусь ётась и кафта стирензонды—Надежда Русскинати и Лариса Мироновати. Велесовок ульсть Зинаида Григорьевнань учениконза. Сузгярьгонь пцтай эрь «якстерь ужесь» мазоптьфоль сюреса сёрматф нардамаса, конанди ушетксть тиезе Зинаида Князьковась. Мокшавась фалу примсесь участия ошень, республиканскяй, всероссийскяй выставкатнень и фестивальхнень эса.
Декоративно-прикладной творчествада башка, Лариса Ильиничнань тядяц, Зинаида Григорьевна, варчсезень виензон поэзиясовок. Пади, ётась тя теенза алянц, поэтть Григорий Ильичень эзда. «Кукуня» васенце стихотворенияц сувась Иван Моисеевонь «Ветер перемен» сборникозонза, кона лиссь 2008 кизоня.
Асу ломанць асу сембоса. Ламотне тяфта корхнесть Лариса Мироновать тядянц, Зинаида Князьковать, колга. Ужяленди, зрнянь кядь мокшавась тусь эряфста несколька кизода инголе, но тевонц стаки мольфтьсы стирец.
«Мастерица» творческяй объединениять занятиянзон пингста стирнятне марса педагогснон Лариса Ильиничнань мархта тонафнесазь мокшэрзянь сюреса сёрмадомать. Васенце работасна—салфеткатне.
Лариса Мироновать работанза стаки няфневихть ламоц выставкатнень эса, тяконь лувксса и «Шумбрат, Мордовия!» Народнай творчествань республиканскяй фестивальть выставкасонза. Жюрись теест максси оцю питне, меля мокшавась арась фестивалень лауреатокс.
«Тяштенянь» дополнительнай образованиянь педагогсь васьфни школаса тонафнихнень мархта, азонкшни теест коеньконь-обуцяньконь колга, няфнесыне эсь работанзон. Марстонь кяль мушенды кода иттнень, стане и оцюфнень мархта. И кеняртькшни, мзярда нинге фкя стирня тонады прязонза мокшавакс руцянь сотома, салмоксса «аськолкскянь» тиема.
Татьяна АЛЬШИНА.