Сюреть эрь «аськолкссонза»—
ваймонц лямбоц

Машты кядь мастерица, ломань, конань асуса шачемстонза казезе сонць Шкайсь. Ламотне тяфта корхнихть Зубово-Полянскяй райононь Потьма посёлкаса эряй мокшавать, сюреса и ёмла ожнаса сёрмадыть Зинаида Антоновна Спиркинать колга. И тя афкукс тяфта. Эряфоньберьф Зинаида Антоновна сюреса сёрмады мокшень панархт, пряруцят, скатертть, а нинге, мекольце кизотнень, ёмла ожнаста—Шкайнят, картинат.
И сембе тя пингть прясонза кирдьсы фкя сяка мяльть: мезе тиема, штоба афоль юма минцень сюреса сёрмадоманьке, кода ванфтомс сонь?

Шачсь-кассь мокшавась 1942 кизонь 1 февральста Торбеевскяй райононь Салазгорь велеса Феврония Антоновна и Антон Иванович Бегаефнень семьяса, коса ульсь 8 шабат. Зинаида мекольцесель эздост. Ужяль, алянцты ашезь сав няемс инь ёмла стирнянц, сяс мес Антон Иванович ашезь мрда фронтста, максозе эряфонц Родинаньконь араламанц инкса. Зинаида Антоновна эряфоньберьф лятфни алянц колга лямбе валса, хуш и содай колганза аньцек лиятнень азонтфснон коряс.
Сай пингонь мастерицась тонафнесь Салазгорь велень школаса. 9 класснень шумордамдост меле тядяц азозе, што тонафнеманц сави кадомс, сяс мес пинге работамс. И Зинаида Антоновна тусь Зубово-Полянскяй райононь Потьма вели, коса ся пингть эрясь альнякац Алексей Антонович. Ушедсь работама машина киса путеецокс. Сяда тов трудовой кинц поладозе Ковылкино-Пичкиряево строительнай участкаса бетонщицакс. Валонзон коряс, эста самай мольсь машина кить электрификацияц. Мзярда тянь коряс тефне шумордафтольхть, тя арась сембонди оцю илакс. Саранск-Москва поездсь ётась машина кить ланга аф паровозкс, а электровозкс. Вокзалса ульсь митинг. З.А.Спиркинась цебярьста работаманкса эста казьфоль Почётнай грамотаса.
Сяда тов мокшень стирсь тушендсь работама Моску шири. Покодсь Ховрино, Кубинка ошнень эса.
Кда корхтамс сюреса сёрмадомать колга, то тя тевти Зинаида Антоновна кярьмодсь нинге шабакс. Эста, кле, эрь семьяса тяфта ульсь. Стирнятне нинге ёмласта тонафтовсть авань кядьтефненди.
Мокшавань панархт Зинаида Антоновна сюреса сёрмадсь и Москуса работамстовок. Мархтонза тядяц макссесь кудста панархт. Тяда башка, тоса ётась и стамань-кроямань курст, конат пяк кондястсть сяда товолдонь эряфсонза.
Мордовияв мрдамдонза меле, Зинаида Антоновна ушедсь работама Умёт посёлкань стамань (швейнай) цехса.
А сонць коль мольфтезе сюреса сёрмадомань тевонц. Мархтонза корхнемста кизефтине, мяляфтсы-аф сон васенце сюрекинц. Мокшавась эстокиге отвечась, што тя ульсь мокшавань панаронь ожаса сёрматкссь, конанди мярьгихть шееронь ки. И тиезе сонь нинге шабакс улемстонза.
«Эста мельган ванць тядязе. Кда тя или тона сёрматксозе лисендсь аф пяк мазыста, тонафнемань кода петемс сонь»,—мярьгсь З.А.Спиркина.
Мокшень панархне фалу ульсть акша тюсоннекс. Синь сюреса сёрмадомаснон вельде мазоптомаснон лангса работама ламос. Но тя тевсь салсезе мастерицать мяленц.
Оцю и питни козяши эряфоньберьф ванфты мокшавась. Сонь ули панароц, конань 1909 кизоня сюреса сёрмадозе тядяц, Феврония Антоновна. Тядянцты эста ульсь аньцек 9 кизот. Арьседа тинць, луви ялгат, тяни тя панарти 113 киза! И сонь афкукс ули кода лемдемс семьянь историянь ванфты паршикс, рузкс азомс—реликвиякс!
1967 кизоня Зинаида Антоновна лиссь рьвакс Атюрьевскяй райононь Дмитриев Усад велень цёрати Семён Григорьевич Спиркинонди. Синь шачсть колма идьсна: стирь и кафта цёрат.
Зинаида Антоновна лама пинге работась Зубова Полянань КБО-са сташендыкс и сюреса сёрмадыкс. Савсь покодемс и лия вастса. Спиркиттнень семьясна эрясь Потьмаса. Тяни тяса эряйхть Зинаида Антоновна и цёрац Александр Семёнович семьянц мархта. Мирдец тусь эряфста несколька кизода инголе.
З.А.Спиркинать стирец, Нина Семёновна, эряй Ичалковскяй районца, нинге фкя цёрац, Владимир Семёнович—Рязаньца. Синь аф юкснесазь тядяснон, сашендыхть ширезонза. Мокшавать лама уноктонза, конат пяк кельгсазь бабаснон и щаваснон.
Аф ваномок кизонзон лангс, Зинаида Антоновна стаки сёрмады сюреса, а нинге ёмла ожнаста Шкайнят и картинат. Кядензон алда лисьф мазышить лангс аньцек ванондолеть! Тняра кизоста сюреса сёрмадсь панархт, скатертть, нардамат…
Мокшавась пяк кельгсы «Мокшень правдать», оцю мяльса сонь морафнесы. Ялгакс газетать мархта арась нинге школаса тонафнемста.
Т.АЛЬШИНА.

Последние новости

«Ялгаксшинь каштазсь» пуропнезень мокшетнень и эрзятнень

13 июльста Оренбургскяй областень Абдулино ошса ульсь «Масторава» ила,...

КАТК СЕМБЕ АРЬСЕФСЬ ЁТАФТОВИ ЭРЯФС!

Вов ни мзяроце кизось мельцек пара койс коре Поволжьянь...

Лидерствань национальнай школась пуропнезень од ломаттнень

Ётай недялять, 4-5 июльста, Саранскяйса ётафтовсь «Лидерствань национальнай школа»...

В Мордовии внедрен безбумажный электронный документооборот

В рамках регионального проекта «Цифровое государственное управление» национального проекта...

Предпринимателей Мордовии научат создавать короткие видео-«REELS»

Министерство экономики, торговли и предпринимательства РМ совместно с Центром...

В Мордовии развивается система патриотического воспитания

В рамках регионального проекта «Патриотическое воспитание граждан» национального проекта...

Бизнес-десант посетил Ромодановский и Лямбирский районы

Третий год в Мордовии в рамках национального проекта «Малое...

«Ялгаксшинь каштазсь» пуропнезень мокшетнень и эрзятнень

13 июльста Оренбургскяй областень Абдулино ошса ульсь «Масторава» ила, конань аноклазе и ётафтозе «Мокшэрзянь культурнай центрась». Праздниксь пуропнесь сядот мокша и эрзя, тяконь лувксса...

КАТК СЕМБЕ АРЬСЕФСЬ ЁТАФТОВИ ЭРЯФС!

Вов ни мзяроце кизось мельцек пара койс коре Поволжьянь ошнень эзга ётафневи «Волга—река мира. Диалог культур волжских народов» Международнай этнокультурнай экспедициясь-фестивальсь. Тядде сон пуропневсь...

Лидерствань национальнай школась пуропнезень од ломаттнень

Ётай недялять, 4-5 июльста, Саранскяйса ётафтовсь «Лидерствань национальнай школа» лем ала форум. Сонь аноклазе и ётафтозе «Российскяй Федерациянь финно-угорскяй нароттнень Ассоциациясна» общероссийскяй общественнай организациясь...