Татарстанца ётафтовсь мокшень
и эрзянь кялень семинар

Педагогонь и наставниконь кизоть мяльса кирдезь 15 мартста Татарстанонь Тетюшскяй райононь Киртели велень школаса ётафтовсь мокшень и эрзянь кялень учительхнень и воскреснай школань руководительхнень ёткса семинар. Сон лемдевсь шачема кяльхненди и культурати. Пуромксса ульсть инжихть и Мордовияста: Мордовскяй (мокшень и эрзянь) народть Межрегиональнай общественнай организациянц председателец Юрий Мишанин, Н.П.Огарёвонь лемса Мордовскяй госуниверситетонь филологическяй факультетонь деканть заместителец Надежда Кабаева, мокшень кялень учительсь Оксана Трушкова и эрзянь кялень учительсь Александр Данильчев.
Семинарса примасть участия Татарстанонь Образованиянь министерствань, Тетюшскяй райононь Образованиянь управлениянь, Татарстан Республикань Народонь ялгаксшинь кудонь сотрудникне. Семинаронь пленарнай заседанияса корхтамась мольфтевсь родной кяльхнень ванфтомаснон колга, кода тянь мархта ащихть тефне Татарстанца, кодама проектт ётафневихть эряфс.
Сяда тов инжихненди няфтьфтольхть «Бытовая культура мордвы» школань музейсь, мокшень кяльть вятеманц коряс мастер-класс, эрь кодама выставкат. Учительхне азондсть, кода ётнихть уроксна. Семинарть-васедемать шумордамста казезь участникнень, няфтсть «Язык есть исповедь народа, его душа и быт родной…» лем ала литературно-музыкальнай концерт.
«Татарстанца мокшет и эрзят эрясть фалу. Населениянь мекольце переписть коряс тяса лувондови 12 тежяньда лама мокшэрзя. Кяльхне тонафневихть колма школаса. Од ломаттнень мархта ётафнетяма мероприятият, конатнень пингста корхтатама шачема кяльхнень колга. Сюконян учительхненди, конат лама тиендихть кяльхнень ванфтоманкса»,—мярьгсь Татарстанца Мокшэрзянь автономиять руководителец Наталья Сабитова.
Мероприятиясь мялень салаель. Школась, районць лама вий путсть васедемать ётафтоманцты. Ульсть корхтамат мокшень кяльть тонафнеманц и тонафтоманц колга. Няеви, Татарстанонь оцюнятне аф кржа тиендихть сембе национальнайть ванфтоманкса.
Киртелинь школаса мокшень кялень тонафтыкс работай Галина Абраконова. Галина Васильевна февральста эсь тонафниензон мархта ульсь Н.П.Огарёвонь лемса университетса ётафтф школьнай олимпиадаса, коса сембе шабатне сатсть васенце вастт.
«Кунара мялезель повомс Киртели вели, васедемс тястонь велеряйхнень мархта, сяс мес лажадонь ся васттненди. Кеветиешка кизода тяда инголе студенттнень мархта мельцек колма кизот якаме тоза диалектологиянь экспедицияс. Пяк пара седи ломатть тостонь эряйхне! Семинарда меле ётань велеть эзга и ваныне полафткснень. Бта эсь шачема велесон улень!
Васедень школань ингольдень директорть Ольга Никушинать мархта, кона сембе виенц путозе Киртелиса мокшень кяльть тонафнеманц ушедоманцты»,—мярьгсь Н.П.Огарёвонь лемса Мордовскяй госуниверситетонь филологическяй факультетонь деканть заместителец Надежда Кабаева.
«Тяфтама васедематне пуропнесазь марс нароттнень и региоттнень. Вельдест эвондай кемама, што кяленьконь и культураньконь ули сай пингсна. Пяк пара, мзярда шабатне аф аньцек корхтайхть, но и морайхть, азондыхть стихотвореният рузкс, мокшекс, эрзякс, татаркс. Минь тянь няеськ семинарть пингста. Карматама и сяда товга работама мокшень и эрзянь кяльхнень ванфтомаснон лангса»,—мярьгсь Мордовскяй (мокшень и эрзянь) народть Межрегиональнай общественнай организациянц председателец Юрий Мишанин.
Оксана Белкина.