Рузаевскяй райононь Левжа велень мокшень стирти Татьяна Канаевати аньцек 27, а сон ни Л.П.Кирюковонь лемса музыкальнай училищань преподаватель, Мордовияса содаф баянист. Тянкса савсь ётамс кувака ки: Татьяна васенда тонафнесь Левжа велень Искусствань идень школаса, сяльде—Республиканскяй музыкальнай школаса-интернатса, сяда тов—музыкальнай училищаса, мезьда меле олимпиадань результаттнень коряс сявфоль М.И.Глинкань лемса Нижегородскяй государственнай консерваторияв. Консерваториять специалитетонц шумордамдонза меле ётась образованиянь нинге фкя куцеманя—ассистентура-стажировка. Лацонза специалистт республикасонк мумс пяк стака. Татьянань ёфси аш ётка пингоц: тонафты музыкальнай училищаса, школаса-интернатса и эсь шачема велень Культурань кудса, но сембе сяка мусь пинге васедемс и корхнемс мархтонк.
—Татьяна, мзярда и кода эряфце сотовсь музыкать мархта?
—Левжаса морайхть, улема, сембе. Семьясонк музыкась васенце вастса. Идькс пингста сявомок тядязе морсесь нюрямонь морот. Аказень мархта якаме велень музыкальнай школав, морсеме «Пайгонят» идень фольклорнай коллективса, «Ару лихтибря» Народнай ансамбльса, конань руководителец тядязе Людмила Гавриловна. Ули «Морай вайме» семейнай ансамбленьке. Эсонза морси марнек семьяньке: тядязе, алязе, аказе, дуганозе, бабазе, аказень кафта ёмла шабанза и мирдец. Морсетяма эсь ёткованк, примсетяма участия республиканскяй мероприятиятнень эса, улендеме фестивальса Ульяновскяйса, Йошкар-Оласа. 2011 кизоня Моску ошса Семьянь кизоти лемтьф иласта выступандаме Россиянь Президентть Владимир Путинонь инголе.
—Кода повоть Республиканскяй музыкальнай школав-интернату?
—Левжа велень Искусствань идень школать ашине шуморда. Учительхне азозь, што тейне эряви молемс сяда тов, касомс лия вастса. Мольсь октябрь ковсь. Тядязень мархта срхкаме Саранскяи Республиканскяй музыкальнай школав-интернату. Директорсь мярьгсь, што тядде аш кода сявомс монь тонафнема, сяс мес тонафнемань кизось ушедсь, и шабатне кочкафт. Мезе тиемс… Тейне эста ульсь 9 кизот, мялезель тонафнемс. Лездсь поступамс Пётр Николаевич Тултаев, кона эста культурань министроль. Мзярда тядязень мархта суваме кабинетозонза, мярьгсь морамс мезевок, морайне «Мокша веле» мороть. Мялезонза тусь, и тяфта октябрь ковста примамазь музыкальнай школав-интернату.
—Мес кочкайть баянть?
—Пяк кельгине морамазень. Интернату самста надиянь, карман тонафнема вокалти. Но тейне азозь, што сембе ученикне морайхть инструментса, и тейневок кочкама. Эста ашине сода, кодама инструментт улихть. Директорсь азсь мяль варжамс баянть. Сяс и кочкайне сонь. Видеста мярьгомс, васень пингть инструментсь ашезь ту мялезон: стака, аф няйсак, кода люпшнемс пунянятнень. Но вишкста тонадонь и эстокиге ушедонь примсема участия конкурснень эса.
Баянда башка маштан морама фортепианоса, гитараса и музыкальнай лия инструментса.
—Мзярда тейть рамазь васенце инструментцень?
—Мзярда ушедонь примсема участия конкурснень эса, жюрись азозе, што тейне эряви рамамс цебярь инструмент, кона лац кайголь. Тянкса туме Воронежскяй фабрикав. Тоса няфтсть баятт, кочкайне сембода оцють. Пяк дивандаме, мзярда содаськ питненц. Алязе кочкась ярмак машинанди, но мезевок аф тият—савсь рамамс стиренцты баян. Тянивок тя инструментсь пяк питни—700-800 тёжянь цалковай. Морсень мархтонза школаса-интернатса, сяльде—4 кизот училищаса, 7 кизот консерваторияса и тячемс тя инструментсь—цебярь ялгазе.
—Стака-аф ульсь поступамс консерваторияв?
—Нинге Л.П.Кирюковонь лемса музыкальнай училищаса тонафнемста якань Нижняй Новгороду олимпиадас. Тоса арань 2 степенень лауреатокс. Тя результатть коряс тейне эстокиге макссть васта консерваторияв. Сентябрьста кандыне документонень и сембе. Консерваторияса тонафнемста тяка олимпиадать коряс сатонь Президентскяй Грант. Инксонза эрь ковня пандсть цебярь стипендия.
Консерваторияв поступамс пяк стака, студенттнендивок тянь колга корхнян. Тоса аш случайнай ломатть, аньцек стамот, конат эряфснон инструментфтома аф няйсазь.
—Ашель мяльце лядомс Нижняй Новгороду?
—Ульсть тяфтама мяльхть-арьсемат. Но ваймось тердсь куду. Тясот кельгома ломанне, ули кода сиденяста мархтост няендемс. Нижняй Новгородса эрянь 7 кизот и тейне ульсь стака: сярятькстат, кодамовок прябалаце—кивок аф сай лездома.
—Меля сёксенда примать участия оцю фестивальса Ульяновскяйса. Азонтт колганза.
—7-9 октябрьста Ульяновскяйса ётафтовсь «Кайгихть Россиянь народнай инструменттне» лем ала народнай музыкань декада. Эсонза примасть участия музыкантт Поволжскяй федеральнай округонь сембе региоттнень эзда. Кучемазь няфтемс Мордовиять, Саранскяень музыкальнай училищать. Пяк пара мялезон ульсь налхкомс «Цыганскяй рапсодиять» Народнай инструментонь Ульяновскяй оркестрать мархта.
—Васенце кизось преподавателят, да нинге васенце курсонь кураторат. Кода арьсят, тонь тя или аф?
—Сембось пяк мялезон. Студенттнень мархта мушендан марстонь кяль. Сембе сашендыхть советонкса, кизефнихть, кода налхкомс тя или тона композициять. Школаса-интернатса стане жа оцю мяльса вятян занятият. Ваймама шиста якан Левжав, морсян «Ару лихтибря» коллективоньконь мархта. Мзярда тевцень кельгсак—аф ужяль максомс тянди марнек пингцень. Музыкась—тя монь эряфозе!
—Сюкпря, Татьяна! Арьсетяма тейть творческяй оцю сатфкст!
Оксана Белкина.