Теенза сюкпря азондыхть мокшэрзятне

7 ноябрьста С.Д.Эрьзянь лемса Мордовиянь изобразительнай искусствань музейса ётафтовсь научнай и поэзиянь ниле книгань презентация. Сон лемтьфоль С.Д.Эрьзянь шачема шиста 149 кизонь топодемати.
Презентацияса няфтьфтольхть республикань Заслуженнай поэтть, А.И. Полежаевонь музеень научнай сотрудникть Геннадий Гребенцовонь книганза. Эсост сон прозань и поэзиянь форматса азонды мокшэрзянь гениальнай скульпторть эряфонь и творческяй кинзон-янонзон колга.
Геннадий Гребенцов тяфта жа азондсь мероприятияс пуромфненди эсь башка ванфонзон колга, коса сон ваны С.Д.Эрьзянь творчестванц лангс. Сон тяфта жа эсь выступлениясонза китькстазе, кле: мокшэрзянь гениальнай скульпторсь эсь творчестванц вельде тиезе содафокс эсь народонц лемонц мода-масторть келеса. И тянкса скульпторти тя пингс азондыхть оцюдонга оцю сюкпря сембе мокшэрзятне.
Сяльде пуромфнень инголе оцю и крхка научнай доклад С.Д.Эрьзянь творчестванц колга тись музеень научнай сотрудниксь Наталья Осянина. Эсонза сон пачфтезе пуромфненди С.Д.Эрьзянь асушинц сембе ширде. И тяфта жа азозе теест: кле, тяфтама гениальнай ломатть эрь народса шачендыхть аньцек весть!
Тяда меле Геннадий Гребенцовонь книгань презентациять мархта лямбоста поздравляндазе республикань культурань, национальнай политикань и архивнай тевонь министрть васенце заместителец Александр Губанищев. Сон тяфта жа казезе Геннадий Гребенцовонь министерствань Почётнай Дипломса и питни казнеса.
Сяда тов мероприятияс сафнень национальнай моронь концертса кеняртьфтезь эрзянь национальнай коллектифне.
Владимир Нестеров.