Алёна, ёт мяляфтсы эсь прянц, кельгозе мораманц. Сценать лангс васенцеда лиссь кунара. Эста, кле, ёфси ёмлалень. Мзярдовок ашезь аще озадонь седихть рузонь, мокшень, казаконь, лия моротненди. Лисендсь сяськикс «Весёлые нотки» конкурсса, сатнесь Диплом «Темниковская свирель» фестивальть Гала-концертсонза. Фестивальхнень и конкурснень эса участиянь примаманкса и вастонь сатнеманкса Дипломдонза аш ни кода лама—несколька кемотть!
«Морама ушедонь 6 кизоса Темникав ошень ДК-са и ся пингста сявомок фалу примсян участия ётафневи пуромкснень, пялькстоматнень эса»,—мярьгсь Алёна Александровна.
Музыкась арась теенза кельгома тевкс, да и Шкайсь казезе стирть мазы вайгяльса. Моротнень и мораманц кельгсыне Алёна Эрякшевать тядяц. Оксана Васильевна—Донской казачка, шачсь Ростов-на-Дону ошса.
Тядят-стирьхть сидеста морсесть марса, няфнезь пряснон ламоц конкурснень эса. Весть сатозь васенце вастть «Семьясь козя талантса» конкурсса.
Семьянь азорсь, Александр Николаевич—Темниковскяй райононь Лесные Сиялы велеста мокшаля. Темникав ошса, коза ся пингти Ростов-на-Дону ошста ётась эряма Оксана Владимировна, синь и арасть содафокс, а меле пуроптсть семья.
Мрдатама Алёнать васенце выступлениянцты. Лама кизода инголе кота кизоса стирнясь-цёфкскясь няфтезе прянц районнай сценать лангса «Весёлые нотки» конкурсса. Васенце учителькс теенза тя тевса ульсь вокалть коряс педагогсь Светлана Майорова.
Сяда тов Алёнать тердезь тонафнема музыкальнай школав. Мархтонза работась фортепианоть коряс преподавательсь Светлана Пархаева. Светлана Владимировнань эзда стирнясь тонадсь эрь-кодама жанраса морама.
Меле ульсь «Задоринка» ансамбльсь, а 2015 кизоста сявомок стирнясь «Весёлые нотки» вокальнай студиянь солисткаль.
Эстраднай вокалть коряс маштомошинц, целайнек тя асувонц, Алёна Эрякшева сядовок виияфтозень Искусствань школань преподавательть Марина Доронинать мархта занятиятнень вельде.
«Шёл казак», «Васень паламась», «Зажгите свечи» и ламоц лия моротнень Алёна морсезень оцю мяльса, маштозь, ваймонь путозь, сяс синь мушендозь эрявикс «кинять-яннять» кулхцондыть седис.
«Кулелень тя или тона концертть ётафтоманц колга, получалень тердема фестивальс или конкурсс—эстокиге ушедолень аноклама, кочксень мора тематиканц мяльса кирдезь»,—лятфни сон.
И эста ни, тонафнемок Темникавонь 1№ школаса и музыкальнай школаса, Алёна арьсесь Саранскяень Л.П.Кирюковонь лемса музыкальнай училищав поступамать квалма.
Музыкальнай школаса тонафнесь фортепианоса и гитараса морама, касфнезень содамошинзон эстраднай вокалть коряс.
Творчествань «саннясь» стирть эса лама ширдень—Алёна лентанятнень эзда тиендсь панчфт, панчфонь пусмот. Пяк мазыста лисендсь!
2020 кизоня, 9-це классть шумордамдонза меле, Алёна Эрякшева пяшкодезе сянь, мезень колга арьсесь—поступась Л.П.Кирюковонь лемса музыкальнай училищань сольнай, хоровой и народнай морамань отделенияв. Морсесь «Ивушки» народнай ансамбльса, конань репертуароц козяль мокшень и эрзянь моротнень мархта.
«Примсеме участия ламоц конкурснень эса. Тияк ашине юксне и родной ошезень. Няфтине прязень «Мисс Темников» конкурсса и тейне максфоль «Мисс Очарование» лем».
Тяка кизоня шумордазе и музыкальнай школать.
2021 кизоня ушедсь морсема «Лаймоня» мокшэрзянь моронь народнай ансамбльть мархта. Руководителец—Александра Путилина.
Алёна Александровна башка мяль шарфтсь сянди, што творческяй тя коллективсь—кода фкя семья. Участниконза фкя-фкянди лездыхть, фкя-фкянь шарьхкоди ломатть. Марса кочксесть морот, кой-конатнень ётафнезь мокшень кяльс. «Лаймонять» мархта аф весть ульсь Лесное Цибаево велеса ётафтф пуромкснень эса.
2022 кизоня стирсь ётась тонафнема Н.П.Огарёвонь лемса Мордовскяй государственнай университету тяка специальностьс коре. Тияк морсесь «Ладо» ансамбльса.
Мелянь октябрьста Алёна Эрякшева сась работама Темниковскяй Культурань и Досугонь дворецу культорганизаторкс. Тевоц мялезонза. Арьсекшни сценарийхть, программат ётафневи концерттненди. Нинге сон—«Движение первых» организациять волонтёроц. Уленди республиканскяй форупнень, примси участия од ломанень проекттнень эса и вожатайхнень школаснон «Первый вожатый» проектсост.
Нинге заочнайста тонафни Темниковскяй Велень хозяйствань колледжса «Экономикась и бухгалтерскяй учётсь» специальностьс коре. Шумордазе васенце курсть.
Сонь фалу можна няемс Темниковскяй районца ётафневи концерттнень и мероприятиятнень эса. Лама одня стирсь содась «Этнокультурнай наследиясь кода од ломаттнень патриотическяйста воспитандамань средства» семинарть-практикумть ётамдонза меле.
26 апрельста Алёна Эрякшевати топодсь 15 киза, кода сон морси Темниковскяй Культурань и Досугонь дворецть сценанц лангса.
Алёна Александровна оцю спасиба азонды тядянцты. Оксана Васильевна сембоса кирнезе стиренц ширенц. А нинге, кле, сюкпря сятненди, кит верондайхть тейне, ащихть кеме нежекс.
Стирть содаса кунара. Нинге эста кизефтине, кие сон национальностьс коре. Алёна отвечась, што мокшаваня. Виде, кле, мокша аньцек алязе, но вдь и шачень Мордовиянь инь сире ошса—Темникавса.
Асу стирсь тонафни Н.П.Огарёвонь лемса Мордовскяй государственнай университетса и работай культорганизаторкс Темниковскяй Культурань и Досугонь районнай дворецса. Заняф кельгома тевонзон мархта и тя тиендьсы сонь павазукс!
Татьяна АЛЬШИНА.