«Тев» фестивальсь одукс пуропнезень машты кядь ломаттнень

Ваймама шитнень, 17-18 сентябрьста, республиканьконь столицаса ульсь оцю ила—тяса ётафтовсь «Тев» народнай промыслань и ремеслань Межрегиональнай фестивальсь. Кафта шис Саранскяи пуромкшнесь сядода лама ломань, штоба няфтемс тя или тона тевса эсь маштомошиснон. Сашендсть участникт и инжихть Поволжьянь вейхкса региоттнень эзда—Липецкяй, Оренбургскяй, Пензенскяй, Ульяновскяй, Самарскяй областтнень, Марий Эл, Удмуртия, Башкортостан, Татарстан Республикатнень, а стане жа Мордовиянь комсь кафтува муниципальнай районцта. Работась несколька творческяй площадка. Сембе синь пуроптфтольхть Мордовэкспо-центраса.

Инь келиста няфтьфоль народнай промыслань и ремеслань выставкась-ярмаркась. Сёрматф щапне, шуфтста керсеф налхкшне-кядьготне, сёвоньцта тиф вяшкоматне, исань тарадста кодаф кептернятне, оренбургскяй понань руцятне, теньгушевскяй семицветкась, урусовскяй валенцятне, Тавлань алашатне и Сире Теризморгань карьхне—сембось мусь тяса васта. Народнай умелецнень мархта тиф паршихне саласть сельмованф и дивандафтсть.

«Тев» фестивальть историяцушедовсь нинге 2007 кизоня. Эста сон васенцеда пуроптфоль «Шумбрат, Финно-угрия!» финно-угорскяйнароттнень национальнай культураснон Международнай фестивальснон пингста. Сяльде илась ётафневсь эрь кизоня вете кизот мельцек. А тоса аф фкя лацонь туфталонкса праздниксь лоткафтфоль. И вов тяни, Культурань и искусствань кизоня, сафоль мяльс эреклафтомс нинге апак юкстак традициять. Проектть арьсиец-смекаец—Мордовия Республикань Народонь ялгаксшинь кудсь. «Тев» народнай промыслань и ремеслань Межрегиональнай фестивальсь арась сяськикс Культурань российскяй фондть грантонь конкурссонза. Сон ётафтовсь эряфс «Культура» национальнай проектонь «Творческие люди» федеральнай проектть мяльса кирдезь. Ётафтыенза: Мордовия РеспубликаньКультурань, национальнай политикань и архивнай тевонь министерствась, МР-нь Народнай творчествань кудсь, Финно-угорскяй народонь культурань Поволжскяй центрась.

Выставкать ванома сафнень ёткста, улема, кивок ашезь ёта вакска Ковылкинскяй райононь Сомай велеста Раиса Васильевна Кубасовать стаф-сёрматф щамонзон, мокшекс наряжаф няканзон вакска. Ванондозь, кизефнесть, кой-кит рамасть някат казненди ялгаснонды, радня ломаньцнонды. Стамань-сёрмадомань тевса мокшавась заняф кемонь кизот ни. Марнек мокшень нарядть, панарста сявомок петьксненди молемс, тиендьсы эсь кядьсонза. А нинге сон котци ёмла ожнаняста крганят и лия мазоптомбяльхть.
Декоративно-прикладной творчествань мастерсь В.Ю.Туртыгин сашендсь фестивальс Самарскяй областьста. Владимир Юрьевич тиенди сёвоньцта кядьгонят, вяшкомат и аф оцю налхкшкат. Колмогемоньшка кизода инголе алясь содафтсь гончарнай тевть мархта и ся пингста сон арась теенза и работакс, и седиень озафтома вастокс. В.Ю.Туртыгин няфнесыне эсь тифксонзон ламоц выставкатнень эса аф аньцек эсь странасонк, но и омба масторсовок. Сонь работанза, кепотьксонди, улендсть мянь Италияса, Вяшкомань музейса.
Марий Эл Республикаста котф лангс сёрмадысь Ирина Валерьевна Чугунова ширезонк сашендсь васенцеда. Выставкаса-ярмаркаса сон няфтезень марийскяй национальнай щапнень, конатнень стазень и сёрмадозень сонць. Синь, ня щапне, эряви азомс, кой-конашкада шарфтыхть мокшэрзяннетнень лангс. Ирина Валерьевна азозе: фкя тяфтама нарядть анокламанкса эрявксни пялешка киза, тя кда работамс лангсонза эрь шиня.
Казань ошста мастерицась Е.В.Кариева шарфтсь эсь лангозонза мяль няканзон-оберегонзон, а Пензаста художницась Г.М.Михотина—шуфтста тиф и мазоптьф матрёшканзон, самоваронзон и куцювонзон мархта.
Эряви азомс, выставкаса ульсь кода аф аньцек ваномс мастерхнень работаснон, но и варжамс эсь вийхнень синь тиемасост. Мастер-класснень эса примасть участия пяк ламотне.
«Тев» народнай промыслань и ремеслань Межрегиональнай илать пингста весяласта ётась «Поёт село родное» велень фольклорнай коллектифнень фестивальсна-конкурссна, коса пряснон няфтезь республикань муниципальнай райононь самодеятельнай арти-
сттне. Кой-кит ваныхнень эзда кштисть-морасть сценать лангс лисихнень мархта ряцок.
Няфтьфоль национальнай кухняське—мокшень и эрзянь ярхцамбяльхнень ульсь кода варжамс «Цёмарат» презентациять пингста.
Сембонь мяльс тусь «Национальнай костюмсь подиум лангса» конкурссь-дефилесь. Няфтьфтольхть кода сире пингонь, стане и тяниень пингонь стилизованнай щапне. Васенце вастть конкурсса сатозе Старошайговскяй райононь Сире Теризморга велень мокшень традиционнай нарядсь.
Омбоце шиня фестивалень площадкать лангса кели ки максфоль народнай налхксематненди.
«Тев» Межрегиональнай илань участникненди и инжихненди пара валонь азома сашендсь МР-нь Правительствать Председателенц заместителец Галина Лотванова. Сон азозе, што народнай промыслатне и ремеслатне—тя минь историяньке, кона эряви кородозь ванфнемс и пачфнемс од поколениятненди. «Важна мяляфтомс наследияньконь колга, вдь Россиясь—лама национальностень оцюдонга оцю страна, коса эрь народсь козя эсь культуранц, коензон-обуцянзон мархта»,—мярьгсь Галина Алексеевна. Сон азозе: тя кизоста сявомок «Тев» фестивальсь кармай ётафневома эрь кизоня.


О.Евдокимова.

Последние новости

В рамках нацпроекта самозанятых Мордовии бесплатно научат nail-мастерству

Министерство экономики, торговли и предпринимательства РМ совместно с Центром...

В селе Константиновка Ромодановского района ремонтируют дорогу

В Мордовии в рамках национального проекта «Безопасные качественные дороги»...

«Ялгаксшинь каштазсь» пуропнезень мокшетнень и эрзятнень

13 июльста Оренбургскяй областень Абдулино ошса ульсь «Масторава» ила,...

КАТК СЕМБЕ АРЬСЕФСЬ ЁТАФТОВИ ЭРЯФС!

Вов ни мзяроце кизось мельцек пара койс коре Поволжьянь...

Лидерствань национальнай школась пуропнезень од ломаттнень

Ётай недялять, 4-5 июльста, Саранскяйса ётафтовсь «Лидерствань национальнай школа»...

Национальный проект способствует развитию предпринимательской деятельности в Мордовии

Министерство экономики, торговли и предпринимательства РМ совместно с Центром...

В Мордовии строятся социальные учреждения

В рамках федерального проекта «Старшее поколение» национального проекта «Демография»...

В рамках нацпроекта самозанятых Мордовии бесплатно научат nail-мастерству

Министерство экономики, торговли и предпринимательства РМ совместно с Центром «Мой бизнес» оказываетпомощь предпринимателям Мордовии, предоставляя различные меры государственной поддержки бизнесу республики. Так, в рамках национального...

В селе Константиновка Ромодановского района ремонтируют дорогу

В Мордовии в рамках национального проекта «Безопасные качественные дороги» ведется капитальный ремонт автодороги «г. Саранск – р.п. Ромоданова – с. Большое Игнатово» - с....

«Ялгаксшинь каштазсь» пуропнезень мокшетнень и эрзятнень

13 июльста Оренбургскяй областень Абдулино ошса ульсь «Масторава» ила, конань аноклазе и ётафтозе «Мокшэрзянь культурнай центрась». Праздниксь пуропнесь сядот мокша и эрзя, тяконь лувксса...