Мокшавась Вера Михайловна ЕРМАКОВА Саранскяйса Госавтоинспекцияса работась 18 киза. 2020 кизонь январьста сявомок арась УГИБДД-нь Ветеранонь советти председателькс. Мзярда тердезь тя вастти работама, Вера Михайловна ламос ашезь арьсекшне: эсь сотрудниконзон кельгсыне, тевда аф пели. Тяниень пингть организациясь аноклай примамс участия Президентскяй грантонь фондть конкурссонза. В.М.Ермаковась кунара арьсекшни пуроптомс МВД-нь ветераттнень мархта «Ветераны поют душой» патриотическяй моронь ансамбль. Кда проектсь сяськи, октябрь ковста УГИБДД-нь Ветеранонь советсь ушеды якама Мордовиянь райоттнень ланга. Тя проектти сувайхть аф аньцек концертт, но и иттнень мархта васедемат и корхнемат. «Социальнай тя проектса ули лама пуромкста, конат водендафт фкяти—виияфтомс од поколениять ваймоса Родинати кельгомать, патриотизмать,—мярьгсь Вера Михайловна.—Школаса тонафнихненди, МВД-нь ветераттнень унокснонды, «пси точкатнень эса» МВД-нь шавф сотрудникнень идьснонды азонттама работаньконь, Отечествань аралайхнень тевснон колга».
Госавтоинспекциянь Ветеранонь советсь тевфтома аф ащекшни. Примси участия ламоц пуромкснень эса. Ветераттне пуропнихть-няфнихть концертт, васедемат, спортивнай мероприятият. Оцю мяль шарфнихть ся ветеран ялгаснонды, конат стакаста сярядихть, макссихть теест материальнай лезкс. Активнайста вятеви «Ветераны УГИБДД МВД по РМ» ВКонтакте соцсетьса страницась.
«ГАИ-са ули пяк цебярь музей, лемоц «История ГАИ ГИБДД». Сонь мзярошка кизода инголе марстонь вийса кочказь ся ломаттне, конат тяни Ветеранскяй организациясонк. Лездсть тя тевса Саранскяень и районнай госавтоинспекциянь сотрудникне: кие мотоцикл усксь, кие шинель, кие частонзон, кие фотографият, кие омба масторонь машинань номерхт»,—мярьгсь Вера Михайловна.
В.М.Ермакова шачемас коре Атюрьевскяй райононь Атерь велеста. Школаса тонафнемда меле поступась Зубово-Полянскяй педагогическяй колледжу. Сяда тов работама сась эсь районозонза, васенда—Кяшал вели, сяльде—Атери ёмла классонь учителькс. Вера Михайловна—ломанць творческяй. Нинге шабакс пингстокиге фалу няевсь сценать лангса. Шять, тянкса и тердезь Атюрьевскяй райононь Культурань кудти директоркс. Пингстонза панжевсь ДК-ть од зданияц. Мзярошка кизода меле уликс туфталонкса Вера Михайловна кафта шабанзон мархта тусь Саранскяи. Тясовок мокшавась ашезе када творческяй направлениять: работась «Строитель», «Резинотехника» Культурань куттнень эса, школаса.
«Ульсь оцю мялезе—якамс полициянь или военнай формаса. Пяк мялезонотольхть формаса ломаттне. И вов весть тердемазь Госавтоинспекцияв секретарькс, делопроизводителькс. Конешна, эстокиге максонь согласия. 18 киза заняфолень тя тевса»,—лятфни В.М.Ермакова.
Вера Михайловна виденцясь, што аф тёждя ульсь творческяй профессиять эзда ётамс тяфтама тевти, но сон ломанць исполнительнай, кельгсы сембоса порядкать.
«Сембода цебярсь профессиязень эса—ломаттне. Сембе, кит работасть Госавтоинспекцияса пингстон, тяни ветеранскяй организациясот. Эста улеме кода оцю семья, семьякс лядоме тянивок. 18 кизоста тейне сашендсь лотаттне эрь кодама кизефкс мархта, пяк мялезон ульсь лезнемс теест. Госавтоинспекциясь—тя тяфтама организация, коза ломанць сай прябаланц мархта. Сяс эряви пара ваймоса кулхцондомс сонь, тяряфтомс лездомс. Профессиясонк васенце вастса—улемс эсь тевонь содай и пара вайме ломанькс»,—мярьгсь В.М.Ермакова.
Вера Михайловна тевфтома ащекшнеманц аф кельгсы. Мзярда эвондай ётка пингоц, ётафни эрь кодама илат, свадьбат, юбилейхть, морси сонць. Ветеранскяй организациять мархта якайхть театрав, концертс. Спортть колгавок аф юксни. Тялонда Светотехстроень паркса арни соксса.
О.БЕЛКИНА.