Тольятти ошса пуроптф творческяй од коллектив

Мокшетне и эрзятне эряйхть аф аньцек Мордовияса. Минь народоньке сратф марнек Россиять келес. И мезсь касфни мяль, синь аф юкснесазь, кородозь ванфнесазь тядянь-алянь кяльснон, койснон-обуцяснон, культураснон.

Самарскяй областень Тольятти ошса мокшеда и эрзяда лама. 2010 кизонь переписть даннаензон коряс, тяса эряй кяльс коре 12356 радняньке. Тячи ошса покоди Мордовскяй культурнай центра, конань руководителец мокшалясь Ю.М.Дёмкин. 2001 кизоня тяса пуроптфоль «Лайме порась» творческяй коллективсь. Сон кеняртьфнезень кулхцондыхнень 20 киза. Эзонза сувси аватне морсекшнесть эрь кодама илатнень, фестивальхнень, мероприятиятнень эса кода эсь областьсост, стане и лия регионцовок. Аф весть улендсть Мордовияса. 2016 кизоня «Лайме порав» сась Вера Ивановна Хошевась. Авась лемнесы прянц мордовкакс. сонь тядяц—эрзява, аляц—мокша. Синь шачемас коре тястоконнеть, Самара аймаконь мокшень и эрзянь сире велетнень эзда. Вера Ивановна шачсь Самараса. Мзярда теенза 8 кизотольхть, семьясна ётась эряма Тольяттив. Марнек эряфоц Вера Ивановнань ётась ошса, а сяс сон аф корхтай аф эрзякс, аф мокшекс. Аф ламода шарьхкодьсыне кафцьке кяльхнень, вдь идькс пингстонза сембе каникуланзон ётафнезень велеса бабанц и щаванц ширеса. Тяда инголе 7 кизот морсекшнесь рузонь народнай хорса, хуш музыкальнай образованияц сонь кодамовок аш, авась тонафнесь и лама киза покодсь аванди щамонь стайкс. Мокшень и эрзянь моротне, конатнень В.И.Хошевась тонадозень «Лайме пораса», макссть теенза од вийхть и эрьгат.
2016 кизоня, мзярда Хошевась сась коллетивти, тяса 10 ломаттельхть. Пингсь мольсь. Кие-бди тусь эряфста, кие-бди мусь эстеенза лия тев. А нинге пандемиять сюнеда синь 2 кизот ашесть лисенде сцена лангс. Коллективсь срадсь, Вера Ивановна лядсь ськамонза. Аньцек авась ашезень нолда кядензон.
—Минь концертозонк фалу сашендоль лама ломаньда. Ваныхне морсесть мархтонк, цяпасть тейнек, учендозь сцена лангс лисеманьконь фестивальхнень пингста. Мокшэрзянь коллективсь ошеньконди, ломаненьконди пяк эряви. А сяс прясон шачсь мяль пуроптомс лия ансамбль. Лемдеськ сонь «Кайги вайгель». Шачема шикс теенза ладяськ 30 сентябрть. Од коллективса ломаньда нинге аф пяк лама. Минь тернетяма-кочксетяма морайхть, кштийхть, музыкантт, сембонь, кинь ули мялец морсемс сире и тяниень пингонь морот мокшень, эрзянь и рузонь кяльса. Репертуароньконь кочксесаськ мокшэрзянь народнай творчествати лемтьф книгатнень эзда, а нинге интернетста. Кда лиси стане, што муви минцень автороньке, соньге моронзон карматама пара мяльса морсемост,—кепотьф мяльса азонды Вера Ивановна.
Од коллективти руководителекс арась Р.К.Щедринонь лемса Тольяттинь искусствань колледжень 3-це курсонь студенткась Мария Панина. Сонь аляц мокша, Мордовияста. Стирнясь кассь Вера Ивановнань сельминголе, синь аф весть морсекшнесть марса «Лайме порать» мархта. И вов тяни поладсазь тя тевть сяда тов.
Одс пуроптф коллективть ули ни баянистоцка. Тя мокшалясь Анатолий Алексеевич Тюркин. Сонга шачемас коре Мордовияста. Лац корхтай мокшекс. Мзярда-бди аделазе Л.П.Кирюковонь лемса музыкальнай училищать, аньцек эряфсь стане шарсь, ашезь сав покодемс специальностьс коре. А кяденза ашезь юкста баянть. Тяни сон тонафнесы коллективть репертуаронц. Синь марса ни лисендсть сцена лангс Народнай единствань шити лемтьф мероприятиять пингста.
Од коллективсь пуромкшни «Автоград» Тольяттинь ДК-са. Синь ули эрявикс сембе аппаратурасна, инструментсна, конань несколька кизода инголе рамазень тястоконь Мордовскяй культурнай центрась. Улихть мокшень и эрзянь щамсновок. Синь стазь миньцонок, Саранскяйса.
Вера Ивановна Хошевась од коллетивса лувондови руководительти организационнай кизефкснень коряс заместителькс. Тяда башка, авась сатомшка сидеста васетькшни Тольяттинь школьникнень мархта библиотекаса-коса. Сон содафнесыне стирнятнень и цёранятнень мокшэрзянь ёфкснень, моротнень и культурать мархта. Вяти «Мокшанское и эрзянское творчество в Тольятти» страница «ВКонтакте» социальнай сетьса. Семботи мушенды вийхть и пинге. Авать валонзон коряс, ня вийхнень теенза макссесазь мокшэрзянь юронза, конатнень мархта соткснень сон цють ашезень юмафта, но эсь пингстонза музень и кемокстазень.
М. СТЕШИНА.

Последние новости

Рационализаторы Мордовии могут принять участие в образовательной программе

Минэкономразвития России совместно с АНО «Агентство развития профессионального мастерства...

Благодаря нацпроекту для бизнеса Мордовии прошёл уникальный стендап-семинар

Министерство экономики, торговли и предпринимательства РМ совместно с Центром...

В Зубовой Поляне прошел мониторинг выполнения народной программы «Единой России»

Партийный десант в составе  Главы Зубово- Полянского района, секретаря...

В Мордовии закупается оборудование для региональных сосудистых центров

В рамках регионального проекта «Борьба с сердечно-сосудистыми заболеваниями» национального...

Благодаря нацпроекту предпринимателей Мордовии научили успешно вести бизнес онлайн

Министерство экономики, торговли и предпринимательства РМ совместно с Центром...

Благодаря нацпроекту бизнес Мордовии узнал, как работать в рамках закона

Министерство экономики, торговли и предпринимательства РМ совместно с Центром...

Рационализаторы Мордовии могут принять участие в образовательной программе

Минэкономразвития России совместно с АНО «Агентство развития профессионального мастерства (Ворлдскиллс Россия)» реализует программу подготовки команд рационализаторов. Эта работа ведется в рамках федерального проекта «Системные...

Благодаря нацпроекту для бизнеса Мордовии прошёл уникальный стендап-семинар

Министерство экономики, торговли и предпринимательства РМ совместно с Центром «Мой бизнес» оказывает поддержку субъектам МСП Мордовии.В рамках Недели предпринимательства по национальному проекту «Малое и...

В Зубовой Поляне прошел мониторинг выполнения народной программы «Единой России»

Партийный десант в составе  Главы Зубово- Полянского района, секретаря Зубово- Полянского местного отделения партии Владислава Поршина  совместно с представителями родительского сообщества  и администрации Зубово-Полянской   школы  №1 имени Героя Советского Союза...