Сире Теризморга велень мокшень культурань илань кудса кородозь ванфтови и эреклафневи сембось, мезсь сотф национальнай культурать мархта. Тяса ётафневи аф кржа экскурсия, мастер-класст, конатнень вельде иттне и оцюфне нинге весть васьфнихть ётай пингонь эряфть, койхнень-обуцятнень мархта.
«Ленгянь карьхть» мастер-классть омбоце кизось ётафнесы идень кружоконь вятись, машты кядь мокшень алясь Шилкин Владимир Васильевич. Сон лац содасы шуфтонь керсемань, илиняста, ленгяста кептернянь кодамань тевть.
«Карень кодама тевти,— азонды Владимир Васильевич,—содафтомань нинге шабакс пингстон алязе, кона маштсь лац кодама мокшень карьхть. Пингонь ётазь тя тевсь юкстафоль, но савсь лятфтамс. Карень кодама тевсь монь панжемань лия ширде сяда крхкаста, келиста. Ленгяса кодамаста, улема, муйне эсь прязень. Кодан карьхть и оцюфт, и ёмланят (сувенирнайхть), кептернят, ловть ланга якамань карьхть. Тянь тиендьса, штоба ванфтомс веленьконь пара тя коенц, атянь-атяньконь ремесласнон колга мялямть».
«Ётай пинкнень велесонк, да и марнек Россияса, сембе ашуфне карьсекшнесть карьса. Синь ашель мезьса рамамс или стафтомс кямот. Сяс и корхнесть «лапотная Россия»,—тяфтама валса ушедозе мастер-классть мокшень алясь.
Карьсь карьти аф дуган. Мокшень карьсь сяви ушеткс костромской или нижегородской карьть эзда. Инголи пцтай эрь велеть сонцень каренза ульсть—корязост содаволь, коста ломанць сась. Владимир Васильевич азонды: «Монь Агния щавазе куломозонза якась карьса, лувондозень сембодонга цебярь пильгонь карьсемакс. Тя ётай веконь 80-це кизотнень пингста».
Карьхнень котцезь пяшень ленгяста. Мокшень карьсь кодави крайста сяда тяйняста, меле цютькя келеми. Эсост ульсть ленгянь килькшт, куване нолневсть карьксне. Серес синь сяда алнянятольхть рузоннетнень коряс. Ленгятнень ватксезь маластонь вирьста, аноклавихть майста сявомок июнти молемс. Тя ёткть сяда тёждя синь ваткамасна.
Карень кодайкс семьяса ульсть атятне. Синь кодамстост эряви пеель, цёканцёр, кочедык, шуфтонь колодка. Васенда ленгятне лопафтомат, меле керсемат фкя-кафта сантиметрань келеса ленгянява. Карьть кодаманц ушеткшнесазь кочкяряста. Пильгалть тиендезь кафта слойса.
Кодаф карьхне сатнесть аф ламос. Тялонда кемоньшка, тунда—нилешка, а кизонда паксяса—колмошка шинди. А кда оцю кис срхкаль ломанць, то сяволь мархтонза ветешка пара. Ули валмуворкс: «В дорогу идти-пятеры лапти плести».
Владимир Васильевич ленгяса кодама тевсонза семботь тиендьсы сонць, аноклакшнесы материалть, а тя ёфси аф тёждя. Кодамать ушеткшнесы пара, валда мяльса-арьсемаса, ваймонь путозь, а тев тии виень аф ужяльдезь.
Эрь мастер-классть ётафтомста мушендовихть ломатть, конатнень ули оцю мяльсна ашкодомс пильге сяярти пракстат, карьсемс пильгснон карьса, варжамс якамс мархтост, кштимс. Тя сембось эвондафни эсост кенярдема, салси мяльснон эса, лезни сяда лац содамс мокшэрзянь народть коензон. Тянь мархта синь варчсесазь эсь асуснон тя тевса, лятфнесазь ётай пингонь эряфть, а эряфкшу туристтне эсь идькс пингснон.
Владимир Васильевич лямбоста и кельгозь азонды эсь тевонц колга кружоксонза иттненди и макссесыне эсь содамошинзон туристтненди. Сонь мялец, штоба мокшень койхнень содалезь и лиятне. Стама кельгома эсь тевонцты няеви сельмосонза, мярьгат, тяда питни и мала теенза мезевок аш. И тя афкукс тяфта.
—Мон надиян, што минь коеньке-обуцяньке ванфтовихть и келемихть, мзярда масторлангса улихть синь кельгисна и ванфтысна, а сашендыхнень ёткса лама идь. Сембось тя корхтай сянь колга, што национальнай юроньке, историяньке содафтовихть иттненди, аф юкставихть. Иттне—минь вандыень шиньке,—корхтай мокшень мастерсь Владимир Васильевич.
Выставка мархта ленгяса кодай мастерсь ульсь республикань лама вастова, аф весть ульсь и шабрань региоттнень эсовок, коса няфнезе эсь маштомошинц, а стане жа тонафнесь машты кядь лия ломаттнень эса. Сонь тифонза-кодафонза лихневихть выставкас «Шумбрат, Мордовия!» народнай творчествань Республиканскяй; Ульяновскяй областьса «Поволжская глубинка» национальнай культурань 10-це Всероссийскяй фестивальхнень, «Шумбрат!» 7-це Межрегиональнай национально-фольклорнай праздникть пингста.
Мокшень народть культуранц и коензон-обуцянзон ванфтомаснонды путксонкса сон казьф лама Дипломса и Благодарностьса.
Лама лямбе вал азондыхть туристтне мастер-класста, экскурсияда меле. И ламотнень мяльсна самс нинге весть.
Любовь СОКОРОВА.