Святой Тройцять келиста отмечсесазь пцтай эрь велеса. Цебярь тяфтама кой ули и Ковылкинскяй райононь Малавса.
Тройцянь шиня, 23 июньцта, Малав велень Социальнай многофункциональнай центрать малас пуромкшнесь лама ломань. Сембе ёрасть ваномс «Шачема-касома уженязе—Малав велесь!» илать и примамс эсонза участия.
Васенцекс пуромфнень инголе корхтась Малав велень поселениянь оцюнясь Пётр Романов. Пётр Иванович поздравляндазень сембонь Святой Тройцять мархта и шарфтсь мяль, што Малавса арась цебярь койкс тяфтама илатнень ётафнемасна. Кизоста кизос ваномост сашенды коль сяда лама ломань, мезсь пяк кеняртьфти.
Сяда тов приветствиянь валхт азсь Малавонь клубть заведующаец Борис Гагин. Борис Михайлович башка мяль шарфтсь велеть культурнай эряфонц лангс.
Концертть панжезе «Мокшаночки» ансамбльсь, конань руководителец Тамара Матяшова, «Айда, ялгат, минь кштитяма» мокшэрзянь кштимать мархта. Сяда тов творческяй тя коллективсь моразе «Малавоньке—мокшень сире веле» мороть.
Велень школать и учительхнень колга азфоль лама пара вал. Малавонь школаса тонафнесь пяк лама ученик, кой-кит эздост арасть афкуксонь профессионалкс образованияса, медицинаса, строительстваса, экономикаса и лия ширетнень эса. Тянкса оцю путкс тисть учительхне. Фкясь эздост—Народнай образованиянь почётнай работниксь Надежда Макеева. 40-да лама киза Надежда Ивановна работай Малавонь школаса, тяни сон директор.
Тя велеса улихть лама идень семьят. Нят: Какнаефне, Ермакофне, Малькиттне, Нина Алашинова сь касфтсь вете, а Светлана Баландинась—сисем шабат. Лама идень семьятне примасть участия «Шачема-касома уженязе—Малав велесь!» иласа.
Лятфтафоль и специальнай военнай операциясь. Малавонь кой-кона алятне и цёратне примайхть эсонза участия. Гордостень марязь лятфтафтольхть синь лемсна. СВО-нь участниксь Николай Агапов максозе эряфонц тюремань паксяса и казьф Мужествань орденца (куломдонза меле).
Тройцяти лемтьф илась мольсь шиньберьф. Оцю сюкпря азфоль «Мокшаночки» группати и сонь руководителенцты Тамара Матяшовати, велень поселениянь оцюняти Пётр Романовонди, щамонь стайти, танцти позань аноклайти Валентина Тюрькинати, а нинге—Пётр Купряшкинонди, Иван Абруйкинонди, Иван Малькинонди, Виктор Матяшовонди, Михаил Егоровонди, Василий Резяпкинонди, Виктор Ермаковонди, Виктор Белоусовонди, Сергей Ефимкинонди, Надежда Агафоновати.
Оцюдонга оцю лезкс макссь Малавса шачфсь-касфсь Евгений Ермаков, кона тяни эряй Москуса.
Татьяна Альшина.