21 апрельста Саранскяйса, Мокшэрзянь национальнай драматическяй театраса, ётафтовсь Мокшэрзянь кяльхнень Всероссийскяй шиснонды лемтьф оцю пуромкс. Лятфтасаськ: тя илась эрь кизоня уленди 16 апрельста и нинге и нинге весть пуропнесыне марс сембонь, кит корхтайхть мокшень и эрзянь кяльса и кородозь ванфтсазь синь.
Национальнай театрав тя шиня пуромкшнесть школань учительхне, вузонь преподавательхне, идень садонь воспитательхне, культурань работникне—сят, кинь работац сотф мокшень и эрзянь кяльхнень мархта и кинь эряфса Всероссийскяй тя оцю шись занци башка васта. Синь сашендсть аф аньцек Мордовиянь эрь-кодама уженяста, но и Россиянь лия региоттнень эзда. Аф кржась ёткстост наряжафтольхть мокшень и эрзянь мазы щамса. Аф стак ламотне оцю мяльса тифнесть мархтост лятфнембяленди фотографият.
Илас пуромфненди приветствиянь и поздравлениянь валхт азсь Мордовия Республикань Правительствать Председателенц васенце заместителец Галина Лотванова.
—Арась цебярь койкс ся, што Российскяй Федерацияса, календарть коряс, васьфневи Мокшэрзянь кяльхнень шисна. Тячи мялезе эрти эздонт—учительти, воспитательти, библиотекарти, культурань работникти, работас коре ялганенди—вярдень вастса ащихненди азомс седиста моли благодарностень валхт сянкса, мес тинь ванфнесасть кяльть, культурать, атяньконь атяснон историяснон. Российскяй Федерацияса аш фкявок регион, коса афольхть эря земляконьке. И теест мокшень и эрзянь кяльхне—родной кяльхть. Самай синь кельгозь и оцю мяльса ванфтсазь ся питнишить, конанди мярьгихть национальнай культура. Тя музыкась, моротне, кяльсь, историясь, атяньконь атяснон койсна. Пара, што республикасонк примаф культурать, Мордовия Республикань национальнай кяльхнень и лия национальносттнень кяльснон ванфтомаснон коряс государственнай программа. Тя программать мяльса кирдезь ётафневи пяк лама мероприятия,—мярьгсь Галина Алексеевна.
Галина Лотванова башка мяль шарфтсь Великай Сяськомать 80 кизонь топодеманцты. Тя оцю илась кармай ёфси курок и отмечави марнек странать келес. Тя Сяськомать сатнезь разнай национальностень ломаттне и синь ульсть единайкс. Тячи иденьке и уноконьке сатнесазь Сяськомать од фронтса—специальнай военнай операцияса. Конешна, Сяськомась ули мельганк и сембе боецоньконди арьсетяма кеме шумбраши. Синь фалу учсаськ. Учсаськ мокшэрзянь родной модать-масторть лангса Сяськома мархта!
Тя шиня казьфтольхть инь достойнайхне. «Мордовия Республикань Заслуженнай артист» почётнай лемсь максф «Торама» фольклорнай ансамблень артисткатненди Александра Ломачкинати, Валентина Миркинати и Татьяна Храмовати.
Галина Лотванова азозе, што казьф ня ломаттне и «Торама» ансамблень лия артисттне, макссть передовойса сядода лама концерт!
Театральнай искусстваса оцю сатфксонкса «Мордовия Республикань Заслуженнай артист» лемсь максф Мокшэрзянь национальнай драматическяй театрань актёрти Анатолий Нуштайкинонди.
Мордовия Республикань Почётнай грамотаса казьф мокшавась Мария Вельмякина, кона работай Саранск ошень округонь Информационно-методическяй центраса этнокультурнай образованиянь отделонь начальникокс.
Ульсть и лия казнет.
Мордовия Республикань Государственнай Собраниянь депутатсь Евгений Ледяйкин азсь благодарностень валхт сембонди, кит заняфт мокшень и эрзянь кяльхнень тонафнемаснон и ванфтомаснон мархта—учительхненди, национальнай газетань и журналонь сотрудникненди, лиятненди. Евгений Евгеньевич поздравляндазень сембонь оцю илать мархта и тердезень сяда тов мольфтемс эрявикс тя тевоньконь.
Мокшэрзянь народть Межрегиональнай общественнай организациянц председателец Юрий Мишанин азозе, што Мокшэрзянь кяльхнень шисна аськоляй марнек Россиять келес. Аф аньцек Мордовияса, но и лия региоттнень эса—Москуса, Тольяттиса, Пензаса, Нижний Новгород ошса, Саратовса, Тамбовса ётафневихть теенза лемтьф пуромкст. Юрий Александрович азсь оцю спасиба сембонди, тяконь лувксса властень оргаттненди, республикань Оцюняти Артём Здуновонди инь питнить—кяльхнень ванфтомасост лезксонкса и ширень кирдеманкса.
Пуромфнень стане жа поздравляндазень «Якташлар» Мордовия Республикань татархнень национально-культурнай автономияснон председателец Руслан Мухаев.
Ульсть видеопоздравленият лия региоттнень эса и омба масторса эряй мокшетнень и эрзятнень эзда.
Мокшень и эрзянь кяльхнень Всероссийскяй шиснонды лемтьф илас пуромфненди аноклафоль мялень салай концерт. Сценать лангс лисендсть «Умарина», «Торама», «Мерема» творческяй коллектифне, «Варма» этно-арт театрась, лиятне.
Татьяна АЛЬШИНА.