Онава васенцеда няень мелянь сёксенда Старошайговскяй райононь Сире Теризморга велеса Национальнай культурань районнай центраса улемстон. Экскурсиять пингста кулине, мезе тя тяфтамсь.
Мокшетнень ингольдень эряфснон-ащефснон колга пачфни ламоц лия экспонаттнень и паршихнень мархта ряцок ащи (видеста азомс, идень нюрямнять лангс повфтафста нюрьги) онавась.
Тя оцю вельхтерда, конань инголи аноклакшнезь стирьхне рьвакс туманди. Эсь кядьса кодаф акша котфть лангс стирть ялганза сюреса сёрматкшнесть мокшень орнаментт. Центраса ванфтови эздост кемгафтува.
Вельхтердать мархта рьвакс максови стирсь вельхневсь марнек—пряста сявомок кочкярятненди молемс. Тиендевсь тя аф цебярь сельмода ванфтомать эзда.
Но и сяда тов онавати мушендовсь «эрявикс тев». Сонь мархтонза, шабать белай свету эвондамдонза меле, вельхнезь нюрямнять. Штоба одс шачинясь фалу улель аралаф аф цебярь сельмованфта, кяженьбачк азф казяма валда, «содай» ломаньда.
Инголи сидеста улендсь стане, што, сувамок шабрань ширес, ломаттне эсьотям варжакснесть нюрямняти, кизефнемок: «касы ёмланянте?», «вай, конашка ни» и стак тов. А кда идть вастоняц вельхтяфоль онаваса, эста стирнять или цёранять ашель кода няемс.
Вов тяфтама парши няень Сире Теризморгаса! Сон вельхтяфоль нюрямня лангс, конанди сядода лама киза.
Онавать колга газетаса пачфтемда меле кфчиесть и спорямань кизефкст. Кой-кона морафтыеньке меле тяшнесть, што онава мярьгихть аф вельхтердати, а крандаскя мархта кибиткати, конань потмос озафоль рьвакс туй стирсь. Пади, косовок тя и тяфта. Но минь пачфнеме Сире Теризморгань онавать квалма. А мокшень тя велеса тяфта мярьгихть вельхтердати. И самай сонь ванфтсазь Национальнай культурань районнай центраса.
Колганза мялень салай козя материал ули и «Живое древнее искусство. Традиционная вышивка села Старая Теризморга» изданияса. Сон лиссь 2023 кизоня Культурнай инициативань Президентскяй фондть ширень кирдеманц вельде. Проектть руководителец—Национальнай культурань районнай центрать директороц Светлана Видясова. Каталогть кочказь и тиезь Инна Кудашкина, Анастасия Чевтайкина, Анна Цыганова.
Вов мезе пачфневи каталогса онавать колга. Макссаськ тя информациять, ётафтомок мокшень кяльс.
Онаваста сявфт сёрмат (онавать орнаментонза)
Онава Сире Теризморга велеса мярьгольхть котфонь вельхтердати, кона оберег лаца вельхневсь рьвакс туй стирть и приданнайть мархта «кибиткать» лангс. «Кибиткась» латцевсь стирть церькаву уски крандаскяти.
Онавась ащи ниле пяльксста кудонь иляназонь котфонь ниле точнень эзда. Эрть лангса орнаментальнай колма розеткат, марстонь лувкссна—кемгафтува. Обуцяс коре, вельхтердать лангса фкявок орнаментсь ашезь уле лиять лаца, лиякс азомс, ашельхть фкакс ащи кафта орнаментт. Вельхтердать сюреса сёрматкшнезь рьвакс туйть ниле стирь ялганза (эрсь—котфть эрь точенц). Меле пяльксне кувака ширеснон мархта сташендовсть марстонь фкя котфс.
Ванфты, аралай васта онавась занцесь семьять эряфса и свадьбада меле. Васенда мархтонза вельхнезь вастть, коса утцесть рьвяяйхне: кели скомнять и приданнай мархта арзять (кроватьсна эста ульсть аф сембонь). Стямок вастть лангста, оттне кочксезь-пуропнезь вастонь ацапнень и лангозонза вельхнезь онавать. Васенце идть шачемдонза меле онаваса вельхнезь нюрямса уды идть.
Онавась ашезь макссев поколенияста поколенияс, а кирдевсь семьяса кода «кальдяв сельмода» ванфты.
Каталогса максфт кафта вельхтердатнень эзда орнаменттне—1909 и 1924 кизоннетне. Васенцесь ульсь Фёкла Семёновна Атеняевать (1892-1984 кизотне). Фёкла Семёновна лиссь рьвакс 1909 кизоня. Церькаву венцяфтома ардсь «кибитка» мархта крандазса онаваса «сельмодемада» вельхтяфста.
Куттнень ланга якамста онавать Национальнай культурань районнай центрань сотрудникненди максозе Фёкла Семёновнань рьвяняц Аксинья Васильевна. Тя ульсь 1992 кизоня.
Омбоце онавать Национальнай культурань центрав 1992 кизоня максозе азоравац Прасковья Ивановна Куданкина. Прасковья Ивановна тусь рьвакс 1924 кизоня. Церькаву венцяфтома мольсь ялга, сяс онавась вельхтяфоль лангозонза.
Сире Теризморгаса Национальнай культурань районнай центраса работайхне пачфнихть онавать колга ширезост сашендыхненди. Сонь оцю мяльса ванондсазь кода республикань, стане и лия региоттнень эзда туристтне.
Мяленьке кизефтемс морафтыеньконь: а тинь велесонт ульсть онават? Пачфтеда тянь колга редакцияв.
Татьяна АЛЬШИНА.