«Национальнай спектр» аф коммерческяй партнёрствань ассоциациясь нолдась эряфс «Литературно-театральнай фестиваль «Во славу героев Отечества» лем ала проект. Тевс нолдави грантсь, кона максфоль «Российскяй культурань фондонь» ООГО-нь «Семья» национальнай проектть коряс. А.С.Пушкинонь лемса национальнай библиотекась лувондови проектти информационнай партнёркс.
Литературно-театральнай фестивальсь тиф сянкса, штоба азонкшнемс видешить Великай Отечественнай войнать, сонь участниконзон и героензон колга, конат шачсть Мордовия Республикаса. Проектть эса васенце вастса—афкуксонь патриотонь касфтомась, Россиянь историять маштозь и цебярьста ванфтомац. Тя тиеви разнай форматса культурать и искусствать вельде.
Проектсь ушедсь ётафневома эряфс Отечествань аралаень кизоста и сотф сон Великай Сяськомать 80 кизонь топодеманц мархта. А ушедсь сон литературно-патриотическяй васьфтематнень эзда, конат лемтьфтольхть Саранскяень, Калинковичскяень военнай пехотнай училищатненди, 326 Рославльскяй Краснознамённай стрелковай дивизияти, Мордовиянь танковай колонияти, конат примасть участия военнай событиятнень эса. Башка васьфтемат лемтьфтольхть Советскяй Союзонь Геройти М.П.Девятаевонди, кинооператорти В.Сущинскяенди. Оцю лезкс тя эрявикс тевса тейнек макссихть республикань центральнай государственнай архивонь и 1941-1945 кизонь Военнай и трудовой подвигонь мемориальнай музеень научнай сотрудникне.
Васьфтематненди аноклакшнеме документальнай, научно-историческяй и методическяй источник мархта книгань стеллашт. Выставкатненди тиендеме обзорхт, содафнеськ ломаттнень Мордовиянь историкнень, краеветтнень работаснон мархта.
Од ломаттненди путфоль «Тяк юксне аф юкставить» театральнай постановкась. Сценарийти сувасть солдаттнень фронтста кучф сёрмасна. Нят аф коське историческяй документт, а седи пачк нолдаф каготт, коса кельгома, надияма и оцю верондама, што сяськтяма. Мордовскяй государственнай национальнай драматическяй театрань артисттне пяк лац няфтезь фронтовикнень мяльснон-арьсемаснон, прянь вятемаснон, пичефксснон. Спектакльса ульсть военнай пингонь морот, конат эрь ваныти содафт нинге шабакс пингста. Ётафтф сембе мероприятияньконь колга азонкшневсь социальнай сетьтнень эса.
Сёксенда тя проектсь ушедсы эсь тевонц. Библиотеканьконь площадканзон эса кармайхть ётафневома мялень салай литературно-патриотическяй васьфтемат, театральнай постановкат. Ванода афишаньконь мельге, сашендода ширезонк мероприятияс.
Надежда Бочканова,
А.С.Пушкинонь лемса национальнай
библиотекань национальнай и краеведческяй
литературань отделть вятиец.