ТЯНИВОК СТРОЙСА

Мордовия Республикань культурань Заслуженнай работникть, Атерень искусствань школань преподавательть, трудонь ветеранть Н.Ф.Турусовонь лемоц лац содаф аф аньцек мокшэрзянь крайса, но и марнек Россияса. Сон сувси странань инь цебярь гармонисттнень ёткс. Учениконза Иван Сяткин, Владислав Шумкин и лиятне лац содафт странасонк. Владислав Шумкин примась участия «Синяя птица» телевизионнай проектса и лиссь омбоце вастти. Аф весть ульсь «Поле чудес», «Играй, гармонь» васенце каналонь предачатнень эса. Тяни Николай Фёдорович асу тонафниензон мархта уленди Мордовиянь и Россиянь музыкальнай фестивальхнень, эрь-кодама пялькстоматнень эса. Ученицац Ксения Журавлёва эрь форумса занцесыне васенце васттнень, арси лауреатокс и призёркс. Николай Фёдоровичень лама и асу лия тонафнидонза, баянца морайдонда. А коса примай участия сонць, петьсы эрь концертть, фестивальть.
Аф лама пинге ётазь аделавихть кизонь каникулатне. Искусствань школаса ушеды тонафнемань од кизось. Кярьмоди эсь кельгома тевонцты и Н.Ф.Турусов. Марса Н.А.Шумкинать, В.М.Барабановать, З.А.Анисимовать мархта кармайхть тонафтома иттнень аф аньцек музыкальнай инструментса морама, но и аноклайхть аф фкя концерт. Примайхть участия лама оцю фестивальса-форумса.
—Тонафнемань од кизоти анокан,—корхтай Николай Фёдорович.
Анокт и сонь тонафниенза. Россиянь содаф гармонистсь кельгома тевонцты макссь ведьгемоньда лама киза. Баянца морама тонафтсь велень сядот идь. Аф ваномок кизонзон лангс, сон тянивок стройса.
Илья ВЕШКИН.
Снимкаса: Н.Ф.Турусов (виде ширде васенцесь) гармонист ялганзон мархта.