Атюрьевскяй районти шабракс ащи Темниковскяй райононь Кушка велесь. Сон лувондови рузоннекс, но корхнят тястонь эряйхнень мархта и саят мяльс, што синь пяледа ламосна мокша ломатть. Тяза нолдасть юрхт Атюрьевскяй райононь Крхтажень, Боражень, Сире Кушкань, Каргоньжяень ингольдень эряйхне. Састь тяза эряма Темниковскяй райононь Од веленяста, Ордажста, Келгужста. Кушкса кородозь ванфтовихть мокшень койхне-обуцятне, щапне-каряпне. И тянкса, васендакиге, шнамань валхт азомат культурань работникненди.
В.Ф.Морозова велеса вятьсыне библиотекарень тефнень. Ломанць пяк ответственнай, трудонь кельги. Шачсь и кассь сон шабрань Сире Кушка велеса, кона сувси Атюрьевскяй районти. Школать аделамдонза меле тонафнесь бухгалтеркс Темникавонь велень хозяйствань техникумса, конань шумордамдонза меле сявозь покодема Каргоньжяй велень связень отделенияв. Комозьда лама киза каннесь почта Сире Кушкань, Боражень эряйхненди. Ульсь и тянемс лядонды цебярь ялгакс «Мокшень правдати». Сёрматфтомать пингста фалу лезни тядянь-алянь кяльса лисенди газетати. Вов ни кота кизот Валентина Фёдоровна трудендай Кушконь библиотекаса. Тяса сембось тиф мокшавать кядьса. Васендакиге, библиотекаса оцю мяль шарфневи мокшень содаф писательхнень творчестваснонды. Мокшавась аноклакшни выставкат, ётафни литературнай илат. Кушксь, конешна, аф ош, но ломаньда илас сашенды сатомшка. «Шачема крайть мораец» лем ала литературнай мероприятиять лемдезе мокшень содаф поэтти, писательти Е.С.Тимошкинонди. Сон Од веленянь, Валентина Фёдоровнань щеняц. Идькс пингонц и одонь кизонзон колга теенза лама азонкшнесть тядянза-алянза, Мария Сергеевна и Фёдор Никитович Попкофне. Илас сашендсть Е.С.Тимошкинонь колма сазоронза: Зинаида, Татьяна, Елена. Синь эряйхть Каргоньжяй велень поселенияса. Егор Сергеевичень поэзияса башка васта занцесь шачема краенцты кельгомац. Сон войнань пингонь идь, тылонь труженик. Казьфоль «За доблестный труд в годы Великай Отечественной войны» медальса. Тимошкинонь инкса оцю гордость маряйхть раднянза, земляконза. Тяфтама илатне Великай Сяськомать 80 кизонь топодеманц карша пяк эрявихть. Пингстост велеряйхне, школаса тонафнихне нинге весть лятфтасазь ся стакадонга стака кизотнень, тылонь труженикнень, войнань пингонь иттнень. Кушка вели тяни ашезь ляда войнань фкявок ветеран. Аш и тылонь труженикт. Но улихть нинге войнань пингонь итть. Фкясь эздост Мария Максимовна Дунаева. Сиренять мзярдовок аф юкснесазь, тернесазь ётафневи илатненди, поздравляндакшнесазь илатнень мархта.
Библиотекаса инь няевикс вастса ащихть мокшекс наряжаф някатне, мокшавань нулатне. Мазыдонга мазы ня щапнень стазень Валентина Фёдоровнань акац, Зинаида Фёдоровна. Сон покоди Атюрьевскяй райононь Сире Кушка велень лавкаса мишендикс. Ваймама пингста наряжай велеряензон эса.
В.Ф.Морозова пуроптсь краеведческяй уженя. Мезе аньцек тяста аф муят-няят. Ёмла музейть вятемаса советт теенза максси республикань содаф учёнайсь, этнографсь Н.Ф.Беляева. Тяни Надежда Фёдоровна мирденц мархта эряй Бораж велеса. Эсь кудсостка ули краеведческяй уженя. Кда эряви кодамовок лезкс, наукань докторсь вестевок аф атказай.
Кода азозе В.Ф.Морозова, экспонаттне аф ащекшнихть фкя вастса, нолявихть тевс. Велеса, районца, республикаса ётафневи лама мялень салай ила. И ётксост ашель стама, коса Валентина Фёдоровна афоль прима участия. Кепотьксонди, эрь кизоня якай «Шумбрат, Мордовия!» Народнай творчествань республиканскяй конкурсс-фестивальс. Мархтонза сявонди мокшень щапт-каряпт, сире пингонь бытонь предметт. Няфни илас сафненди мастер-класст, тонафтсыне сюрень кштирдема-кодама. А конашкава машты пидема-панема! Фкявок илац аф ётни танцти пачафтома, пярякафтома, калонь, сиволень цёмарафтома, шову позафтома, лия ярхцамбяльфтома.
Улихть Валентина Фёдоровнань лездыензовок. Клубса заведующайкс покоди трудонь кельги мокшавась, велень коень-обуцянь кельгись, ванфтысь В.В.Киселёва. Сон лама пинге ульсь Кушка велень поселенияса оцюнякс. Минценнесь, мокшеннесь, Валентина Васильевнанди фалу ульсь васенце вастса. Сон «Мокшень правдать» кунардонь ялгац. Най сёрматфнесы тядянь-алянь кяльса газетать, пара мяльса морафнесы сонь. Аш стама ила районца, республикаса коса сон афоль прима участия. Трудоц апак приметак аф лядонды. Лац покодеманкса мокшавась казьф аф фкя оцю казнеса.
Мекольдень кизотнень Кушка велень поселенияса оцюнякс покоди Келгужень мокшалясь Ю.П.Нечайкин. Сон фалу лезни культурань работникненди аф тёждя тевсост, примси участия ётафневи сембе мероприятиятнень эса. Тяни Юрий Павловичень сембе виенза водендафт илатненди, конат сотфт Великай Сяськомать 80 кизонь топодеманц мархта.
Вятеви оцю работа войнаса шавфненди обелискть пирьфонц урядамаса, одкстоптомаса.
Ужяленди, тяни Кушконь основной общеобразовательнай школаса сембоц кефкие ученик. Школаса директоркс покоди Н.С.Возжунина. Иттне, тонафтыхне старандайхть аф лядондомс ширеса велеть, районть эряфонц эзда. Сашендыхть клубу, библиотекав мероприятияс.
Инголе Великай Сяськомать 80 кизонь топодемац. Кушконь лама од цёра, аля 1941 кизоня тусь фашисттнень каршес тюрема. Пяледа ламосна ашесть мрда. Велеса аш стама семьят, конатнень афолезе тока войнась. Велеряйхне примсихть участия «Бессмертнай полкса», войнаса шавфненди обелискть ваксса ётафневи митингса. Иттне сёрматкшнихть эсь велеряйснон—войнань ветераттнень колга сочиненият. Ётафневихть «Мужествань урокт».
Илья ВЕШКИН.