16 июльста Сире Шайгав велеса ульсь оцю ила—тяса ётафтовсь «Ярхцама васта» VII Республиканскяй фестивальсь, конань девизоц «Атяньконь-бабаньконь койснон ванфнесаськ и виияфнесаськ». Фестивальть пингста стане жа васьфтьфоль Старошайговскяй районть шачема шиц.
Илань инжихненди аноклафоль козя культурнай программа. Велень поселениятне няфтезь декоративно-прикладной творчествань выставкаснон, пидесть-панцть национальнай ярхцамбяльхть, каванязь мархтост пуромфнень. Волонтёрхне ётафтсть квест-налхкома од ломаттненди и тердезь примамс эсонза участия почётнай инжихнень—Мордовия Республикань юстициянь министрть С.В.Конычевонь и Старошайговскяй райононь оцюнять Г.А.Мухинонь. Работасть кодама повсь тематическяй площадкат: сувенирнай продукциянь выставка, Арт-кужа («Мон кельгса Шайгавть» рисункань конкурс), аквагримть коряс мастер-класс. Тяда башка, тяфта лемневи чайнай зонаса ульсь кода варжамс тишень чайхнень, а сянгяря зонаса—ваномс Лемдяй велеть тяльмонь ярмарканц. Стане жа работасть иттненди налхксемань площадкат.
Фкя инь мялень салайкс арась концертнай программась, конань пингста кштисть и морасть Старошайговскяй и Зубово-Полянскяй райононь самодеятельнай артисттне и творческяй коллектифне.
Тя шиня ульсь аф кржа казнеда. Анна Ивановна Кручинкинати—Старошайговскяй районнай больницянь общай практикань врачти-терапевтти—максф «Мордовия Республикань Заслуженнай врач» почётнай лемсь. Нищефнень семьяснонды, полатненди Борис Александровиченди и Татьяна Павловнанди, максф Российскяй Федерацияса Семьянь, кельгомань и вернайшинь илать ётафтоманц коряс организационнай комитетть Почётнай грамотац. Мирттне-рьвятне эряйхть марса 40 киза.