Тяса кородозь ванфтсазь сембе минценнеть

Тяниень пингть аф сидеста васьфтят стама веле, коса нинге ули идень сад (да мезе корхтамс, тяни школатка аф сембе вастова улихть). Сяс Рузаевскяй районца командировкаса улемстонк пяк дивандаме, мзярда содаськ, што тя аймаконь Трускляй мокшень велеса тячемс работай дошкольнай тяфтама учреждения. Эзк саме мяльс ваномс сонь.
Кенкшть ваксса лямбе мзолфкя мархта васьфтемазь идень садть заведующаец Наталья Долгова. Сон цебярь кудазорава лаца няфтезе эсь «кудонц».

«Детство» идень садсь Трускляйса панчфоль 1984 кизоня. Тя пингста тяса касфтовсь-воспитандавсь аф кржа стирня и цёраня. Тяни тяза сашенды комсь шаба.

Кеняртьфти, мес Трускляень идень садса башка оцю мяль шарфневи минценнети, национальнайти. 2004 кизоста сявомок тяса сувафневи тевс национально-региональнай компонентсь. Шабатнень мархта занятиятне вятевихть Анна Исаевать «Валдоня» программанц коряс. А ётафнесыне синь Российскяй Федерациянь общай образованиянь Почётнай работниксь, мокшавась Татьяна Бикеева.
Татьяна Николаевна шачемас-касомас коре Ковылкинскяй райононь Од Сомай веленне. Трускляень идень саду работама сась 1986 кизоня направленияс коре Зубово-Полянскяй педагогическяй училищать шумордамдонза меле. Мокшавась пяк кельгсы родной кяленц, культуранц, мокшетнень койснон-обуцяснон и пара мяльса пачфнесы тянь семботь эсь воспитанниконзонды. Татьяна Николаевна путсь ушеткс идень садса мокшэрзянь ёмла музейть пуроптоманцты. Тевсь ушетфоль 2000-це кизотнень и тячи мокшень куд потма лаца тиф тя уженяса лувондови сядот предмет. Тяса сембось тиф-латцеф стане, кода ульсь атяньконь-бабаньконь пингста. Ужеса ащи пянакуд, вакссонза—пешуфтат, коцькаргат, цюгуннят. Поталакти повфтаф «идня» мархта нюрям. Улихть тяса и мокшень щапт-каряпт, сюреса сёрматф нардамат, тодлангакст, мастору ацафт эсь кядьса кодаф ватулат и лама мезе лия. Тя комнатаса Татьяна Николаевна и ётафнесыне занятиятнень, штоба стирнятне-цёранятне эсь сельмосост няелезь, кода эрясть-ащесть атяньке-бабаньке, кодама щамса наряжакшнельхть, кодамотольхть кядьгосна и стак тов. Бикеевать валонзон коряс, шабатне сашендыхть тяза пара мяльса.
Татьяна Николаевна азонкшни иднятненди республиканьконь, Рузаевскяй районть, Трускляй велеть историяснон, содаф ломаньцнон колга. Воспитательсь аф кржа тиенди сянкса, штоба шабатненди ёмластокиге кельговоль шачема уженясна, штоба синь мзярдовок афольхть юксне тядянь-алянь кудснон колга. Аф стак садиконь программати сувафтфт тяфтама разделхне, кода «Мон и семьязе», «Мон и монь лемозе», «Монь радняне и ялгане», «Мон и монь ёмла Родиназе».
Идень садса пяк весяласта ётнихть илатне. Эста шабатне щашендсазь сюреса сёрматф паляснон и кштикшнихть-шарондыхть мелавня лаца. Эрь тяфтама праздникс стирнятне-цёранятне эсь воспитательснон мархта тонафнихть мокшень стихотвореният, морот, кштимат. А нинге тяса оцю мяль шарфневи мокшэрзянь налхксематненди. Тонатфокс арасть тяфтама народнай налхксематне, кода «Руцяняса», «Сяканяса», «Боранца» и стак тов. Мадомста иттне пара мяльса кулхцонкшнесазь матотфтомань моротнень, ёфкснень.
Эряви азомс, Татьяна Николаевна эсь воспитанниконзон мархта аф аньцек аноклакшнихть илат идень садса, но и улендихть инжикс школаса, примсихть участия велеса и районца ётафневи мероприятиятнень эса, коса пяк лац няфнесазь пряснон. Тяда башка, стирнятне-цёранятне участвовандакшнихть республиканскяй и муниципальнай лама конкурсса, коса занцихть призовой вастт.
Трускляень идень садста туме кепотьф мяльса. И тя шарьхкотьф. Афкукс кенярдят, мзярда няйсак, кодама лямбоста тяса малаткшнихть минценнети, национальнайти. Иднятнень эса нинге ёмласта касфтови кельгомась родной кяльти, культурати. Тя максси оцю надияма.
Ольга Евдокимова.
Фототне Николай КАРАНОВОНЬ.

Последние новости

В МОРДОВИИ ЭКСПЕРТНЫЙ СОВЕТ ПРИ АТК ОЦЕНИЛ КОНТЕНТ ДЛЯ МОЛОДЕЖИ

6 февраля в Доме Республики под председательством заместителя Руководителя...

Пенсионеркась ётафтсь аф пелькс счётс 5,5 миллиотт цалковай

Кода пачфни «Стопмошенник13» телеграм-каналсь, Россиянь УМВД-нь Саранск ошень округть...

«Варяг» крейсерть подвигоц

9 февральсь—Россиять военнай историясонза мяляфтови дата. Тя шиня 1904...

Мазыхть мокшень стиреньке

Кельгома морафтыеньке! 2025 кизоня «Мокшень правда» газетась сяда тов...

Рославльскяй Краснознамённай 326-це стрелковай дивизиясь пуроптфоль Саранскяйса

Тядде васьфтьсаськ оцюдонга оцю илать—Великай Сяськомать 80 кизонь топодеманц....

Эрявикс кизефксненди—башка мяль

Ётай недялять Саранскяйса, Республикань Кудса, ётафтовсь Мордовия Республикань сисемце...

В МОРДОВИИ ЭКСПЕРТНЫЙ СОВЕТ ПРИ АТК ОЦЕНИЛ КОНТЕНТ ДЛЯ МОЛОДЕЖИ

6 февраля в Доме Республики под председательством заместителя Руководителя Администрации Главы Республики Мордовия и Правительства Республики Мордовия – руководителя Пресс-службы Главы Республики Мордовия Елены...

Пенсионеркась ётафтсь аф пелькс счётс 5,5 миллиотт цалковай

Кода пачфни «Стопмошенник13» телеграм-каналсь, Россиянь УМВД-нь Саранск ошень округть эзга 4№ полициянь отделу пшкядсь ошень 65 кизоса авась, кона пачфтсь вете тёжяньда лама цалковаенц...