Эрь кизоня Рузаевскяй райононь Левжа мокшень велень школась нолдай оцю кис асу од ломатть. Сяльде кой-конатнень няйсаськ сценать лангса: кие морай, кие кштий, кие налхки театраса. Вов и Денис Сонаев, кона тядде шумордазе 9 классть, ёрай поступамс Н.П.Огарёвонь лемса Мордовскяй госуниверситетонь Национальнай культурань институту актёркс. Профессиясь семьясост аф од, оцю брадоцка тонафнесь актёркс.
9 кизоста Денис получсесь аньцек «нилет» и «ветет», аф весть сяськондсь Всероссийскяй олимпиадань муниципальнай этапнень эса. Сон—оцю класса тонафнихнень советснон председателец, «Мы вместе» школьнай волонтёрскяй отрядонь лидер. Аф фкя киза Левжа велень школаса тонафнись сяськондсь «Живая классика» пялькстомаса. Тядде Денис примась участия «Ученик года 2022» муниципальнай конкурсса и арась суперфиналистокс.
«Тя конкурссь—цебярь возможность тейне няфтемс эсь содамошинень и маштомошинень, арамс содавикс од, мялень салай ломань мархта,—мярьгсь Денис.—Творческяй пяльксса пцтай ашень таколда, сяс мес нинге идькс пингста сявомок сценась тейне—омбоце кудозе. Вокалть коряс занятиятне, репетициятне, выступлениятне лездсть сяда кемоста ащемс пильге лангса».
Нинге ёмласта Денис ушедсь морсема «Пайгонят» образцовай фольклорнай коллективса, конань художественнай руководителец О.В.Сонаева. Коллективть мархта од цёрась примась участия «Салют талантов» Международнай конкурсса, кона ётафтовсь Санкт-Петербургса и Сочиса. Эрь кизоня примси участия «Шумбрат, Мордовия!» Народнай творчествань республиканскяй фестивальса, а стане жа—«Кургоня» национальнай культурань фестивальса. Мокшень цёрась шумордазе скрипкань и баянонь классть коряс Левжа велень музыкальнай школать. Тя сембось лездсь Денисонди шарьхкодемс национальнай культураньконь.
Ётка пингста Денис кельгсы лувондомс мезевок философияста, рузонь и омба масторонь классикаста. Башка мяль шарфни спорттивок, кода сонць цёрась корхтай: «Тя тонафттанза ётнемс стакатнень-сталмотнень и кемокстамс характерцень».
«Кодама профессия афолень кочка, ёран эрямс тяфта, штоба кандомс лезкс ломаттненди»,—мярьгсь Денис Сонаев.