Ёфси кржа пингта лядонды тяддеть шумордамс. Тялонь васенце ковня эрсь эздонк ушеткшни тиендема эсь лацонь итокт марнек кизоти. Тянь ули кода азомс кода личнай эряфть, стане и работать колга. Кодама сатфксса прважасаськ кизоть и васьфтьсаськ одть, мезе удалась тиемс, а мезть лангса работама сяда тов? Ня и лия кизефксне тячиень шиннет эрти.
Декабрть васенце пялестонза якаме инжикс Мордовия Республикань Государственнай премиянь лауреатть, Международнай и Всероссийскяй фестивальхнень и конкурснень лауреатснон, «Умарина» моронь и кштимань Мокшэрзянь государственнай ансамбльть ширес, коса васьфнеме аф аньцек «панчфонзон», мазы вайгяль цёфксонзон, но и сонь директоронц—художественнай руководителенц, Мордовия Республикань культурань Заслуженнай работникть Наталья Касаткинать мархта.
Наталья Ивановна, кода фалу, оцю мяльса отвечась корреспондентоньконь кизефксонзон лангс.
—Наталья Ивановна, ёфси курок туй историяв 2024 кизось. Сяс васенце кизефксоньке тяфтама: кодамоль сон «Умаринати»?
—«Умарина» ансамбльсь илештень кятть работай эрь кизоня: графикт, гастрольхть, концертт, выступленият, региональнай, республиканскяй и международнай фестивальхнень эса участиянь примамась. Тянь ули кода азомс и тяддеть колга.
Мезьса сон мяляфтовсь? Примаме участия Челябинск ошса васенцеда ётафтф «Шумбрат» мокшэрзянь культурань фестивальса. Сон уленди ламоц региоттнень и ошнень эса, а вов тядде теенза тифоль ушеткс Уралть и Сибирть границасост ащи ошса, коса эряй аф кржа мокшэрзя. Улеме и Ульяновскяй областьса Ивашефнень имениясост, коса ётась народнай культурань фестиваль. Ансамбльсь эряй концерттнень и гастрольхнень мархта. Графиконьке, кода и меля, туць «эцефоль». Работатама «Искусство селу» проектть коряс, кона фатнесыне республикань муниципальнай сембе райоттнень и «Пушкинская карта» проектть мяльса кирдезь, сон кочкси вийхть и вельденза творчестваньконь мархта арси содафокс коль сяда лама 14-23 кизоса од ломань. Программат кочксетяма тематическяйхть. Васенце вастти путнесаськ патриотизмать, шачема ширети кельгомать.
—Лятфтать Мордовиянь райоттнень эса выступлениятнень колга. Якатада сембе райоттненди?
—«Умаринась» кизоньберьф уленди сембе райоттнень эса. А кой-коса—аф весть, а кафксть и колмоксть. Тядде несколькаксть якаме Атяшевскяй, Темниковскяй, Ковылкинскяй и лия райоттненди. Пара мялезонк, што учсамазь (сембода пяк эряфкшу ломаттне), сашендыхть семьянек. Мокшэрзянь культурати, моротненди вешфкссь пяк оцю!
—Наталья Ивановна, сай кизоть Мордовиять визитнай карточканцты, гордостень маряма вастонцты—«Умарина» ансамбльти топоди 85 киза. Анокламась юбилейти ушедсь ни тядде. Азонтт, пожалуйста, тянь колга.
—Виде, «Умаринась» 2025 кизоня васьфтьсы 85 кизонь топодеманц. Сон ушедозе творческяй кувака кинц 1939-1940 кизотнень и вов маладсь славнай юбилеенцты. Сай кизось ули теенза юбилейнайкс марнек. Конешна, самай тёкшсь сави сёксети. И ётафневи сембе концерттне кармайхть юбилейнайкс. Анокламе и нолдаме «Умаринать» 85 кизонцты лемтьф сборник, конань эса фотографиятнень вельде няфтьф ансамбльть эряфоц. Сяс иланьконди анокламась моли ни. Кулхцондыхне кульсазь кода «зрнянь» фондозонк сувси моротнень, стане и вокальнай од произведениятнень, няйсазь од кштиматнень.
—Кода ащихть тефне кадратнень мархта? Улихть-аш коллективса сят, кит састь «семьязонт» тядде?
—Тядде «Умаринав» састь кафта студентт, тонафнихть Н.П.Огарёвонь лемса Мордовскяй государственнай университетонь Национальнай культурань институтса. Цёратне балетсот, аноклатама эсост, сувафнесаськ программати. Якайхть мархтонк гастрольс. Улихть однят и хорса. Конешна, стаки ляткшнихть кадратнень мархта сотф прябалат. Мес тяфта лисенди? Кепотьксонди, сяда оцю вешфкссь цёратненди, а эздост аф сяшкава лама.
—Сай кизоть васьфтьсаськ оцю илать—Великай Сяськомать 80 кизонц. Конашка мяль тянди шарфтови «Умаринать» репертуарсонза?
—Оцю. Великай Сяськомась—марстонь иланьке! «Умаринась» патриотическяй ширети фалу шарфни сатомшка мяль. Ули тянди лемтьф башка блоконьке, коза сувси несколька произведения. Сяськомать 80 кизонь топодеманц васьфтьсаськ и ётафтсаськ оцю серьса.
—Спасиба, Наталья Ивановна, мялень салай корхнеманкса. Тонь и коллективть седи ваксста поздравляндатядязь малаткшни Од кизоть мархта. Катк эряфс ётафтови ся, мезень колга арьсетяда, а «Умаринать» «панчфонза» акша шовкс панжихть кизоньберьф!
—Спасиба!
Татьяна АЛЬШИНА.