Наталья Ивановна ламотненди содаф кода Всероссийскяй и республиканскяй фестивальхнень и конкурснень лауреатсна. Асу, мазы вайгяль, сценать лангса эрявикс маштомоши мархта морсись нинге эста тусь Саранск ошень ваныхнень мяльс. Вайгялец мушендсь киня ломаттнень седис, сяс мес Наталья Ивановна эрь моронц ётафнезе ваймонц пачк. 2008 кизоня «Луч» Культурань кудть видеса Наталья Касаткинать вятеманц ала пуроптфоль «Купава» моронь Народнай ансамбль. Эзонза сувасть музыкальнай учреждениятнень и вуснень эса тонафнихне и студенттне, конатнень ули музыкальнай асусна.
Наталья Касаткинась ламоксть арсесь Лауреатокс моронь конкурснень и фестивальхнень эса. 2015 кизоста сявомок мазы вайгяль эрзявась ульсь Мокшэрзянь Госфилармониянь художественнай руководителькс и вов ни нилеце кизось сон—«Умаринать» директороц—художественнай руководителец.
«Умарина» моронь и кштимань Мокшэрзянь государственнай ансамбльсь—Мордовия Республикать гордостец, визитнай карточкац. Творческяй тя коллективсь—Мордовия Республикань Государственнай премиянь лауреат, Международнай ламоц фестивальхнень и конкурснень лауреатсна. Пуроптфоль сон 1939 кизоня Мокшэрзянь государственнай хоровой капеллакс, кона ащесь хорста, морсихнень-солисттнень, баянистть-аккомпаниаторть, художественнай руководительть (сон нинге ульсь хормейстеркс и дирижёркс) эзда.
Великай Отечественнай войнать пингста «Умаринась» фронтса Советскяй Армияти макссь 400-та лама концерт. Войнада мельдень кизотне арасть ансамбльти маштомошинь виияфтомань, мастерствань пуроптомань пингокс.
Тняра кизоста коллективти руководителькс ульсть П.П.Емец, Н.С.Рузавина, Н.Г.Дехтярёв, Георгий Сураев-Королёв, Гавриил Вдовин, Сергей Балабан, Василий Четыркин и лиятне.
2019 кизоста сявомок «Умаринать» вятьсы Мордовия Республикань культурань Заслуженнай работниксь, хормейстерсь, дирижёрсь, эрзявась Наталья Касаткина. Сон коллективть директороц—художественнай руководителец.
Аф кунара газетаньконь корреспондентоц васьфнесь Наталья Ивановнань мархта, кона и отвечась сонь кизефксонзон лангс.
Азома сявок, што тя ансамбльса искусстваса эсь киснон ушедозь и кадсть сонь художественнай мялямсонза эсь колгаст цебярь лятфнемат РСФСР-нь и МАССР-нь Народнай артисткась Раиса Беспалова, РСФСР-нь и МАССР-нь Народнай артисткась Мария Антонова, РСФСР-нь Заслуженнай и МАССР-нь Народнай артистсь Дмитрий Еремеев, РСФСР-нь и Мордовия Республикань Народнай артисткась Александра Куликова, Россиянь Заслуженнай и Мордовия Республикань Народнай артисткась Нина Маркова.
—Наталья Ивановна, 2019 кизоста сявомок тон директорат—художественнай руководителят «Умарина» моронь и кштимань Мокшэрзянь государственнай ансамбльти. Пара улель пачфтемс лувиеньконди коса шачеть-касоть, тонафнеть, работать.
—Шачень Саранскяйса эрзянь семьяса. Шумордайне Саранскяень культурань колледжть дирижёрско-хоровой отделениянц, сяда тов—Культурань и искусствань Самарскяй Государственнай академиять «Народнай хоронь руководитель. Преподаватель» специальностьс коре. Мрдань Саранскяи. 2000 кизоня «Луч» Культурань кудть видеса эвондась «Перезвон» народнай моронь ансамбльсь, коса солисткалень.
—Тяфта и ушедсь трудовой кице?
—Аф. Трудовой кизень ушедыне 1992 кизоня иттнень эстетическяй воспитандамаснон республиканскяй центрасост «Валдоня» моронь и кштимань Народнай ансамблень хормейстеркс. 1994 кизоста сявомок улень «Перезвон» моронь Народнай ансамблень солисткакс.
—Наталья Ивановна, азонтт ансамбльть тячиень шинь работанц колга.
—«Умаринать» тячиень шинь работац—марстонь вешендема и марса покодема. Мекольдень кизотнень одкстоптфт ансамбльть составоц, моронь и кштимань репертуароц. Мокшэрзянь моротне, кеняртьфти и валда обрасне тиезь хоровой, кштимань и вокально-хореографическяй произведениятнень «седикуцюняснон». Синь пачфнихть мокшэрзянь масторть, сонь коензон и обуцянзон, стакшинзон и иланзон колга. Ётксост содаф композиторть Василий Родионовонь обработкасонза «Сенькань Микитать Ульянац», «Акша сёрал» и мокшэрзянь лия моротне. Хоронди обработкать кой-конатнень коряс тиине монць.
«Умаринась» стаки якай гастрольс Мордовиять и Россиять келес, творчестванц кельгсазь ламотне. Кепси мяль, што странаньконь ламоц ошензон и велензон эзда ломаттненди ули кода содафтомс мокшетнень и эрзятнень национальнай культураснон мархта.
—Мезе азолеть «Культура» национальнай проектть эряфс ётафтоманц колга?
—Кирдемок мяльса «Культура» национальнай проектть, «Умаринать» васенце задачац—тиемс мокшэрзянь национальнай творчествать сядовок кельговиксокс, вятемс мороньконь и кштиманьконь мархта сотф пропагандать стане, штоба колганза содальхть и сонь кельголезь сай пингонь поколениятне. Концертоньконь пингста тонафттама патриотизмати, родинаньконди кельгомати. Васенце тевоньке—мокшэрзянь народнай творчествать ванфтомац, виияфтомац и кемокстамац.
—Ансамбльть репертуаронц арьсемста кодама мяль шарфнетяда патриотическяй ширети?
—Мярьголень, аф ёмла. «Умаринать» репертуарсонза ули «Сражаюсь. Верую. Люблю» патриотическяй башка блок, конанди сувсихть 7 произведеният. Кой-коста концерттнень пингста тевс ноляви марнек, кой-коста—несколька произведения, мяльс сявови коса ётафтови концертсь, мезти сон лемтьф. Патриотическяй блокса участиянь примай артистоньконди стафтоме военнай и патриотическяй тематнень мяльса кирдезь, башка щапт.
—Наталья Ивановна, ламотне кулендсть «Умаринать» видеса «Яблонька» идень вокальнай и «Яблонька» идень танцевальнай студиятнень колга. Азонтт, пожалуйста, колгаст сяда крхкаста.
—Мекольдень кизотнень ансамбльть видеса работайхть «Яблонька» лем мархта кафта студият, коза сашендыхть занятияс 5 кизоста сявомок 14 кизосотненди молемс итть. Аноклатама од артистт. Кда марнек группаста хуш, мярьктяма, кафта балетнай ломатть касыхть и сотсазь эряфснон тя профессиять мархта—тя ули пара. Тяфтама работа вятихть профессиональнай ламоц коллектифне. Миньцонк васенцекс эвондась «Яблонька» идень танцевальнай студиясь, сяда тов—«Яблонька» идень вокальнай студиясь.
Эрь кизоня сентябрьста кочксетяма ширезонк сай шабатнень эзда группат. Мархтост занятиятнень ётафнесазь минцень артистоньке. Сяс, кда няйсасть, што шабатнень эса ули вокальнай или кштимань асуши—вятесть сонь ширезонк. Пади, «Яблонька» студиятнень эса сонь вастоц.
—Спасиба, Наталья Ивановна, мялень салай корхнеманкса!
Татьяна Альшина.