Пензань модаста вятьсы ушетксонц мокшэрзянь народть эвондамац, или, кода корхтайхть учёнайхне, этногенезоц. Минь эрадонк инголе I тёжянь кизоста мокшэрзятнень атянь-атясна, городецкяй археологическяй культурань финноязычнай племенатне, кочказь эряма вастокс Волга и Ока ляйхнень ёткснон. Ся пингть шачсть мокшень и эрзянь кяльхне. А минь эраньконь ушетксста городецкяй археологическяй культурась «кассь» древнемордовскяйти. Тянь колга азондыхть Пензенскяй областьса мокшэрзянь сембода кунардонь пингонь археологиянь памятникне—Старшай Селиксенскяй, Усть-Узинскяй и Ражинскяй могильникне (минь эрань II—V векне).
Пензань модаса сембода кунардонь поселениякс лувондовихть мокшеннетне. Археологиянь даннайхнень коряс, Кижеватово инь сире велесь вятьсы историянц III векста сявомок. 1963 кизоти самс сон лемневсь Селиксакс.
2002 кизонь переписть даннаензон коряс, мокшэрзяда Пензенскяй областьса 10 процентт ломаттнень марстонь лувксснон эзда. Народоньконь ламошкац эряй Пензаса—11997 ломань. Лама мокшеда Мокшанскяй, Наровчатскяй, Шемышейскяй и Белинскяй райоттнень эса. Мекольцесь сембода содаф Даньшино велеть коряс.
Даньшиноса фкявок ила аф ётни Вера Акимовна Болотниковафтома и Татьяна Фёдоровна Экомасовафтома. «ДаншиноFest» и «ДаншиноFashion» тяниень пингонь фестивальхнень эса синь эсь щамснон, мороснон мархта кирдьсазь сотксть кунардонь пингть мархта и няфтьсазь, што Даньшинось эвондась аф фкя сяда кизода инголе и эсонза кемотольхть народоньконь коенза и обуцянза.
Мокшаватне инголи кочксевсть башка коллективс, сисемнест морсесть мокшень кунардонь морхт. Тяни лядсть кафонест. Но тявок аф шоряй пуропнемс концертт. Вера Акимовна сонць тяшни сиде моронят, лемнесыне синь Даньшиноти, велеряйхненди. Татьяна Фёдоровна марнек эряфонц лемдезе культурати, ульсь велень клубса заведующайкс. Шачемас коре Пяркино шабра велеста, а Даньшинов лиссь рьвакс.
Вов кода сон лятфнесы одкс пингонц: «Рьвакс тумстон пираваме ниле шит. А целайнек инголи свадьбатне ётнесть тяфта. Васенце шиня стирть вастонзон каннезь цёрать шири. Мяляфтса, кода повфнесть вальмятненди стирть ширеста кантф занавескат, атцесть васттнень лангс покрывалат. Омбоце шиня, ёткшиста, цёрась и стирсь, кафцьке ширде раднятне тушендольхть цёрать шири гуляндама. Пачкотькшнемс велеста велес ашель мезьса, стирть вятнезь ялга. Пяркиноста Даньшинов кафтошка вайгяльбе. Недляшиста молельхть меки стирть ширес. Нилеце шитьке ётафнезь весяласта марса. Шратне аф пяк козятольхть: лопафтф марьхть, помидорат, куярхт, пянакудса пидеф лям.
Даньшино велеса, кода и мокшень лия велетнень эса, инь оцю илакс лувондовсть Тройцясь и тялонь Миколась. Тройцяста арсесь койкс луга лангса тюремась. Тюренкшнесть фкя-фкянь мархта мес-бди мокшетне и русне. Лугати ётнеме ляйнять пачк. Цёратне уезь ётнезь, а минь мушендоме сяда маця вастоня и ётнеме ляйть омба трвазонза. Лугать Тройцянь илати лядендезь. Мокшаватне щашендсть мокшень панархт, озсесть кужеть лангс и морсесть-кштишендсть.
Цёратне Тройцянь ингольдень веть якасть келувонь тарадонкса, шобдава путнезь синь вальмятнень алу. Атцезь кудть тишеса.
Пяк учсть Роштувать эса. Тя шиня веть цёратне най яксельхть славандама. Стирьхне ся пингть ащесть кудса, пицесть пянакудса лофца, пачат.
Пяк козя и эсь лацонне мокшень щамоньке. Тяфтама щамсь васьфневи аньцек Пензенскяй областень Белинскяй районца. Щавазе эряфоньберьф якась тяфама щамса. Иласта сяда козяста наряжакшнесть: щашендсть цифкс, сотнесть атласнай руця. Сембонь стакшнезь эсь кядьсост».
Тяниень пингть Вера Акимовна и Татьяна Фёдоровна сетьмошиса ётафнесазь эряфонь сёксеснон. Шачема велесост тиендихть кудонь тефт, покодихть перенясост. Но мзярда Даньшиноса ётафтови оцю ила, синь юкснесазь марнек сярятьфснон и пичефксснон. Шарьхкодьсазь: эряви няфтемс од ломаттненди, кодамот синь—Пензань мокшетне. Кодама козя и эсь лацонне синь народсна и культурасна!
О.Белкина.