Ёткшиста, 23 декабрьста, А.С.Пушкинонь лемса Национальнай библиотекаса ётафтовсь Мордовскяй (мокшень и эрзянь) народть межрегиональнай общественнай организациянц Исполкомонц заседанияц. Сонь вятезь организациять председателец Юрий Мишанин и Исполкомть председателец Татьяна Ларина. Мероприятияса примасть участия МР-нь Оцюнять и МР-нь Правительствать Администрацияснон Руководителец Булат Хайрутдинов, РФ-нь Федерациянь советонь Сенаторсь Пётр Тултаев, МР-нь Оцюнять и МР-нь Правительствать Администрацияснон Внутренняй политикань управлениянц руководителец Александр Ратников, МР-нь культурань, национальнай политикань и архивнай тевонь министрть васенце заместителец Александр Карьгин.
Пуромксс сашендсть Исполкомонь члеттне аф аньцек Саранскяйста и республикань райоттнень эзда, но и Нижняй Новгородста, Ульяновскяйста, Москуста и Московскяй областьста, Челябинскяйста, Саратовста, Чувашияста, Пензаста и лия вастста.
Юрий Мишанин эсь выступлениясонза тись итокт тушенды кизонь работати, азозе, кодамот организациять планонза эряенди. Лятфтафоль, што республикасонк и лия региоттнень эса, коса компактнайста эряйхть мокшетне и эрзятне, 2023 кизоня ётафтфоль лама мероприятия. Нят: «Россия» Международнай выставкась-форумсь, «Шумбрат», «Шумбрат, Мордовия!» фестивальхне, «Марса/вейсэ—Мы вместе» од ломанень форумсь и лиятне, коса эсь пряснон няфтезь мокшэрзянь народть общественнай организациянц членонза.
Юрий Александрович отмечазе, што национальнай кизефкснень лангс башка мяль шарфни Мордовиянь Оцюнясь Артём Здунов, лятфтазе, што МР-нь Госсобранияти эсь Посланиясонза сон сисемксть пшкядсь шачема-касома кяльсонза—эрзякс, мезть мархта нинге весть няфтсь кепотькс ламотненди. Юрий Мишанин азозе и сянь, што аф кунара ульсь васедемац МР-нь Правительствать Председателенц Дмитрий Поздняковонь и МР-нь Оцюнять и МР-нь Правительствать Администрацияснон Руководителенц Булат Хайрутдиновонь мархта, конатнень ширде муфоль шарьхкодема национальнай кизефкснень коряс.
Лама тевда сави пяшкодемс сай кизоня. Тяни ни ушедовсть анокламат Мокшэрзянь народть 8-це съездонцты, конань арьсекшневи ётафтомс 2024 кизоня. А «Шумбрат» илась васенцеда ули Челябинскяй областень Варненскяй районца.
Сай кизоня странаньконь учендсы политическяй оцю события—РФ-нь Президентонь кочкаматне. Юрий Александрович мярьгсь, што Владимир Путинда башка лия кандидатура сон аф няи.
Булат Хайрутдинов азсь приветствиянь валхт Мордовиянь Оцюнять Артём Здуновонь эзда. Сон азозень эсь мялензон-арьсеманзон республикань эряйхнень колга, конатнень ёткса мусь ни аф кржа ялга. Булат Фирдинатович шарфтсь мяль ся задачатнень лангс, конат ащихть инголенк тяни и конатнень колга эряви мольфтемс корхтама съездть пингста.
—Аф ваномок историческяй стакатнень-сталмотнень и демографическяй прябалатнень лангс, мокшэрзянь народти удалась ванфтомс эсь козя национальнай культуранц и марстонь национальнай самосознаниянц. инголенк ащи задачатнень ёткста фкясь—виияфтомс общегражданскяй российскяй идентичностть. Российскяй этническяй ламошись—тя оцюдонга оцю козяши. Но кой-кона аф пара вийхне тяряфнихть срафтомс-калафтомс семботь, сяс эряви кирдемс марса, марса ащемс каршезонк молематненди,—мярьгсь Булат Хайрутдинов.
Тяконь колга корхтась и Сенаторсь Пётр Тултаев. Сон тердсь кемокстамс фкя-фкянь ёткса ялгаксшить, аф нолдамс сялондоматнень-кяжиякшнематнень. Тяда башка, Пётр Николаевич шарфтсь мяль национальнай СМИ-тнень прябаласнон лангс, тя, васендакиге кадрань аф сатнемась. Азсь мяль панжемс Образованиянь министерстваса этнокультурнай тонафнемань отдел.
Пуромфне мольфтсть корхтама «Легенда о Нарчатке» спектакльть колга—эряви-аф сувафнемс тяфтама проекттненди «Келу» фольклорнай ансамбльть, а стане жа «Варма» этно-арт-театрать квалма—азфтольхть мяльхть-арьсемат сонь щамонь коллекциянзон колга.
Заседаниять пингста максфтольхть казнет. МР-нь Госсобраниять Почётнай грамотанц мархта казьф Челябинскяй областьста Ольга Лысенко. Казьфтольхть и ся од ломаттне—М.Е.Евсевьевонь лемса МГПУ-нь и Н.П.Огарёвонь лемса МГУ-нь студенттне, конат сембода лац няфтезь информационнайста «Марса/вейсэ—Мы вместе» од ломанень форумть.
Ольга ЕВДОКИМОВА.