Атюрьевскяй райононь Перевесье велень библиотекаса вов ни лама киза работай Т.А.Тремасова. Ломанць панжада седи, ару вайме, пяк кельгсы тядянь-алянь мокшень кяленц, лац содасыне и ванфтсыне велень койхнень-обуцятнень. Коса примси участия Татьяна Акимовна, тоса илаське ётни мяляфтовиста, мялень салайста.
—Велень ломаттне кельгсазь морамаснон, коень-обуцянь ванфтомаснон,—корхтай велень библиотекарсь.—Мзяра цебярь ила аноклакшнеме, ётафнеме. Мзяра концертса примсетяма участия, сембонь лемсна афи лятфтавихть. Лятфтаса, кепотьксонди, «Шумбрат, Мордовия!» Народнай творчествань республиканскяй фестивальть. Ашель нинге стама киза, штоба эсонза афолеме прима участия. То моратама, то велень эряфть колга сценка путтама, то выставкас экспонатт кочкатама.
А мзяра казнедост. Диплопт, Почётнай грамотат, Благодарностть.
Ськамот, конешна, мезевок аф тият. Т.А.Тремасовать библиотекац фалу пяшксе ломаньда. Ётафневи мероприятиятнень эса заняфт школаса тонафнихне, учительхне. Велеряйхневок аф лядондыхть ширеса. Сембонь лемсна афи лятфтавихть. Синь эздост пяк лама.
Татьяна Акимовнанди оцю лезкс аф тёждя тевсонза максси семьяц. Аньцек шнамань валхт азомат мирденц, Иван Васильевичень, колга. Аш стама тев, кона теенза улель ба аф вийс коре. Рьванцты лезни эрь тевсонза. Кафта стирьсна, Татьяна и Вера. Касыхть кафта уноксна, Виктория и Алиса, конат кельгсазь эсь щаваснон-щятяснон.
—Эрь вастса эряви покодемс,—корхтай Т.А.Тремасова.—Кодама велень ила пачафтома, цюкорфтома, позафтома. А синь менельста аф прайхть. Шапакссь шоряма. Позаське аф эрти тиеви. Перьфканза возяма.
Но мезе афолеме корхта, Перевесье велень поселенияса эряфсь лаказь-лакай. И тянкса аф кржа вий максси трудонь кельги мокшавась Т.А.Тремасова, кона лия велеряйхнень мархта ванфты велень койхнень-обуцятнень эса. А эрь ётафтф илац кеподи мяль.
И.Петров.
Снимкаса: ётафтови велень ила. Эсонза
примайхть участия В.Д.Полькина, М.Я.Паркина, В.В.Тремасова, Т.А.Тремасова.
Гармонияса морай Н.В.Бланкин.