«Вастомась» удалась!

9 сентябрьста Пензенскяй областень Шемышейскяй райононь Шемышейка рабочай посёлкаса ётафтовсь национальнай оцю ила—«Вастома» мокшэрзянь культурань Межрегиональнай фестивальсь. Аноклаец-ётафтыец Пензенскяй областень Мокшэрзянь региональнай национально-культурнай автономиясь, конанди тядде топоди 20 киза. Тя эсь лацонь юбилейти и лемдевсь тя кизонь фестивальсь. Иласа примасть участия мокшень и эрзянь творческяй коллектифт, мастерхт областень райоттнень и шабрань региоттнень эзда—Мордовия Республикаста, Саратовскяй и Ульяновскяй областьста.

Шобдаваста сявомок Уза ляйть трваса келептевсть народнай художественнай промыслань и декоративно-прикладной творчествань выставкатне, коста ульсь кода няемс машты кядь ломаттнень работаснон и рамамс мяльс коре сувенирхт. Няфтьфтольхть национальнай налхксематне, мазыста тифтольхть «Мордва Пензенской области» фотовыставкась, «Мокшэрзянь подворьятне», эрь-кодама тематическяй площадкатне. Пидемань-панемань зонаса ульсь кода варжамс вийхнень национальнай ярхцамбялень пидемаса.

Илас сашендсь почётнай лама инжи, тяконь лувксса Пензенскяй областень губернаторсь Олег Мельниченко. Фестивалень участникнень приветствовандамста сон шарфтсь мяль сянди, што нинге лама векта инголе Пенза аймаконь модатнень лангса эрясть мокшэрзятне. Тяса, Шемышейскяй райононь Усть-Уза и Армиёва велетнень ёткса мордвась эвондась кода этнос, кода этническяй группа, мезсь кемоксневи археологическяй ламоц муфкснень мархта.
«Сяс пяк лац тиф, мес Мокшэрзянь региональнай национально-культурнай автономиять 20 кизонь топодемстонза тя мероприятиясь ётафтови именна тяса, тя мазы вастса,—мярьгсь Олег Мельниченко.—Мялезе поздравляндамс сембонь илать мархта. Мокшэрзянь автономиясь пяк активнайста работай. Минь няйсаськ тянь ётафневи мероприятиятнень лувксснон коряс, а сядонга пяк касфни мяль ся, што мероприятиянь участникокс арси коль сяда лама од ломань. Кода мярьгонди Президентоньке Владимир Владимирович Путин, минь виеньке—ся нароттнень ламошиснон эса, конат эряйхть странаньконь территорияса».
Губернаторсь стане жа азозе, што Пензенскяй областьса эряфс ётафневи аф кржа мероприятия и проект, конат сотфт Пензенскяй масторть историянц мархта. Тяконь лувксса тяштеви крайть академическяй историяц. И эсонза ули раздел, кона лемдеви мокшэрзянь народть эвондаманцты-пуроптоманцты.
«Пяк важна ванфнемс и виияфнемс нароттнень культураснон, штоба сон эряль, пачфневоль поколенияста поколенияс!»—китькстазе региононь оцюнясь. Сон макссь казнет седикс-ваймокс покодеманкса и национальнай культурать ванфтоманцты путксонкса Пензенскяй областень Мокшэрзянь региональнай национально-культурнай автономиять председателенцты Елена Первушкинати и лиятненди.
Стане жа илань участникнень и инжихнень приветствовандазь Пензенскяй областень Законодательнай Собраниять председателец Вадим Супиков, Пензенскяй областть эзга главнай федеральнай инспекторсь Сергей Щёткин и Шемышейскяй райононь оцюнясь Александр Власкин.
Сяда тов вал максфоль Мордовиянь инжихненди. Илать мархта пуромфнень поздравляндазь Мордовскяй (мокшень и эрзянь) народть Межрегиональнай общественнай организациянц председателец Юрий Мишанин и Российскяй Федерациянь финно-угорскяй нароттнень Ассоциацияснон председателенц Пётр Тултаевонь помощникоц Евгений Щукин.
—Пензенскяй областть и Мордовия Республикать ёткса кунара ладявсть кеме соткст,—мярьгсь Юрий Мишанин.—Пензань модать лангса кассь мокшэрзянь содаф лама поэт и писатель, общественнай деятельхть, Пенза ошса эвондась мокшень кяльса васенце газетась. И тячи тяса, Шемышейкаса, мялезе лятфтамс легендарнай земляконтень, мокшэрзянь народть асу цёранц, академикть Николай Сергеевич Немцевонь лемонц, кона лама пинге ульсь Н.И.Вавиловонь лемса Растениеводствань Ульяновскяй всероссийскяй институтти директоркс. Сюкпря тейть тяфтама ломаненкса, Шемышейскяй мастор!
Юрий Александрович поздравляндазе Пензенскяй областень Мокшэрзянь региональнай национально-культурнай автономиять 20 кизонь топодеманц мархта и макссь казнет автономиянь руководствати и активисттненди.
Евгений Щукин лувозе Россиянь финно-угорскяй нароттнень Ассоциацияснон председателенц Пётр Тултаевонь приветственнай адресонц. Эсонза корхтавсь: «Мокшэрзянь региональнай национально-культурнай объединенияти сувсихне—тя аф озадонь седихть ащекшни ломатть, конат пичедихть эсь народснон, шачема-касома регионцнон, странаснон судьбаснон инкса. Эсь пара тевонтень мархта тинь лезнетяда ванфнемс и виияфнемс тядянь-алянь кяльть, культурать, сире пингонь койхнень-обуцятнень».
Сяльде илас пуромфненди лямбе валхт азсть Саратовскяй областень представительхне. А меле сценать лангс фкя-фкянь мельге лисендсть эрь-кодама уженяста саф творческяй коллектифне и артисттне. Пуромфнень мяльснон салазь Мордовияста авторть-исполнительть Андрей Барашкинонь и «Морденс» арт фолк-группать выступлениясна.
Ольга Евдокимова.

Последние новости

«Ялгаксшинь каштазсь» пуропнезень мокшетнень и эрзятнень

13 июльста Оренбургскяй областень Абдулино ошса ульсь «Масторава» ила,...

КАТК СЕМБЕ АРЬСЕФСЬ ЁТАФТОВИ ЭРЯФС!

Вов ни мзяроце кизось мельцек пара койс коре Поволжьянь...

Лидерствань национальнай школась пуропнезень од ломаттнень

Ётай недялять, 4-5 июльста, Саранскяйса ётафтовсь «Лидерствань национальнай школа»...

В Мордовии внедрен безбумажный электронный документооборот

В рамках регионального проекта «Цифровое государственное управление» национального проекта...

Предпринимателей Мордовии научат создавать короткие видео-«REELS»

Министерство экономики, торговли и предпринимательства РМ совместно с Центром...

В Мордовии развивается система патриотического воспитания

В рамках регионального проекта «Патриотическое воспитание граждан» национального проекта...

Бизнес-десант посетил Ромодановский и Лямбирский районы

Третий год в Мордовии в рамках национального проекта «Малое...

«Ялгаксшинь каштазсь» пуропнезень мокшетнень и эрзятнень

13 июльста Оренбургскяй областень Абдулино ошса ульсь «Масторава» ила, конань аноклазе и ётафтозе «Мокшэрзянь культурнай центрась». Праздниксь пуропнесь сядот мокша и эрзя, тяконь лувксса...

КАТК СЕМБЕ АРЬСЕФСЬ ЁТАФТОВИ ЭРЯФС!

Вов ни мзяроце кизось мельцек пара койс коре Поволжьянь ошнень эзга ётафневи «Волга—река мира. Диалог культур волжских народов» Международнай этнокультурнай экспедициясь-фестивальсь. Тядде сон пуропневсь...

Лидерствань национальнай школась пуропнезень од ломаттнень

Ётай недялять, 4-5 июльста, Саранскяйса ётафтовсь «Лидерствань национальнай школа» лем ала форум. Сонь аноклазе и ётафтозе «Российскяй Федерациянь финно-угорскяй нароттнень Ассоциациясна» общероссийскяй общественнай организациясь...