Эрь мокшень велеть сонцень историяц, коенза-обуцянза, щамонза, шнама ломаненза. Но пингсь полафни, ужяленди, ламось юксневи, тушенды историяв. И аньцек тоса, коса минценнесь путневи васенце вастти, коса аф юкснесазь атянь-атяснон койснон-обуцяснон, ванфтсазь велеснон историяснон, тоса ули мезе азондомс и няфтемс од поколенияти.
Ковылкинскяй райононь Мокшень Коламаз велеса тяфтама вастокс арась велень краеведческяй музейсь. Тяса кочкаф сатомшка материал, эрь кодама экспонатт, штоба шарьхкодемс, кодамоль велеса эряфсь ингольдень пинкнень, кодама кядьгонят путневсть шра лангс, коса ванфневсть лофцсь, почфсь, кшись, мезьса кунцесть калхт, кодама сюреста и кодама станокса котцесть панархт, авань щапт. Музейть пуроптомаса оцю путксоц мокшавать, велень библиотекань заведующайть Раиса Алексеевна Канайкинать. Сон ся ломаттнень эзда, конат афкукс пичедихть эсь народоньконь историянц, коензон-обуцянзон ванфтоманкса, шнакшнесазь ся сембе цебярть, мезе ульсь мокшетнень эряфса инголи.
—Музейсь тя стама уженя, коса сембода лац шарьхкодьсак, кода ладяфоль атянь-атяньконь, бабань-бабаньконь эряфсна,—азонды Раиса Канайкинась.—Сявсайть кядезт и ванондсайть ня экспонаттнень, тязк марят гордость ся асу, машты кядь ломаттнень инкса, конат семботь тянь тиендезь. Мзяра маштомоши эряви, штоба анокламс сяка жа сюрьхцемть, лофцонь пихтема парьнять, лапамать, эвгонть, карьхнень, лия мезть. Тяни няк сембось тиендеви эрь кодама машинатнень, автоматтнень, станокнень вельде, а ингольдень пингть аньцек эсь ёньца арьсеф, эсь кядьса тиезь. Ламось мезсь тиендевсь шуфтста, павазонди, тяфтама паршиса мокшэрзянь масторсь фалу козяль.
Велень музейсь арась мялень салай вастокс кода од ломаттненди, стане эряфкшуфненди. Кда васенцетне аньцек-аньцек содайхть ня экспонаттнень колга, лиятне лятфнесазь ся пингть, кода тя сембось нолявсь тевс. Мокшень Коламаз велеса аф кржа тяфтама эряфкшу ломаньда, конатненди мяляфтови сире пингонь эряфсь. Тя синь виень аф ужяльдезь покодсть ферматнень эса, касфнесть сёра, строясть кутт, кода маштсть ванцть китнень мельге. Велень музейса теестка панчф уженя, коса кочкафт синь биографиясна, фотографиясна.
Тяда башка, Р.А.Канайкинась оцю мяль шарфни мокшень кяльть и литературать ванфтомаснон лангс. Велень библиотекаса пцтай эрь ковня кочксевихть выставкат, коса азонкшневи марнек республиканьконь эряфонц колга, мокшэрзянь литератураса, эсь кялень вятемаса однять, писательхнень и поэттнень творчестваснон квалма.
—Мон кельгса эсь работазень и семботь, мезьса заняфан, най тиендьса мяль вельде, седи ваксста,—мярьгсь Р.А.Канайкинась.—Тейне лездыхть школаса тонафнихне, синь тядясна-алясна, велень администрациясь. Веленьконь историяц—тяса эрь шачфть историяц. Аньцек кажнайть сонцень пингоц и мезе сон кенерсь тиемс эряфса, мезе кадсь вандыень шити, лия шачихненди.
Н.ЛОБАНОВ.