Вирь Келгужась терди инжихть!

Вирь Келгужа—тяфта мокшекс мярьгихть Темниковскяй райононь Лесное Цибаево велети. Тячиень шити тоса эряй 68 ломань, сембоц 20 куд. 2008 кизоня сёлгозь кафта этажса оцю школать. Велень кафта шабатнень-ученикнень усксесазь Темников ошень школав. Вирь Келгужаса улихть фельдшерско-акушерскяй пункт, библиотека, аф кунара строясть од церькав. Виде, нинге ашезь панжев, аф сембе тефне педа-пес шумордафт.

Аф оцю веленясь арась ламоц туристтненди кельгома вастокс. Инжихне пачкотькшнихть лия регионцта или Мордовиянь райоттнень эзда. Мзяра киза мельцек Вирь Келгужав мокшень кяльть и культурать мархта содафтома сашендсть «Экономикань высшай школась» Национальнай исследовательскяй университетонь студентт Москуста. Кочкаф материалхнень коряс 2018 кизоня синь нолдасть «Элементы мокшанского языка в типологическом освещении» книга. Тядде Н.П.Огарёвонь лемса Мордовскяй госуниверситетонь филологическяй факультетонь студенттне кочказь велеть диалектнай практикань ётафтоманди вастокс. Содаф ведущайсь Джон Уоррен снимандазе тоса «Поедем, поедим!» программанц. Тядде «Пятница» телеканалти Вирень Келгужаса аноклавсь «Гастротур» передачась.
Мокшень этно-кудсь
Мзярда аньцек пачкодят Вирь Келгужав, арьсезеват, бта велесь юмама-арама лангса. Но тя аф тяфта! Велеть лемоц содаф марнек республикаса. Мзярда велеряйхнень лувкссна кирсь, сёлговсь школась, Культурань кудтьке ёрасть пякстамс. Но велень активисттне арасть каршек. 2016 кизоня петезь ташта зданиять и тисть тоза этнографическяй музей, тяфта и лемдезь—Мокшень этно-куд. Тяни тя уженясь—марнек Темниковскяй районть шнама вастоц.
Ламоть культурать кирдемаса тиендьсазь синць велеряйхне. Кодак суват Мокшень этно-куду, эстокиге поват кунардонь пингонь эряфти, мзярда атяньке-бабаньке явафтсть пянакуд, пидесть-панцть тоса ярхцамбяль, якасть мокшень щамса. Кудсь пяшке эрь кодама паршида. Лангозост тяшнефт мокшень лемсна, штоба инжихненди сяда тёждя улель лятфтамс. Этно-кудть руководителец мокшавась Валентина Юрьевна Лискина азондозе, што сембе ня экспонаттнень ушедсь кочксемост сонць. Мзярда работась школаса начальнай классонь учителькс, валом-валом пуроптсь мокшень уженя, вельденза ёрась няфтемс шабанятненди, кодамоль эряфсь инголе. Школать сёлгомда меле Валентина Юрьевна ётась работама велень Культурань куду и кандозе тя мяленц и козяшинц мархтонза. Шиста шис предметтнень лувкссна кассь. Ламонц велеряйхне синць каннезь сире пингонь паршиснон, няезь, што музейса синь сяда эрявихть.
«Пяк лама макссесть мокшень панарда, арзяда, кукшеньда, шкафта. Ломаттне каннезь синь седи ваксста. Тя инь питнись»,—азонды В.Ю.Лискина.
Мзярда велень Культурань кудсь арась Этно-кудкс, эзонза марасть пянакуд. Тянемс тоса пицихть танци лям, ям, инжихне синць панцихть пачат. Но аф аньцек пидеманди пянакудсь эрявсь. Тядде октябрь ковти молемс Культурань кудса ашель отопления. Эжендсть азорхне и инжихне мороть и пянакудть вельде. Тяни Темниковскяй райононь администрациять лезксонц вельде Мокшень этно-кудти нолдасть газ.
«Кизоста кизос тяряфнетяма арьсемс мезевок одня, тердемс нинге сяда лама инжи, виияфтомс велеса культурнай эряфть. Лятфтаса, кода 2016 кизоня Ярославль ошста кудозонк сашендсть васенце туристтне—25 ломань. Няйфть эзда мянь тушендсть сельмоведьсна»,—мярьгсь Валентина Юрьевна.
«Лаймоня» народнай коллективсь
Фкявок оцю и ёмла ила Вирь Келгужаса аф ётни «Лаймоня» народнай фольклорнай ансамбльфтома. Сон пуроптфоль 1976 кизоня. Ансамбльть репертуаронц оцюшкац ащи кунардонь обрядовай мороста. Кой-кона моротнень ётафнесазь рузоннеста и эрзяннеста мокшень кяльс. Улихть авторскяй моротка. Коллективть ингольдень руководителец Татьяна Павловна Резепова «Россия—это мы» республиканскяй фестивальти сёрмадсь мокшень мора, конань тяфта и лемдезе—«Россия». Ули моросна, конань лемоц «Лаймоня». Мокшаватне морсесазь Мордовиянь содавикс композиторхнень мороснон, а кой-коста сявондьсазь мокшень поэттнень стихотворенияснон и арьсихть мотив синць.
Татьяна Сергеевна Шнякина морси ансамбльса пцтай 30 киза. Лятфнесы: «Ансамбльсь васенда лемневсь «Лесное Цибаево велень культурань кудонь самодеятельнай народнай творчествань коллектив». 2001 кизоня «Темниковская свирель» районнай фестивальса мярьгсть арьсемс лем. Пингсь тундаль. Панчсь лаймось. Тяфтама мазы лем и максоме коллективоньконди—«Лаймоня».
Коллективть маштомошинц колга корхтайхть концерттне. Мокшень моросна кайгсть Коми, Чувашия Республикатнень эса, Москуса, Рязаньца, Санкт-Петербургса, Пензаса, Крымса.
«Весть районнай иласа лангозонк шарфтсь мяль Крымста саф предпринимательсь. Сон тердемазь концерт мархта Крыму, пандозень кинди ётафтф карьхцнень. Васендакиге арьсеме, што кулхцондомонк лама ломань аф сай, сяс мес концертоньке ётнесь фкя пингста Ефим Шифринонь выступлениянц мархта, афишаньке ащесть ряцок. Но ломаньда пяшксель! Вестевок аф юкстасаськ Чёрнай морять трваса выступленияньконь»,—азонды коллективть участницац В.Ю.Лискина.
Тяниень пингть «Лаймоня» народнай коллективсь аноклай «Шумбрат, Мордовия!» Народнай творчествань республиканскяй фестивальти, кона ётафтови 30 октябрьста Темников ошса. Концертти тонафнихть кунардонь пингонь мора, лемоц «Охай тядякай».
«Тядде фестивальсь лемдеви патриотическяй темати. «Охай тядякай» морось—тя эсь лацонь молитва, конань вельде озонттама Шкайти, штоба сон ванфтолемазь, штоба афоль уле война. Мороть содаса нинге тядязень тядянц эзда»,—мярьгсь коллективть руководителец, Мордовия Республикань культурань Заслуженнай работниксь Александра Васильевна Путилина.
Тяниень пингть «Лаймоня» народнай ансамбльса морсихть 7 ломатть. Синь аф аньцек Вирь Келгужаста, но и шабра велетнень эздонга. Культурать эряви пачфнемс поколенияста поколенияс! Сяс коллективть видеса мокшаватне панчсть од ломанень ансамбль, лемдезь «Лаймарькс». Эсонза морсихть од стирьхть и стирнят.
Молочниконь кудсь
Темниковскяй райононь туристонь нинге фкя вастокс арась Вирь Келгужа велеса Молочниконь кудсь. Сон панжевсь 2019 кизоня велень библиотекарть, школань ингольдень директорть Анна Леонтьевна Нечайкинать мяленц коряс. «Кда аф мон, эста кие тянь тисы!?—тяфтама валста ушедозе азондоманц Анна Леонтьевна.—Мзярда аньцек арань директоркс, школаса тонафнесь 100 лама шаба. Тяни иттне сашендыхть вели аньцек ваймама, но теестка эряви няфтемс, кодамоль сире пингонь эряфсь». Молочниконь кудть тиеманкса Анна Леонтьевна рамась велень ташта кудня и пяшкодезе сонь эрь кодама паршиса: ули пянакуд, удома васта, нюрям, ташта телевизор, кукшетть, сяканят-месть. Ламоц экспонаттнень вельде тозк нолдави лофцсь сепаратор пачк, тиеви вайвелез, пихтеви вай, аноклави мичке.
«Велесонк кунардонь пингста сявомок кирнесть тракст. Аньцек минь кардсонк эздост нилель. Лофцсь сатнесь и эстейнек, и государствати мишендемс. А тяни велеряйхне лофцонь таньфтьке юкстазь. Тейне, кода велень ломаненди, пяк аф пара мялезон, што тя койсь юмси, юксневи. Сянкса и арьсине Молочниконь кудть»,—мярьгсь А.Л.Нечайкина.
Туристическяй объектть ваномонза сашендыхть туристт аф аньцек Мордовияста и странань лия региоттнень эзда, но и омба масторстовок. Аф кунара ульсть од ломатть Рязаньцта, Москуста, Санкт-Петербургста, Сирияста, мянь Панамаста африканецт сашендсть. Азоравась каванякшнесыне сембонь суронь пачада, суронь ямда, шапама, ламбама лофцта, мичкта.
«Капустки по-цибаевски» фестивальсь
14 октябрьста Вирь Келгужаса ётафтовсь «Капустки по-цибаевски» гастрономическяй илась, кона ушедсь вятевома 2018 кизоста сявомок. Варжамс мокшень капстатнень таньфснон састь марнек районцта — сембоц 300 лама ломань.
Тядде илась ётафтовсь нинге сяда келиста Грантть вельде, конань максозе районнай Культурань центрати Культурнай инициативатнень президентскяй Фондсна. Получаф ярмакнень лангс рамафтольхть кудня лаца палаткат, конат пяшксетольхть национальнай ярхцамбяльса. Фестивальть пингста велеса келемсь ярмарка, коса велень хозяйствань производительхне няфтезь эсь продукцияснон: медьснон, марьснон, сырснон. Няфтьфтольхть сувенирхтка. Тяфта жа ётафтовсь капстань керсемать, закваскань тиемать, кептернянь кодамать коряс мастер-класст.
Этно-кудти вяти аркать инголе инжихнень тердезь някатне—«капстась» и «мешсь». Сембе инжихнень васьфнезь пача мархта. Тяда башка, ульсь кода варжамс шурпать, парендаф капстать, калонь лямть, татаронь перемячть и танцти тише мархта чайть. «Лаймоня» народнай ансамбльсь няфтсь сире обряд, коса няфтьф сюконямась шкайхненди козя урожайть инкса.
«Пара мялезонк, мес тянемс ванфтови и няфневи од поколенияти капстань тапамань койсь. Инжихне илазонк сашендыхть эсь капста пряснон мархта. Ули капстань тапама сире пингонь очконьке. Иласта лихнесаськ сонь ульцяв, пяшкотькшнесаськ капстада и няфнесаськ, кода эряви тапамс капстать. Тапамда меле капстать салыяфнесаськ и кайсесаськ парьняс. А тяда инголе ётафнетяма обряд, коса сюконякшнетяма Шкайти цебярь урожаенкса. Сюконякшнетяма Ведявати, мес аруяфнесы эряфть, штакшнесыне сембе урматнень. Сюконякшнетяма Паксявати, мес трясамазь-андсамазь. Казнетка теест макссетяма, пицетяма лемозост суронь ям. Тяфта бславсесаськ: мзяра сяканять эса ямкскада, сняра максост Шкайхне ломаттненди эрьгада, тазашида, шумбрашида»,—шумордазе корхтаманц Валентина Лискина.
О.Белкина.

Последние новости

Нацпроект и снижение смертности при ДТП

В рамках национального проект «Безопасные качественные дороги» в Мордовии...

В Мордовии продолжается реконструкция районных домов культуры

Торбеевский дом культуры – центр притяжения всего района. Здание...

Дискуссия по развитию БРИКС прошла на Всемирном фестивале молодёжи

В рамках Всемирного фестиваля молодёжи в субботу, 2 марта,...

Саранск встретил март «Весенней ярмаркой подарков» 

1 марта в столице региона, при поддержке Министерства экономики,...

В Региональный сосудистый центр №2 поступает новое современное оборудование

Региональный проект «Борьба с сердечно-сосудистыми заболеваниями» национального проекта «Здравоохранение»...

ПОСЛАНИЕ ПРЕЗИДЕНТА

Инициативы Президента Владимира Путина по итогам послания Федеральному Собранию  29...

Благоустройство Дубенского района Мордовии

Центральная площадь вс. Дубенки, 2 общественные территории в с....

Нацпроект и снижение смертности при ДТП

В рамках национального проект «Безопасные качественные дороги» в Мордовии реализуется региональный проект «Безопасность дорожного движения». Одна из его задач – сокращение смертности в результате...

В Мордовии продолжается реконструкция районных домов культуры

Торбеевский дом культуры – центр притяжения всего района. Здание построено в 1974 году и давно требовало ремонта. В 2023 году по национальному проекту «Культура»...

Дискуссия по развитию БРИКС прошла на Всемирном фестивале молодёжи

В рамках Всемирного фестиваля молодёжи в субботу, 2 марта, прошла дискуссия «БРИКС: новые вызовы в эпоху глобального развития». На мероприятии также прошли дебаты «Приоритеты и...