Владимир Путин казезе Ялгаксшинь орденца мокшэрзянь композиторть Нина Кошелевать

Российскяй Федерациянь Президентсь Владимир Путин казезе Ялгаксшинь орденца композиторть, «Россиянь композиторхнень союзсна» Всероссийскяй общественнай организациять Мордовскяй региональнай отделениянц председателенц, мокшавать Нина Васильевна Кошелевать. Тянь колга указть алу государствань оцюнясь путозе кяденц 2023 кизонь 31 июльста.
Тяшка оцю казнеть Нина Кошелевати удалась сатомс отечественнай культурать и искусствать виияфнемаснонды путксонц, а стане жа лама кизонь цебярь творческяй работанц вельде.
Нина Кошелева—содаф и асу композитор, Мордовия Республикань Государственнай гимнать музыканц автороц, театральнай постановкатненди лама моронь и музыкань автор. Сон шачсь 1952 кизонь 1 июльста Старошайговскяй райононь Вертелим велеса. Шумордазень Л.П.Кирюковонь лемса Саранскяй музыкальнай училищать и Казанскяй государственнай консерваториять. 2002 кизоста сявомок вятьсы Мордовия Республикань Композиторхнень союзснон.
Нина Кошелева—Мордовия Республикань Народнай артистка, Мордовия Республикань искусствань Заслуженнай деятель, Российскяй Федерациянь искусствань Заслуженнай деятель, Россиянь Композиторхнень союзснон почётнай деятелец. Сон казьф лама казнеса. Нина Васильевнань музыкац кельгови Мордовияса, Россияса, омба масторса, лангозонза шарфнихть оцю мяль исследовательхне и музыковеттне. Композиторть произведениянза кайгондихть Москувонь, Санкт-Петербургонь, Казанень, Нижняй Новгородонь, Уфань, Сыктывкаронь, Чебоксарынь, Йошкар-Олань и ламоц лия ошнень концертнай залснон эса. Нина Васильевна заняф культурно-просветительскяй и благотворительнай тевса и эрь кизоня ётафни благотворительнай концертт и творческяй васедемат.