ВОВ ТЯФТАМА СОН,СИРЕ ТЕРИЗМОРГАНЬ МОКШАВАСЬ!

Сюреса сёрмады, кячкаскаса кодай, мазыста морай, инжихть примай-васьфти—тя сембось Старошайговскяй райононь Сире Теризморга мокшень велень мокшавать Наталья Кадеровать колга.
Наталья Семёновна—ёмла родинань афкуксонь патриот. Мзярда несколька кизос сашендовсь тушендомс эряма эсь райононь лия велес, седиец лажаткшнесь и усксь меки Сире Теризморгав. И Кадерофнень семьясна мрдась. Семботь тянь колга азонттама газетаньконь тячиень номерсонза.

Шачсь-кассь Наталья Семёновна Сире Теризморгаса Антонина и Семён Кукиттнень семьяса. Мирттне-рьвятне трудонь кельги ломаттельхть, шобдаваста шоподемс, виень аф ужяльдезь, покодсть велень фермаса и кудса.
Кукиттне шачфтсть-касфтсть ниле шабат—колма стирьхть и цёра. Наталья ёткстост лувксс коре колмоцесь.
Сире Теризморгань школать 8 классонц шумордамдонза меле Наталья Семёновна поступась Краснослободскяень совхозу-техникуму. Кочказе агрономонь тевть. Мес? А сяс, што эстонь пингть велетнень эса тяфтама специалисттненди вешфкссь пяк и пяк оцюволь.
Аделазе мокшень стирсь совхозть-техникумть якстерь дипломса и мрдась Сире Теризморгав. Пингонь ётазь Кукиттнень кудс кучсь кудат эсь велень мокшень удалаф цёрась Александр Кадеров. Наталья Семёновна и Александр Фёдорович марса тонафнесть Сире Теризморгань школаса. Мокшень цёраське шумордазе Краснослободскяень совхозть-техникумть, аньцек механизациянь отделениять.
Кадерофнень семьяса васенцекс шачсь стирьсна Татьяна. Эрясть синь Наталья Семёновнань тядянзон-алянзон мархта.
Несколька кизода меле тусть Старошайговскяй райононь Богдановка вели. Тостонь колхозса покодсть кемонь кизот. Мокшавась якась вазнятнень мельге, Александр Фёдорович пожарнай машинань водителель, трактористоль.
Стирьснонды полатне казсть дугання, конань лемоц Евгений.
И вов сембе ня кемонь кизотнень мокшавать седиец усксь Сире Теризморгав. Бта районцьке сякось, шачема велеське аф сяшкава ни ичкозе, но… Эста ашель ни шиса Наталья Семёновнань тядяц, Антонина Григорьевна (ужяль, эряфста мокшавась тусь рана), а аляц, Семён Васильевич, лядсь эряма эсь тядянц, Ольга Фёдоровнань мархта, конань мельге, шумбрашинц мяльса кирдезь, эрявсь якамс. Тяфта и мрдасть Кадерофне Сире Теризморгав и ушедсть эряма Семён Васильевичень ширеса. Работасть ветеринарнай участкаса, Александр Фёдорович—водителькс, Наталья Семёновна—лаборантокс.
2005 кизоста сявомок мокшавась работай Национальнай культурань Районнай центраса. Тевонц ушедозе музеень заведующайста, тяни тя вастть лемоц полафтсь, сяс Наталья Кадеровась—национальнай коень ванфтомань отделонь заведующай.
Национальнай культурань Районнай центраса мокшавась марясы прянц кода калсь ведьса: «уенди» тов-сей оцю мяльса. И эрь шиня азонды оцю спасиба Шкайти, мес эряфонь киц вятезе меки Сире Теризморгав, а меле—центрав.
Азома сявок, што Наталья Семёновнанди пяк лездсть сюреса сёрмадомаса, кодамаса маштомошинза, морамать мархта сотф асувоц. Гладьса сюреса сёрмадома, вндерняса кодама сон тонадсь школаса «Умелые ручки» кружокса, но лама мезти—тядянц эзда. Антонина Григорьевна сёрмадсь сюреса, сташендсь нулат, панархт. Сонь и авозенц, Ольга Фёдоровнань, пяк мазыхтельхть вайгяльсна, кулхцондомост ломатть сашендсть. Эздост ламоти тонадсть Наталья, сонь сестранза Татьяна и Вера. Кукиттнень сембе стирьснон пяк мазыхть вайгяльсна. Алясна «ялгаль» балалайкать мархта, дуганцна машты гармонияса морама.
Наталья Семёновна морси Сире Теризморгань Народнай хорса, дуэтса. Работазонза сувси аф аньцек экскурсиянь ётафнемась и морсемась, но и сюреса, ёмла ожнаса сёрмадомась, кячкаскаса кодамась. Ламотне сонь лемнесазь моронь ушедыкс. И тя афкукс тяфта.
«Вов ни лама киза работан Национальнай культурань Районнай центраса, кона Сире Теризморга мокшень велеса. Коллективоньке пяк цебярь. Фкя-фкянь шарьхкоттяма, фкя-фкянди лезттама. Оцю спасиба мялезе азомс центрать директоронцты Светлана Видясовати. Светлана Александровнанди ули кода маладомс хуш кодама кизефкс мархта»,—мярьгсь Наталья Семёновна.
Оцю мяльса сон азондсь Национальнай культурань Районнай центрав экскурсияс сашендыхнень колга. Тняра кизоста мокшавась и работас коре ялганза эздост васьфтсть пяк и пяк лама. И ётксост ульсть сят, кит меле центрав сашендсть нинге и нинге, усксезь мархтост ялгаснон и радняснон. Экскурсаттне ёрайхть сяда лама содамс аф аньцек мокшетнень койснон, ингольдень и тяниень пингонь эряфснон-ащефснон колга, синь эняльдихть центрань сотрудникненди хуш мезевок азомс мокшекс, а меле тянь ётафтомс рузкс. Сидеста экскурсионнай кочкаф программати сувси фольклорсь—мокшэрзянь мазы моротне. Кашт аф молезь инжихне кулхцондсазь мокшаватнень мазыдонга мазы вайгяльснон. Меле тяшнихть Национальнай культурань Центраса улемаснон колга седиста моли лямбе валхт—отзыфт. Пара, што экскурсияс сашенды пяк лама од ломань!
Корхни ялганьконь тядяц зрнянь кядь ломанель. сонь и бабаснон эзда стирензонды лядсть мокшавань щапт-каряпт: панархт, нулат, сёкт.
«Бабазень, Ольга Фёдоровнань, мокшавань нльне ташта щамонзонга тевс ноляйне: сташендонь эздост эстейне юбкат-месть. Кой-конатнень, сяда цебярьхнень, каннине центрать видеса музеи»,—азозе мокшавась.
Лац покодеманкса и сатфксонкса Наталья Семёновна казьф Мордовия Республикань Оцюнять Благодарностенц, Мордовия Республикань Государственнай Собраниять Почётнай грамотанц мархта, лама лия казнеса.
Кадерофне эряйхть семьянь азоравать тядянзон-алянзон кудса. Сире Теризморгаса эряй сестрац Вера Семёновна.
Александр Фёдорович ламос работась кочегаркс центраса, тяни покоди Москуса.
Наталья и Александр Кадерофнень стирьсна, Татьяна, аделазе Краснослободскяень медицинскяй училищать. Работась медицинскяй сестракс Саранскяйса. Меле лиссь рьвакс Чамзинскяй райононь Комсомольскяй посёлкань цёранди. Тяни работай тостонь больницяса хирургическяй отделениянь старшай медицинскяй сестракс. Сон и мирдец, Александр Михайлович, казсть Кадерофненди кафта унокт—Димань и Максимонь.
Цёрасна, Евгений, шумордазе Н.П.Огарёвонь лемса Мордовскяй государственнай университетонь Архитектурань и строительствань институтть. Эряй и профессияс коре работай Москуса. Меля рьвяясь.
Мзярда мокшень тя семьясь пуромкшни марс, шрать лангса лама лия танцти ярхцамбяльда башка, фалу улендихть мокшень пачат, конатнень пицесыне-панцесыне Наталья Семёновна. Сон нинге шабакс ванондозе кода тянь тиендьсы бабац. Центраса работамста пачань пицемась арась теенза кельгома тевонзон эзда фкакс.
Миртть-рьват Кадерофне и идьсна эсь семьяснон мархта марса улендихть Очижиста, Од кизоста, Роштуваста—тя шиня Александр Фёдоровичень шачема шиц. А сонць Наталья Семёновна шачсь Кльхчянянь Сочельникста—18 январьста, но шачема шинц мархта поздравляндакшнесазь 19 январьста.
Ётка пингстонза мокшавась заняф кудонь тефнень мархта. Кирдихть тувот, сараст, сяват. Инголи Кадерофне кирнекшнесть тракст, буканят. Лама пинге тундаста сявомок сёксети молемс веши пересь. Но мокшавась кудсовок сюреса сёрмады канвас, тии крганят, кодай…
Вов тяфтама сон, Сире Теризморгать нинге фкя стирец!
Татьяна АЛЬШИНА.
Фотось Николай КАРАНОВОНЬ.

Последние новости

Нацпроект и снижение смертности при ДТП

В рамках национального проект «Безопасные качественные дороги» в Мордовии...

В Мордовии продолжается реконструкция районных домов культуры

Торбеевский дом культуры – центр притяжения всего района. Здание...

Дискуссия по развитию БРИКС прошла на Всемирном фестивале молодёжи

В рамках Всемирного фестиваля молодёжи в субботу, 2 марта,...

Саранск встретил март «Весенней ярмаркой подарков» 

1 марта в столице региона, при поддержке Министерства экономики,...

В Региональный сосудистый центр №2 поступает новое современное оборудование

Региональный проект «Борьба с сердечно-сосудистыми заболеваниями» национального проекта «Здравоохранение»...

ПОСЛАНИЕ ПРЕЗИДЕНТА

Инициативы Президента Владимира Путина по итогам послания Федеральному Собранию  29...

Благоустройство Дубенского района Мордовии

Центральная площадь вс. Дубенки, 2 общественные территории в с....

Нацпроект и снижение смертности при ДТП

В рамках национального проект «Безопасные качественные дороги» в Мордовии реализуется региональный проект «Безопасность дорожного движения». Одна из его задач – сокращение смертности в результате...

В Мордовии продолжается реконструкция районных домов культуры

Торбеевский дом культуры – центр притяжения всего района. Здание построено в 1974 году и давно требовало ремонта. В 2023 году по национальному проекту «Культура»...

Дискуссия по развитию БРИКС прошла на Всемирном фестивале молодёжи

В рамках Всемирного фестиваля молодёжи в субботу, 2 марта, прошла дискуссия «БРИКС: новые вызовы в эпоху глобального развития». На мероприятии также прошли дебаты «Приоритеты и...