19 декабрьста Саранскяйса Мокшэрзянь государственнай национальнай драматическяй театраса эсь кенкшензон панжезень мокшэрзянь ЯкшамАтять резиденцияц. Вов ни колмоце кизось ЯкшамАтясь кенярдезь васьфнесыне ширезонза сайхнень. Тядде инжихнень примамс теенза лезнихть Ловонь стирнясь, Вармавась, Ёфксонь азондысь.
ЯкшамАтяти инголенди ульсь кода тяштемс и кучемс сёрма. Почтань «арзяняц» нинге ноябрьста путфоль национальнай театрать фойес. Декабрьста ульсь кода рамамс билетт и корязост самс резиденцияв. Билеттне мишендевсть-рамсевсть пяк курокста, но, кода удалась содамс, декабрть мекольце шинзонды и январть ушетксонцты синь нинге ульсть.
Васенце шиня, 19 декабрьста, мокшэрзянь орнамент мархта орса щаф ЯкшамАтясь и лездыенза васьфтсть лама инжи.
Шабатненди аноклафоль мялень салай программа, кона пяшксель седиста моли пара валда, кенярдемада.
Азома сявок, што васенце колма представлениятне ЯкшамАтять резиденцияса ётафтовсть «Детство без границ» проектть мяльса кирдезь «Много дети» Мордовскяй региональнай общественнай организациять вельде. Рамафтольхть билетт 150 малава иденди—Донецкяй и Луганскяй Народнай Республикатнень эзда эряма сайхнень шабаснонды, лама идень семьятнень эзда стирнятненди-цёранятненди, шумбрашиса ограниченнай возможность мархта шабатненди и иттненди-инвалиттненди.
Театрав сувамста инжихнень васьфтезь ёфксонь геройхне, конат няфтезь кить Якшам-Атяти. Ки лангса стирнятнень и цёранятнень учендозь заданиятне. Синь пяшкодеманксост эрявсь кой-мезе тиемс. Кепотьксонди, содамс содама ёфксть, кштимс. ЯкшамАтять резиденциязонза кись ульсь эсь лацонь путешествиякс.
Но аф аньцек тя учендозень иттнень. ЯкшамАтясь киньге ашезе нолда ламбама казнефтома. Ламотне резиденциясонза тифтсть мархтонза и лездыензон мархта лятфнембяленди фотографият.
ЯкшамАтять мархта васедематнень пингста башка мяль шарфтфоль иттнень мокшень и эрзянь кяльхненди тонафтомаснонды. Шумбракстомань валхнень, животнайхнень лемснон и лама мезть лиять резиденцияса примайхне азондозь рузкс, а меле мокшекс или эрзякс.
19 декабрьста сявомок 6 январти молемс ЯкшамАтясь несколькаксть шити кармай васьфнемост ширезонза сайхнень. 1,2 январьста теенза максовихть ваймамань шит, сяда меле сон поладсы эсь тевонц.
Лувиеньконди азсаськ, што ЯкшамАтякс фалу уленди Мордовия Республикань Заслуженнай артистсь, Мокшэрзянь национальнай театрань ведущай актёрсь А.П.Егранов, кона сай кизонь январьста Мордовиять эзда примай участия Москуса ётафтови Якшама Атятнень парадсост.
ЯкшамАтясь, Ловонь стирнясь, Ёфксонь азондысь, Вармавась учихть резиденцияв сай инжихнень эса!
Т.владимирова.