«Ялгаксшинь каштазсь» пуропнезень мокшетнень и эрзятнень

13 июльста Оренбургскяй областень Абдулино ошса ульсь «Масторава» ила, конань аноклазе и ётафтозе «Мокшэрзянь культурнай центрась». Праздниксь пуропнесь сядот мокша и эрзя, тяконь лувксса Поволжьянь шабра региоттнень эзда.
Инжихнень каванязь «Цёмара» мокшэрзянь кухнянь ярхцамбяльса и симомбяльса, медьса и чайса. А стане жа теест няфтьфоль «Невтнема ютко» народнай промыслань изделиянь выставкась, машты кядь ломаттне азондсть художественнай национальнай промыслань и ремеслань кой-кона секретснон колга.
Аф кржа охотниксь няфтезь эсь вийснон «Тюштянь налкснемат» спортивнай пялькстомаса. Иттне оцю мяльса примасть участия кода кунардонь пингонь национальнай налхкомаса, стане и лыжероллерса ласькомаса и картингса ардомаса.
Инжихнень инголе кштисть-морасть Мордовиянь Народнай артисткась Анна Атласова, МР-нь Заслуженнай артисткась Галина Макшева, «Лайме» вокально-инструментальнай ансамбльсь (Кочкурова велесь), Самарскяй и Оренбургскяй областень музыкальнай коллектифне.
Башкортостанцта «Олячи» эрзянь студиянь участникне няфтезь этническяй стильса эсь лацонь моднай мазоптомбяльснон.
Илань программаса пяк лац сотневсть марс койхне-обуцятне и тяниень пингсь, мокшэрзянь лама вайгяльса морамась, рузонь и татаронь мелодиятне. Праздниксь шумордавсь «Ялгаксшинь каштазть» («Венок дружбы») кодаманц мархта, коза сембе участникне и инжихне кодазь эсь тараткаснон, панчфкаснон и лентаняснон.