25 декабрьста Саранскяйса, Культурань республиканскяй Дворецса, ётафтовсь Мордовия Республикань Оцюнять патронатонц ала эрь кизонь республиканскяй Од кизонь представления.
Илас сашендсь 450-да лама идь: уроз и тядянь-алянь заботафтома лятф шабат, специальнай военнай операциянь участникнень-военнослужащайхнень идьсна и Россиянь од территориятнень эзда Мордовияв саф стирнятне и цёранятне.
Фойеса синь васьфтезь Якшам Атясь и Ловонь стирнясь.
Васенда шабатне пуромкшнесть омбоце этажса стяфтф мазы кузть перьф, коса синь учезь Ловонь бабась и малаткшни кизоть символоц—Драконнясь. Синь и иттне шарондсть хороводса,пеетькшнесть-рахсесть, «крьвястезь» кузнять, тердезь Якшам Атять и сонь уноконянц—Ловонь стирнять. Ламотне тифтсть мархтост лятфнембяленди фотографият.
Пуромфнень инголе корхтась Мордовия Республикань социальнай араламань, трудонь и населениянь заняфшинь министрть заместителец Светлана Шувалова.
Светлана Ивановна поздравляндазень пуромфнень малаткшни Од кизоть мархта и арьсесь, штоба 2024 кизось улель сядовок удалафокс и цебярькс 2023-цеть коряс.
Меле сценать лангса няфтьфоль «ЧебурашкаПати» интерактивнай шоусь. Чебурашкиттнень семьясна аноклась Од кизонь илядь и тердезь инжикс содафснон. Мезе лиссь тянь эзда—няезь представленияс саф шабатне.
Иттне тусть куду кепотьф мяльса.
Татьяна владимирова.
Фототне Николай КАРАНОВОНЬ.