Торбеевскяй районнай библиотекась ётафтсы эряфс «Нить связующая» (Торбеево) проектть
«Нить связующая» (Торбеево)—тяфтама лем ала проектть тяддень 1 апрельста сявомок 30 ноябрти молемс ётафтсы эряфс «Мордовия Республикань Торбеевскяй муниципальнай райононь районнай библиотека» культурань муниципальнай бюджетнай учреждениясь. Тисы сон тянь Культурнай инициативатнень Президентскяй фондснон ширень кирдеманц вельде.
2022 кизоня «Нить связующая» (Торбеево) проектсь арась сяськикс Россиянь Президентть культурань, искусствань и креативнай (творческяй) индустриянь областьса проекттнень эряфс ётафтомасна Грантонзон максомаснон коряс васенце конкурсса.
Проектть руководителец Торбеевскяй районнай библиотекать директороц О.Б.Заверткина, проектть арьсиец (проектть менеджероц) библиотекать методико-библиографическяй отделонц заведующаец Е.В.Кемешева.
Васенда ётафтфоль «Нить связующая» (Торбеево) проектть анокламань этапоц.
О.Б.Заверткинать валонзон коряс, муфтольхть поставщикт, заказафоль оборудования, штоба тиемс этно-выставканди кочкаф помещенияса ремонт.
Помещениясь—библиотекать фкя кабинетоц. Тяни сон тиф крестьянонь кудботма лаца.
Сяда тов кярьмотьфоль этно-выставкать тиеманцты.
Тяконь мархта ряцок библиотекань сотрудникне анокласть «Нить связующая» виртуальнай этно-выставка Торбеевскяй районнай библиотекать сайтсонза. Проектть эряфс ётафтоманц мяльса кирдезь, сайтсь козякофтфоль экспонаттнень колга азондоматнень и фотографиятнень мархта.
Мзярда ваныне виртуальнай этно-выставкать, нльне абондонь—сяшкава сон салазе мялезень. Кепотьксонди, панжине фкя экспонатть—пихтембарть колга азондомать. Квалманза тяса ули сембось. Кодама сон? Ниле ужеса, апак архт, потмосонза ниле лопасть мархта вал. Ули кшнинь кундамац, конань шарфтомста лопасть мархта валиксь вайвелезста пихтьсы вайть.
Пачфневи, коста сявф тя экспонатсь, мезьста тиф, размеронза и стак тов. И, шарьхкотьф, максфт пихтембарть фотографиянза.
Эсь лацонь тяфтама «паспортт» аноклафт эрь экспонатти. Сембоц эздост, О.Б.Заверткинать валонзон коряс, 200 малава. Материалть анокламста описания тифоль ведьгемоньда ламоти, но сяда тов виртуальнай выставкаса арьсекшневи няфтемс сембе уликс экспонаттнень.
Пихтембарьда башка, няфтьфт арзясь, панарсь, безменць, цяпорсь, салдоркссь, цярдомсь, сифтемсь…
И семботь тянь ваномс и морафтомс ули кода кудса ащезь. Тянкса интернетть вельде сувама Торбеевскяй районнай библиотекать сайтозонза и ётама «Нить связующая» виртуальнай выставкати.
Кизонда Т.Ф.Эрекайкина ётафтсь сюреса сёрмадомать коряс мастер-класс. Меле тянь колга видеоматериалсь стане жа путфоль виртуальнай выставкати.
Сонь сяда мялень салайкс и козякс тиеманксонза лама вий путнихть библиотекань сотрудникне А.К.Ромашкина и С.А.Матвеева. Синь вешендьсазь экспонаттнень колга историческяй сведениятнень.
«Нить связующая» (Торбе-ево) проектть мяльса кирдезь, аноклафтольхть презентацият Мокшень Ювня, Лопатино велень мордовскяй национальнай щапнень коряс.
Сяда тов сайтса тифоль «Велезень легенданза и сказаниянза» рубрикась, коса мусть васта Торбеевскяй райононь эряфкшу ломаттнень азондомаснон коряс сёрматф сказаниятне, легендатне, ёфксне.
Библиотекань сотрудникне рамасть кодамань станок, конань вельде, кепотьксонди, «Заветы доброй старины» фольклорнай посиделкатнень пингста ётафтфтольхть кодамать коряс мастер-класст.
Торбеевскяй районнай библиотекаса «Нить связующая» этно-выставкась панжевсь июль ковть песта. Тя пуромксти сашендсть Торбеевскяй муниципальнай райононь оцюнясь С.Ф.Шичкин, сонь заместителец, социальнай работать коряс отделть начальникоц Н.Н.Киреев, М.П.Девятаевонь лемса музейть заведующаец Н.Б.Бегаева, Торбеевскяй творчествань кудть директороц С.А.Ванюшкина, лиятне.
Синь васьфтезень и выставкать мархта содафтозень библиотекать директороц О.Б.Заверткина.
Дракино велень «Кстый» ансамбльсь морась морот, а Салазгорь велень библиотекань библиотекарсь А.А.Эрькина каванязень инжихнень мокшень национальнай ярхцамбяльса.
Няфтьфтольхть ванфты (оберег) някатнень тиемаснон, сюреса сёрмадомать, кштирдемать, кодамать коряс мастер-класст.
Этно-выставкать ванома сашендсь ни лама ломань.
Сембе инжихне аф аньцек ванондсазь крестьянонь кудботма лаца тиф кабинетть, эсонза уликс экспонаттнень, но и оцю мяльса примсихть участия мастер-класснень эса.
«Нить связующая» (Торбеево) проектсь шумордави ноябрть песта, а выставкатне кармайхть работама сяда тов. Тяда башка, ётафтовихть экскурсият и краеведческяй мероприятият крестьянонь кудса. Семботь тянь колга пачфтеви интернетса.
Т.Альшина.